Nekaj si gruntam, po što zna šteri pot, da jedino prinas v Lepoj našoj morejo biti takši izbori kaj so si pobedniki. Si so pobedniki, ali so ne i si zadovolni. Hadeze je napriliko pobednik, nazobačil je nejveč glasov, ali je ne zadovolen jerbo je mesto pet, kuliko si je splaneral (posle štrte litre na stolo so se spominali i o šest) dobil sam štiri EU parlamentarce. Naša Sunčica je ne pobednica i neje zadovolna jerbo je jeni putni nalog za Brisel ostal nepotpisani i v jenoj fotelji bo sedel nešči drugi. Kuliko sam mel za čuti naša Sunčica se nejbole srdi na Donta i jegovo računico po šteroj joj je gospon Dont zel foteljo (i ojere) štero joj je naše biračko telo zglasalo.
Esdepeovci so pobedniki jerbo so mesto tri dobili štiri EU parlamentarce tak da so hajdi prebacili plana. Najveseleši je trebal biti vodeči partijac Davor Bernardič jerbo so mo te štiri popujene fotelje produžile živleje na čelo partiske kolone. A on mesto kaj bi se veselil, on je vudril v plač. Kak je toga plača nišči ne razmel, nišči je ne razmel kaj je z temi sozami štel reči, suze so poslane k doktoro Donto nek on vpoti nas obične smrtnike o čemo se tu dela. Doktor Dont, šteri mo je shodil štrtoga mandata, je ne bil stoprocentno siguren kaj je tu itak po sredi, pak je pozval v pomoč doktora Ajnštajna. Ajnštajn, kak je več je prefrigani i premazani sim maščama, lepo je rekel da bi to mogle biti soze radosnice, ali je ne točno znal reči o čemo se tu dela. Neje znal je li so mo soze potekle ili pak pobegle zbog radi toga štrtoga EU parlamentarca ili pak je bil vesel kak vušive gače, kaj je Tonino Picula produžil svojega mandata v Briselo tak da bode Davorček mogel još pet let hercuvati kak vodeči partijac i dopelati SDP tua kam je Krešo Beljak dopelal svoje „seljake“.
Pobednica je bila i Ruža Tomašič. Ona je pobednica i zadovolna jerbo bode, kak takša, znova (još pet let) dihala toga zasmrađenoga zraka v Briselo. Kak je Ruža i v minulih pet let bila nejglasneša naša zastupnica i mi kak biračko telo smo zadovolni kaj bodemo i dale tam meli nekoga šteri se bode boril za nas i za Lepo našo, a ne sam za sebe.
Pobednik je i Amsterdamska, pobednik je i Valter Flego šteri bode v Briselo herbal foteljo od svojega pajdaša Ivija Jakovčiča. Valter bode odišel gori, a Ivo se bo vrnul dimo kaj v red dotira Uljanika i jegove težake. Nek ono kaj je zahuzal i popravi. On nejbole zna de so falinge, de jiv je posadil dok je bil župan.
Pobednik je i Mislav Kolakušič. Sodec šteri se je pojavil na izboraj kak strela z vedroga neba. Dok mo je naše biračko telo glase davalo neje niti znalo kakšega mahera smo zebrali. To je čovek šteri more delati za štiri – pet težakov i to se v isto vreme i na tri mesta. On bode v isti cajt v Briselo, v Banskaj dvoraj i na Pantovčako. To je pobeda, koliko vidimo pobedil je tripot najempot. Kak ja pre sosedi Bariki. Dok ga je čulo jegovo biračko telo nejrajši bi mo bili zeli glasa šteroga so dali, ali so biračke škatule več bile pospravlene.
Pobednik je bil i Živi zid. Ali sam tjeden dni. A unda, dok so se vgasnuli birački lampaši, unda je počela svaja što bode ipak hasnuval to pobedo, to briselsko foteljo (čitaj: eu ojere): Ivek Pernarov, Vladimira Palfi (naša Beličanka) ili pak jeni Vilibor, a i naš Brankec Bunjcov je tu iskal svojega tala. Znate kak je to dober posel delati v Briselo i pet let obedovati na briselskim jaslama. Kak i seposod tak i tu v Živomo zido do svaje je došlo dok se je počel plen deliti. Plen jeden, mesto jedno, a trelo je zamastiti četeroje mostače i nahraniti štiri lačne, žene, željne i potrebne. To bi mogli jedino oni kaj so farbali tunela pre Svetomo Roko i to šesnaest pot.
Kaj bode itak s Živim zidom? A tak nam je lepo i veselo bilo dok so Pernar i družina (čitaj: Družba Pere Kvržice) speluvali huncvutarije v Saboro. Oni so se igrali demokracije, privučali so se na parlamentarizam, kak deca v prvomo razredo pučke škole prvi mesec dok so jiv ne navučiteli navčili da dok nastava traje unda ga ne igrače, pijače, spominki i španceranja. Da bi mi kak biračko telo drugoč zebrali ove z Živoga zida v Sabor unda bi oni znali da se morajo reda držati. Ali, pak te ali, jiv ga drugo leto več ne bode tak da si bodo mogli popevati ono staro pučko: bilo je lepo dok je trajalo. Saka sličnost z Laburistima je čistam slučajna. No, denemo šalo na strano, pak kaj je teh pet-šest jezer ojerov na mesec tak čuda vredno kaj se je restepla pajdašija v Živomo zido, očem reči, pak kakša je to pajdašija štero ojere moreje tak lefko i tak fletno restirati?
Se ostale stranjke i si drugi listeki so ruon tak pobedniki jerbo so oni došli na izbore kaj vidijo kak stojijo jive dionice na političkoj burzi tak da ve si ovi šteri so ne zebrani znajo kuliko vredijo. Jedino bi mogel reči da je Marijana Petir ne pobednica. Neje niti zgubila jerbo se je sama borila kaj bi znova odišla v Brisel i kaj bi tam nastajla delati za naše dobro kak je to i delala sa ova leta. A kaj se more, naše biračko telo joj je ne dalo potnoga naloga najbrž zbogradi jala. Nebre ona se meti kaj si splanera.
Dok se mi prinas spominamo gde bi nejrajši delali i živeli unda nejvečpot postanemo na Dojčlando. Tam je to se posloženo kak Božek zapoveda, tam se zna što kaj dela i kuliko. I ne sam to, za te svoj posel dobavlja i plačo. I to v ojerima, i to saki mesec. Denite roko na srce i priznajte kuliko pot ste šteli kaj bi Lepa naša bila tak vređena kak je to Dojčland? A ve so nam ovi zadji EU izbori otprli oči. Verjem da znate kak so se zemle članice EU mele izbore v isto vreme kak i mi i ve smo zazvedili kak so Švabi pravzaprav čuda vekši bokci od nas. Zakaj? Pak znate da ga nas v Lepoj našoj nekaj vejč od štiri milijone, a ovih v Dojčlando ga jiv nekaj vejč od osemdeset milijonov. Pitali me bodete zakaj vam to pripovedam pak to znajo i vrapci na žlebjako, štel sam vam reči kak so ovi v Dojčlando velki bokci. Najme kaj, mi smo v Lepoj našoj meli 33 listeke na šterima je bilo 396 političarov šteri so šteli iti v Brisel, a v Dojčlando ga bilo sam 12 listekov. Pak tu skorom nemaš kaj zbirati.
Po Vajdi se den pozna, to mi Međimorci več dugo znamo. Ali to je ne se, po Vajdi se ne pozna sam den nek i Čakovec, a i celo Međimorje. Nebrem reči da smo bili ruon veseli dok je familija Kokot (čitaj: Pivac) prevzela Vajdo jerbo to nam je bilo kak da nam je nešči nekaj zel, kak da nam je nešči spuknul zdravoga zoba z lampe. No, vreme je pokazalo da mi Međimorci znamo delati se za kaj se primemo, pak tak i svije hraniti, svije klati,svije predelavati, a i svije pojesti. To so i Pivci zazvedili, vidli ili pak jim je nešči rekel i bili so nam jalni kak mi Međimorci jemo nejbolše svinjsko meso pak so se oni pobrigali kaj dojdo sem k nam i dozidajo našo Vajdo tak kaj bodemo mogli hraniti i pol Evrope. Ak bodo jempot tjedno jeli. Nekaj sam mel za čuti da bode Vajda vozila to nejbolše meso i v EU parlament. Pivci so došli, zafalili so se Vladeko Mesaričo šteri je na leta držal Vajdo na dobromo glaso i za glavnoga menagera (kak to eu zvuči) so postajli Alena Kajmoviča. Alen se je prijel posla i se ide kak po žnorici. Hale se delajo, svije se kolejo, meso i se drugo se prodavle tak da ga več nega nikoga v EU ne šteri je nečul za Vajdo. Gospon Kajmovič je se posložil kak po žnorici, več niti svije ne cvilijo dok jiv kolejo. Pitajte bar sosede. I ne sam to, i odojki so dobili na ceni, pripoveda se kak je odojak enc A meso makar mo je mama bila prasica. Kaj reči, prek sto let se več Međimorje po Vajdi pozna, a ve pak se bode cela Lejpa naša poznala, kaj nam Evropo niti spominjal. Na redo smo ve i mi Međimorci, denite na stran se druge huncvutarije i počnite se baviti z odojkima, pajcekima, svijama, prascima, prasicama jerbo je to posel, a dok jiv odpelate vu Vajdo unda bodo i dobri penezi.
