Prek Bohnecovoga grunta za Frkanovec

Kak zgledi došlo je do svojega kraja desetletno suđenje Zdravkijo i Zorano Mamičo i jivim pajdašima šteri so vedrili i oblačili vu zagrebečkomo labodirataškomo klubo Dinamo. Nejvekši i nejvišeši sod v Lepoj Našoj je svoje rekel, a rekel je kak so Mamiči i pajdaši odvlekli peneze z kluba i to pre sto milijonov kuni. Kaj se toga posla dotikavle i kaj se teh penez dotikavle soci so deli točko, a to znači da Mamiči i pajdaši morajo v rešt de bodo meli hajdi let pred sobom kaj bodo si mogli gruntati kaj so naprajli, a kaj zaprajli. Sejeno je to se skupa malo čudno, Mamiči so krivi kaj so odvlekli peneze z Dinama, a Dinamovcima ne falijo penezi? I ne sam to kaj Dinamovcima ne falijo penezi nek se Mamičima nigdi ne pozna kaj bi meli viška penez? I ne sam to, soci so svoje rekli, Mamiči pomalem pakerajo kufre, a ne znati ipak de bode što v rešto. Zdravko ostaja v Bosni, tak je bar rekel, a što zna de si bode Zoki zebral rešta? Mortik na Havajima, tam je još ne bil. Pak i čuda je bole kaj bodo rešta odslužili negdi drugdi nek prinas jerbo bode to faleše za Lejpo Našo, nebomo jiv morali hraniti, oblačiti i kvartela jim dati. Još bi sam nekaj pital ak se ne bodete srdili? Najme kaj, rekel sam več da te veliki penezi Dinamovcima ne falijo, a sod je nikaj niti ne rekel za penez, očem reči, v rešto dečki bodejo, a nišči je nigdi niti jempot ne rekel kaj bi morali vrnoti peneze??? Stepali so se bregi, a skotil se je miš!

Nekaj si gruntam da bi se ve naši soci morali obrnuti na drugo strano i tam iskati lopova de falijo penezi i tam bodo najbrž čuda predi došli do istine.? Do istine, kakše takše, bodo došli kak so došli i tu pre Mamičima, ali do penez nikak. Kuliko vidimo hajdi se sakefele istini prinas v Lepoj Našoj našlo tak da bi več bila skradja vura kaj bi naši soci došli i do nekših penez?? Ne sam soci nek i poreznjaki!

Kuliko čujemo od Zdravkeca Mamičovoga da so soci došli do penez i to z jegovoga žepa, ali Dinamovci i Lejpa Naša nebodo nikaj od toga vidli. Kaj se mita dotikavle v tem sođenjo Zdravkec je nadelil se soce sam kaj bi istina bila nekaj drugačeša, očem reči, Zdravkeca istina niti ne interesera sam je štel kaj ne bi moral iti v rešt, ali peneze je potrošil, a istina se je ne spremenila.

Nekaj mi je tu jako čudno, Zdravkec je bil stoprocentno siguren da ga ovi v rešto ne bodo vidli i na to svojo karto je potrošil hajdi ojerov, ali kak zgledi porinul jiv je v krive žepe. Čudno mi je to kaj se je ne pospominal z gosponom Horvatinčičom, šteroga rešt hajdi dugo čaka, a Tomek nikak da dojde.

Soci so poštejaki (tak bi bar moralo biti), a i poštejaka je moči kupiti sam ga treba i pošteno platiti!

Naši policaji so zaplenili hajdi beloga praha, očem reči, kokaina za šteri se je zazvedilo da ga je hajdi ponucal negdašji zagrebečki gradonačelnik Milan Bandičov. Najbrž so se ovi trgovci na veliko z belim prahom (čitaj: dileri) malo opustili od da jim je glavni kupec odišel k Božeko na račun, pak so policaji došli na svoje. Morajo i policaji negda nekoga prijeti z prstima v pekmezo.

Kaj se ceplenja protiv korone dotikavle ono pomalem napreduvle kak muhe v močjako: sako malo se gene z mrtve točke, a unda pak par dni stoji na mesti. Kak velijo naši stručnjaki za lekece sa so cepiva dobra sam se naši ljudi z nešternima nečejo ili pak ne vupajo cepiti. Na hudi glas je došla Astra Zenica i tu so nejvečpot problemi, a naša Vlada je takšega cjepiva nejveč nabavila. I nišči nam nebre reči zakaj ruon toga protiv šteroga naši ljudi nejveč gombajo?

Pre našim sosedima v Bosni to cjepivo nejbole ide. Dok Bosanca pitajo de si se cepil i što te je vcepil, on veli: nekša Azra iz Zenice. I sima dobro!

I naši rokometaši so odišli po riti k meši, očem reči, nesmo uspeli vu Francuskoj kupiti karte za Olimpijado v Japano. Posle kak smo ne baš bili kak tre na Sveckomo prvenstvo v Egipto odišel je Lino Červar, a ve pak smo išli po karte za Japan z mladim Hrvojom Horvatom. Kak zgledi neso se krivi treneri nekaj ne valja niti med našim rokometašima. Nejpredi smo skorom pobedili Francoze, več je bilo se gotovo unda smo mi prefletno hitili puške v kuruzo i Francozi so, na se zadje, bili pobedniki. Posle smo na jedvite jade pobedili Portugalce i Tunisa, ali to nam je ne bilo dosti jerbo so se Portugalci dospomenuli z sosedima Francozima  i to tak kaj so Portugfalci zabili gola v zadji sekundi i porinuli so se v cuk za Japan, a nas so, črez zadja vrata, hitili vum. Portugalcima so, kak je to i red, malo pomogli i nemački soci jerbo so jedva dočekali kaj nas negdi pokradejo kaj jim mi več na leta furt pobeđuvlemo. Prilika dela od čoveka lopova.

Vu Frkanovco je otprta starinska međimurska hiža v kakšoj so negda živeli naši japice i mamice štera se zove Matulov grunt kam bodo  ljudi mogli dojti glet i vučit se kaj se naš „Falaček med dvemi vodami“ ima. To je lepo i dobro sam smo mi Međimorci pozabili da je još pred nekaj vejč od deset let Đurek Kovačov (čitaj: Juraj Kolaričov) otpral za nas Međimorce, a i se druge, Bohnecovoga grunta v Doljnjemo Hraščano de se more videti hajdi toga kaj so naši ljudi nucali vu svojemo sakodnevnomo živlejo. Saki šteri oče nekaj zazvediti o lepotama Međimorja našega maloga, o falačko med dvemi vodami mora obhoditi se tri hiže: nejpredi dojde v Hraščane na Bohnecov grunt, unda ide v Križovec v glavno zeleno hižo, a na se zadje završi Frkanovco na Matulovom grunto. A z Matulovoga grunta mo je nejbliže  na vinsko cesto z šterom se mi Međimorci posebno štimamo.

ZADJA VEST: Župan Matija Posavcov se je odlučil kaj bode i ovoga majuša išel na izbore, očem reči, i dale se bode bavil z politikom i to v glavnomo međimorskomo grado Čakovco, sam je još ne stoprocentno siguren je li to bode delal vu vulici Kralja Tomislava ili pak Ruđera Boškoviča!!??

Ostavi komentar