Lepa Naša pak sam do Drave?
Mi šteri se malo duže klatarimo po ovomo našemo sveto, mi šteri smo dali svojega glasa za to kaj odidemo na svoje kaj se zafalimo mačehi Jugi na semo onomo kaj nam je davala, očem reči, jemala vu minulomo stoletjo zmislimo se kak so naši levičari (čitaj:antifašisti) na red pobirali prvoga našega precednika, prvoga precednika Lepe Naše, doktora Franju Tuđmana dok mo je pobeglo pak je rekel kak je Lepa Naša sam do Drave. Pobeglo mo je jerbo je znal, a i mi smo se navelikom z tem falili kak smo si odnavek zdobra z Hrvatima.
No, otkak smo 1993. leta dobili i zafremali svojo Međimorsko županijo unda se je to več ne čulo. Ali letos mi je to znova palo na pamet i to ve na ovoletni Den državnosti. Zakaj? Sima nam je poznato da je Lepa Naša minulo leto nabavila nove reoplane kaj bodo branili Lepo Našo, kaj bodo branili naše nebo ak bi, ne daj Božek, pak nekomo palo na pamet, kak je to srpskim antifašistima i četnikima palo na pamet 1991. leta dok smo se reshajali od Juge. Mi v Lepoj Našoj, mi Hrvati, smo dali zahtjeva za razvod državne zajednice, a Srbima je to ne pasalo pak so si zeli četnike i jugosoldatesko i započeli so rata šteri je trajal štiri leti. Znuomo si kak je krvavi bil i kuliko je naših branitelov poginulo dok smo ne mi, očem reči, naši braniteli zdigli Olujo i zanavek pretirali četnike na svoj hatar. Da se to ne bi znova pripetilo Lepa Naša je minulo leto nabavila nove reoplane i to francoske Rafale. Ovo leto za Den državnosti so se naša Hrvacka vojska, naš minister Ivek Anušičov i precednik države Zoki Milanovičov šteli pofaliti z reoplanima kak je i red za Den državnosti, pak so reoplani preleteli celo Lepo Našo, očem reči, skorom celo Lepo Našo. Najme kaj, preleteli so se Županije sam so ne leteli ober naše Međimorske. I nišči ne zna zakaj? A den predi, za Den grada Čakovca, je prinas v Čakovco bil precednik Zoki Milanovičov, šteri si je veliki pajdaš z našim međimorskim županom i saki čas je prinas v Čakovco i v Međimorjo i ve je ne dal naloga kaj bi se poštimal z reoplanima i pred pajdašima Međimorcima. Morete si vi to bpregruntati kak so reoplani ne leteli ober naše Međimorske županije, a naša županija je lokomotiva gospodarskoga i sega drugoga napretka v Lepoj Našoj. Ne znati što more meti nekaj protiv naše županije štera je v cukor piksi precednika Milanoviča, a on je vrhovni zapovjednik naše vojske, a z tem i naših areoplanov?
Kaj so to pravi pajdaši ???
Kak sam več rekel minuli tjeden je Grad Čakovec preslavil svoj den i to 446 let posle kak je naš Međimorec Juraj IV. Zrinski dal našemo Čakovco 1579. leta trgovačke povlastice i od unda je počel ozbiljneši razvoj Čakovca. Juraj Zrinski je bil protestant i zafremal je tu prinas v Nedeliščo prvo ozbiljnešo tiskaro v šteroj je tiskana prva ozbiljneša kniga na kajkavskomo jeziko i to Decretum Ivana Pergušiča, a ne Direktum kak smo mogli čuti od precednikan Zokija na svetešjoj grackoj sjednici za Den Grada Čakovca. Kuliko znuomo Grad Čakovec ima čuda pajdašov i to tak čuda kaj ga ne dosti mesta kaj bi si meli svoje obeliske pajdašije na glavnomo čakoskomo trgo. Svoje obeliske pajdašije imajo Šramberg z Dojčlanda, Plonsk z Poljske, Nađkaniža i Siget z Mađarske Blagoevgrad z Bugarske Kyrat Tiron iz Izraela, a sfalili so obeliski za naš Lipik, šteroga so branili naši Međimorci vu Domovinskomo rato i „nejmlajši“ pajdaš od pre mesec dni, a to je Bečki Novigrad iz Osterajha. Ve vidite kuliko pajdašov ima naš Čakovec, a niti jeden pajdaš mo je ne došel na „proščeje“ za Den grada.
Pitam vas, pitam sebe, pitam gradonačelnico i gracke oce kaj so se itak zamerili pajdašima kaj je ruon niti jeden ne došel na glavno gracko fešto? Još nekej, Grad Čakovec je i prijatel dece pak ga niti jiv ne preveč bilo na toj glavnoj, ak ne i nejglavnešoj grackoj fešti. A slavil se je, ne sam Den grada nek i novi mandat čakoske gracke načelnice Ljerke Cividini. Pajdašov ga ne bilo, a došli so sosedi, ali ne si nek sam oni de je SDP na vlasti kaj god to značilo. Ne bodete veruvali, ali precednik Vlade Lepe Naše je bil pozvani, ali je ne mogel dojti, ali je zato poslal svojega izaslanika priločkoga gradonačelnika i sabornika Ljubija Kolareka. Ne znati zakaj je Ljubo ne štel nikaj reči Čakovčancima pak bar je i on v Priloko osvojil novoga mandatlina i to svojega četrtoga, a i sabornik je? On je bil tiho, a SDP-ovci so govorili. nČakovčanci još navek za gradonačelnico imajo gospođo Ljerko Cividini štera je v minulomo mandato šteroga je osvojila kak članica stranke Narodnjakov (čitaj: HNS), a predi ovih zadjih izborov je prešla na Nezavisno sjeverno platformo i naslonila se z svojom levom rokom na SDP-e, pak je tak zamjenica čakoske gradonačelnice postala esdepeovka Lana Remar. Kak to, očem reči, kam to se ide najbrž bodejo Čakovčanci, črez kratek čas, meli drugarico gradonačelnico. Kuliko vidimo najbrž se niti čakosko biračko telo ne bode preveć bunilo. Mortik bodo dali i na mešo. I to popevano!
Kak je bilo v Zagrebo??
Kuliko smo vidli zagrebečki purgeri so ne, kak izborno telo, svojega posla zbavili vu prvomo krugo i morali so iti na popravni vu drugi krug. Makar so meli produžno nastavo još dva tjedne nikaj so se ne navčili i znova so zebrali Tomico Tomaševiča, šteri je vu minule štiri leti pokazal kak se v nikaj ne razmi i nikaj je ne napravil, ali zagrebečki purgeri so mo znova dali mandatlina. Najbrž je to bilo zbogradi toga kaj ga je podržaval zagrebekči veliki SDP-e kak mali žetončič male strančice štera se More, ali nikaj ne zna i nikaj ne dela. Na kaj je došel negdašji veliki SDP-e ? On je ve, i to ne sam v Zagrebo, nepotrebna stranka štera je tak slaba kaj nemajo niti svojega kandidata za grackoga načelnika. Brzčas je istina da se kolo sreče obrača i to se fletneše i fletneše pak je zato i hajdi oni šteri so bili na ringišpilo sreče palo vum z svoji nihaljki!
Na kaj so došli naši „seljaki“
Na nikaj je došla negda jena od jakših stranki vu Lepoj Našoj Seljačka stranjka (čitaj: HSS). Dugo so „seljaki“ krojili ne sam lokalno nek i državno vlast, ali stranjka je odišla po riti k meši dok jo je v roke zel negdašji sabornik i samoborski gracki načelnik Krešo Beljakov. Sima nam je poznato kak je on i zakaj došel v politiko (kruh bez motike), a nigdar mi je ne išlo v glavo zakaj so mo dali v roke HSS-? Znuomo šteri je bil slogan Seljačke stranke:
VJERA U BOGA I SELJAČKA SLOGA, ali čim je Krešo zel v roke cugle stranačke vlasti,
nejpredi je nestala vjera u Boga (on je skrenul preveč v levo), a kratek čas za tem nestala je i seljačka sloga, a žnjom je odišla po riti k meši i cela stranka. Što bi rekel da jeden čovek more vništiti celo stranko i to ne bilo kakšo nek Seljačko?