Glasi so prebrojeni, svetla so pogašena
Minul je i drugi krug izborov za precednika Lepe Naše. Kak se je i kazalo pobedil je stari precednik stara „šaka z Pantovčaka“ Zoki Milanovičov i ostal je dale, još pet let na kvarteljo kak šef državne politike, očem reči, kak “gazda” Pantovčaka. Nebrem reči da smo se mi kak biračko telo skazali jer bo nas je došlo glase davat meje od pol, cirka 49 procentov. Zakaj so ovi kaj so doma ostali ne došli o tomo se mi moremo sam spominati, ali nigdar točno ne bodemo zazvedili kaj je bilo po sredi. Nešterni nam pod nos rivlejo “istino” da so ne meli komo svoje glase dati jerbo so nejbolši, nejvredneši i nejpošteneši kandidatlini ispali vu prvomo krugo tak da so nešteli ne šteli dojti na biračko mesto i potepsti svojega glasa ili pak naprajti kak so naprajli oni šteri so ne šteli doma ostati pak so došli na biračka mesta pak so precrtali se kandidatline i napisali so nešterne svoje, a takše listeke so oni šteri so brojili glase hitili vu konto za smetje.
Pravica se je skazala, pobedil je on kandidatlin šteri je dobil vejč glasov! Makar je to Ivica Marijačić, glavni urednik Hrvatskoga tjednika čistam drugač rekel: U Domovinskomo rato so ginuli nejbolši da bi vladali nejhujši. Mesto branitelov odabrali smo dezertere, umjesto domoljuba svojedobno deklarirane Jugoslavene, umjesto hrvatske i stadalničke biografije, odabrali su privilegiranu komunističku…
Pripoveda se kak je Zoki Milanovičov dobil povereje od 75 procentov biračkoga tela, a on je pravzaprav dobil 75 procentov od oni 49 procentov šteri so došli glase davat, a ne od sih šteri so meli pravo svojega glasa dait tak da unda to dojde napriliko 36 – 37 procentov. No, i to je čuda vejč od jegovoga protivnika Dragana Primorca šteri je unda ne dobil 25 procentov, kak je prebrojeno, nek nekaj vejč od 12 procentov. A te nekaj vejč od 12 procentov je hajdi pot meje od onoga kuliko se je nadjal. Što zna kaj bi bilo da so došli i oni šteri so doma ostali i komo so oni kanili svoje glase dali? Ali kak bilo da bilo davanje glasov je gotovo i pobedil je sam jeden, a si drugi so zgubili makar skorom si pripovedajo kak so osvojili vejč glasov nek so računali. A si znamo da si šteri ido na izbore, si šteri mečejo svoje ime na listeke za zbiranje se nadjajo kak bodo pobedili, a ne kaj bodo dobili 5 – 10 ili pak 15 procentov glasi. To sam nam tak pripovedajo kaj mi nej vidli kak jim tečejo soze dok čitajo izborne razultate.
Josipa Lisac je mam počela vežbati
Čim so se prebrojali glasi, čim je Zoki Milanovičov proglašen pobjednikom mam je Josipa Lisac počela vežbati popevati državnu himnu Lijepe Naše. Verjem da se zmislite kak je Josipa popevala himno “Lijepa Naša domovino” dok se je Zoki prvi pot selil na Pantovčak, a to je bilo pred pet let. Ruon tak verjem i znuom da se još denes zmislite kak je “Lisica” mela nekšo čudno vižo i da je nišči ne prepoznal himno po viži nek po rečima tak da se nadjam da ovo leto dok bode Zoki mel drugo inauguracijo da bode Josipa popravila toga felera. Himna je takša pesma kaj ima svoje reči, svojo glazbo, svojo vižo i himno nebre saki popevat kak oče nek se popevle onak kak se mora i kak je to več prvoga dneva zafremana. Verjem da bode ovo leto došlo se na svoje.
A što bode se došel na inauguraciju Zokijo to bodemo stopram zazvedili: nešterni se več ve hulijo i obečavlejo kak ne bodo došli, a verjem da hajdi oni šteri bi došli ne bode pozvano. Nebremo reči da je Zoki za svojo pobjedo dobil ruon preveč čestitiki, čestitali so mo Austrijanci, Crnogorci, sosedi z Bosne i Hercegovine i Kosova, sosedi Albanci i prvi sosed prek Save Milorad Dodik. Još se čaka čestitka našega prvoga soseda prek Mure i Drave i Zokijovoga pajdaša Viktora Orbana.
Mi Međimorci smo odišli na svoje
Minuli tjeden smo mi Međimorci preslavili 9. januara Spomendan otceplenja Međimorja našega maloga od Mađarov i pripojenje matici Hrvatskoj. Sako leto se poklonimo onima šteri so bili nejglavneši vu te dneve dalekih 1918. i 1919. godine. Se nam je poznato, ali je čistam vredo da se bar jempot na leto zmislimo oni šteri so vu te dneve bili nejglavneši i šteri so meli vupeše kaj so natirali Mađare pre meje. Poznato nam je kak smo mi Međimorci ne uspeli v novembro 1918. leta natirati Mađare jerbo so bili preveč žilavi, a mi malo preslabi tak da je den oslobođenja prebačeni v december mesec da so nam pomogli vojniki naših sosedov ili kak so to unda rekli vojska z Hrvaške. Rekli so nam kak so vojsko skupljali pukovnici Slavko Kvaternik i Drago Perko i kak je den “D” bil 24. december, očem reči, Badnjak 1918. leta. Skupljeno vojsko je v Čakovec dopelal pukovnik Drago Perko, ali so Mađari več hitili puške v kuruzo i bitke ga ne bilo, ali je zato Međimorje oslobođeno. Unda so stvari vu svoje roke prijeli Ivan Novak, fiškal z Macinca, Vinko Žganec župnik z Vratišinca, šteri je na leta skupljal pjevačko blago našega “Falačja zemle med dvemi vodami”, Juraj Lajtman priločki župnik šteri je mel prek sebe Doljnje Međimorje i čakoski fratarski gvardjan pater Kapistran Geci. Župniki so organizerali kaj so več na polnočkama vu sim cirkvama v Međimorjo oglasili kak bode Velika skupština održana v Čakovco na Fratarskomo trgo i to posle meše v deveti vuri. Na te Veliki skupštini se bode donesla Rezolucija, štero je napisal pater Kapistarn Geci, kak bode Međimorje od unda nadale navek Hrvacka i nigdar več Mađarska. Ivek Novakov se je brigal okoli svetovne vlasti, ali je on ipak malo preveč drukal za Kraljevino SHS jerbo so več na Božič v Čakovec došli srpski financ žandari. Vinko Žganec je svojimi pesmami (dve knige) pomogel kaj so ovi v Evropi vidli da mi Međimorsci pripadamo Hrvatima jerbo govorimo hrvatski i popevlemo po međimorski. Pater Kapistarn Geci je črez par dni zafremal “Međimorske novine” šterima je on bil gazda i glavni urednik tak da so one pisale sam ono kaj je bilo istina i kaj je pomoglo nam Međimorcaj kaj smo črez par sto let, na se zadje, ipak došli na svoje. Saki je pomogel kuliko je mogel, a nejpredi so pomogli pukovnici Slavko Kvaternik i Drago Perko, šteri so Mađare pretirali prek Mure i Drave, a posle župniki kaj so organizerali Veliko skupštino de se zišlo prek deset jezer ljudi i prihvatili Rezolucijo tak da je Međimorje zanavek došlo k svoji materi Hrvatskoj. Kuliko je Slavek Kvaternik bil važen za nas Međimorce govori i istina da mi v Čakovco imamo Kvaternikovo vulico, ali to je ne Slaveka Kvaternika nek Eugena Kvaternika jerbo je Slavek posle negdi zahuzal tak da je ne mogel dobiti svojo vulico makar si čuda nas Međimorcov grunta kak je čakoska Kvaternikova vulica ruon Slavekova.
