Kaj je itak bil Fred Matič?
Verjem da ste si čuli da je hmrl čovek z dva imena Predrag Fred Matič, političar i član SDP-a. Si oni šteri so o jemo pisali i pripovedali so se složili v tomo da je on bil zastupnik Lepe Naše v EU parlamento i da so ga zbrali jegovi esdepeovci. Ruon tak si so znali da je bil minister branitelja vu Vladi Zokija Milanoviča i da je predi nek je postal minister ozdravil od PTSP-a šteri mo je ostal kak braniteljo. V semo drugomo so se nikak ne mogli složiti. Jeni so pripovedali da je bil vukovarski branitelj i to dragovoljac, a drugi so nam rekli kak so ga policaji vu Vukovari vlekli vum z pelnice v dečjemo zabavišto. Fred Matič se sam falil kak je ratuval vu Vukovaro na Trpinski cesti, a naši međimorski i zagroski braniteli, šteri so tam ratuvali so ga tam ne vidli. Bil je v logorima v Nišo i vu Stajčevo, ali jega so navek preskočili dok so naše „ustaše“ bili. Na se zadje ve nikak nebremo točno znati što je hmrl je li je to bil dragovoljac, branitelj ili pak nešči drugi. Najbrž je nejtočneše da je hmrl Fred Matič.
Morem vam reči da je nejtočneše o Fredo Matičo rekel, očem reči, napisal Marcel Holjevac naš hrvatski novinar vu svojim novinama 7 dnevno. On je napisal: Hmrl je Fred Matič čime se je prepolovio broj branitelja SDP-a. Kuliko vidimo čovek je vpučeni, esdepeovci so se ne preveč motali okoli bojišnice, ne so preveč stisko delali nek so čakali kaj rat mine jerbo za jiv još navek trajeDrugi rat i kaj se vrnejo nazaj na vlast: oni so ne za ratuvati nek za hercuvati, to je jim Ljubičica bela obečala pred nek je odišel k Božeko na račun.
Ivek je spraznil direktorsko foteljo
Došlo je vreme kaj i Ivek Perhočov sprazni svojo direktorsko foteljo jerbo, kak to teca Franca veli, jegovo vreme je minulo i mi penzioneri ga čakamo. Ne bodete veruvali, ali jedanaest moljbi je došlo, a prazno je sam jeno mesto, sam jena fotelja. I to ne bilo kakša fotelja nek ona vroča. A zakaj vroča? Jerbo saki čas Totovčari kurijo spod pod tom foteljom. Kak bilo da bilo, napisal sam i ja moljbo za direktora Čakoma, ali sam jo prekesno donesel. Prosil sam ovoga na porti v Čakomo nek zeme i mojo moljbo i nek jo porine vu sredino kupčeka. Obečal sam mo da mo to ne bode zabadaf i porinul sam roko v žep i vum sam zel ne praznoga kuvertlina, ali je portir nikaj ne bogal i neje pod milim bogom štel zeti moljbo v jenomo kovertlino i kviskija v drugomo (i to plavomo ) kuvertlino. Kaj vam nek rečem, ve stoprocentno znate kak ja ne bodem sedel vu Ivekovoj fotelji, a što bode to bodemo zazvedili čim se ovi z nadzornoga odbora vrnejo z urlaba. Najbrž mi Međimorci nemamo dosti doma mladi i sposobni direktori i zato smo iskali kaj se nudi okoli. Nikaj se je ne prinas spremenilo, zabadaf naša deca hodajo školo, ali mi jim ne verjemo da bi oni mogli sedeti v tak vručoj foteli kak je to fotelja direktora Čakoma.
Se se meja, pak i minister Bačič
Hadezeovec Branko Bačič je predi nek je postal minister i potprecednik Plenkovičeve Vlade bil, kak stranački blagajnik, zaduženi za peneze v HDZ-u i unda je skupljal peneze, a čim je postal minister, a on je minister prostornoga uređenja, graditeljstva i državne imovine, počel je državne peneze reznašati i to tam de so nejbole potrebni. Verjem da se zmislite kuliko je penez reznosil na Banovino, v Petrinjo i Sisak dok je popravljal hiže štere je potres rezrušil, a minuli tjeden je dones ne male peneze, nekaj meje od pet milijonov ojerov k nam v Međimorje za energetsko obnovo zgradi društvenoga sektora. I unda bodo naši levičari rekli kak je precednik Plenkovič pozabil na nas Međimorce, a poslal je svojega potprecednika Bačiča k nam z kufrom penez. Kak zgledi ak bode naš župan več štečil bode več i dobil. Neje sramota prositi da znaš kaj prosiš tam de imajo peneze. Pak so to, ljudi moji i naši penezi, pak i mi Međimorci punimo državno kaso. Pak več hajdi dugo to delamo i več je red kaj nekaj i nazaj dobimo. Bar svoje.
Se posod fontane, očem reči, vodoskoki probleme delajo
Još negda dok je Milan Bandičov hercuval vu Belom Zagreb grado došlo je do svaje dok je počel delati vodoskoke po Zagrebo. Nebremo reči da so ne bili lepi, ali so se jako dugo delali i na se zadje se je nigdar ne točno zanlo kuliko so koštali. Navek je zadja cifra bila hajdi vekša nek ona o šteroj so se prvo spominali i po šteroj so donesli odluko kaj se bodo dali v posel. No, takše probleme Zagrepčanci več nemajo od da jiv je negdašji gracki načelnik Milan Bandič napustil jerbo načelnik Tomica Tomaševič, šteri of mandat hercuvle s Zagrebom ima nejvekšo brigo z smetjom i nema čas se brigati o fontanaj, očem reči, vodoskokaj i to tak nema čas kaj niti ne ftegne stare vodoskoke počistiti kaj nej tekla zelena voda.
Fontani, očem reči, vodoskoski vlečejo i druge načelnike jerbo dok se naparavi vu opčini lepi, kredni i lopošnati vodoskok unda se žnjim štimajo si, kak opčinari šteri so ga naprajli tak i ljudi šteri ga hasnujejo. Tak vam je zišel i šenkoski načelnik i ogjogasec Robi Megličov. Kak je on ogjogasec tak ga navek sploh nekaj k vodi vleče. Dok so šenkoski političari na vlasti donesli odluko kaj bodo zlišpali Trga Svete Jelene mam se je sima presvetila žarulica kak bi na Trgo mogli postajti vodoskoka i to bi bilo nekaj kaj nišči nema do Zagreba. Z tem so se složili opčjnski oci i zebrani ipčinski večniki i to je bil prvi korak prema novomo vodoskoko. A dok je trifrtalj penez obečalo Ministarstvo poljoprivrede, šumarstva i ribarstva unda je posel bil sklopleni. Lepi, novi vodoskok za skorok nikše peneze. No, ono kaj je na samomo početko jako lepo zgledalo zvagnulo se je čim je svojo potporo povleklo ministarstvo jerbo so na stavki vodoskoki ne meli dosti penez. Posli okolo vodoskoka so bili več na pol napravleni, a financije so došle do toga: uzdaj se use i u svoje kljuse pak je načelnik Robi tak i napravil jerbo je ne štel kaj posel nej bil završeni i kaj nej Trg onakši fajni kak so ga Šenkovčari i zamislili, a i zaslužili. Posel je napravleni, fontana dela voda skače po vodoskosko, ali se je to koštal hajdi penez za ne preveč globoko opčinsko kaso. I svaje so počele, večnik mečejo cepanice pod noge načelniko ili pak pročelniko, a on se bori kak bi vodoskok ostal i kaj ne opčinska kasa ostala prazna. Šenkovčari se furt nekaj svadijo, ali verjem da se bodo dospomenuli i da bode vuk sit (vodoskok na Trgo), a i birke (penezi v kasi) na brojo! Tu čaka minister Bačič kak đoker.
