Proslava „Oluje“ je još ne minula, neje se završilo v Knino. Neje gotovo dok sabornik – manjinac Srbin, Milorad Puovac Pupi, ne veli da je gotovo. Si znamo da je novozebrani potprecednik naše hrvacke Vlade manjinac Srbin, Boris Milošević, bil v Knino na proslavi 25. letnice vojno-redarstvene opreacije „Oluja“ i tam je govoril, pak je naš potprecednik i minister branitelja Tomo Medved moral vrnuti težaka v Gruborima pred par dni de je posle „Oluje“ sfondano šest srpskih civila. Tomo je obečal da bodemo, makar i posle 25 let, poiskali one šteri so to naprajli. Nemam nikaj protiv i ja sam za to kaj saki šteri je nekaj zahuzal, šteri je napravil nekaj kaj je ne smel za to mora odgovarjati, ali kak na jenoj tak i na drugoj strani. Vu ove dneve proslave „Oluje“ so se naši nikaj ne spominali z Srbima i Srbijom kaj bi oni poiskali što je sfondal 350 betežnikov z Vukovarske bolnice. 200 jiv je zakopano na Ovčari, a za one druge se niti ne zna (Srbi nam nečejo reči) kam so jiv hitili ili zakopali. Ve da smo si tak zdobra z Srbijancima trelo bi jim reči da je rat ne počel 4. augustuša 1995. leta nek čuda predi, na prtuletje 1991. leta.
Dvajstitretjega augustuša smo obiležili evropski Den totalitarnih (fašizma, nacizma) i autoritarnih (komunizma) režima. Javil se je Hrvoje Klasič jerbo se je čuda krivice kaj se komunizma dotikavle hitalo na Ljubičico Belo. Hrvoje je povjesničar i brzčas zna što je kuliko ljudi sfondal, očem reči, potukel. Zna on da je komunizam potukel za minulih 70 let vejč ljudi nek si rati i si režimi ,od postanka sveta do denes. On zagovarja Ljubičico Belo, a napada NDH i Paveliča, a Pavelič nema nigdi svojo vulico, a ratni zločinac Ljubičica Bela ima još hajdi svoji vulici po Lepoj našoj. Ne sam po Lepoj Našoj nek i prinas v Međimorjo. I to sam zato kaj je 1972. leta v Slavonskomo Brodo rekel da bode predi Sava tekla nazaj v Deželo nek bodejo Hrvati meli svojo državo. Da je ne hmrl još bi mi i denes bili sluge v Jugi!
Korona još navek hercuvle na hataro Lepe Naše. Hajdi turisti je došlo nabirat zraka i trošit sonce na ovo našo debelo vodo, očem reči, Jadransko morje, ali mesto kaj bi bili odnesli virosa od nas oni so ga k nam donesli i tu ga stajli. I te korona viros je nekši šegavi. Neče sikam iti. Morete ga najti sam na nekšim vekšim feštama i gostuvanjima, tam de se dobro je i pije. Čim je lepše vreme, čim nas je naš državni antikorona stožer pustil vum z hiži, vum z karantene, živimo kak da smo lanca ftrgli. Nikšega reda se ne držimo. Jempot si pozabimo masko deti, drugoč rukavice, tretji pot ne držimo razmaka, a nejveč pot unda (to vredi za moške) dok je kakša fajna i mlada ženska ritica pred nami… Žene se nejveč pot pozabijo dezinficerati kaj se nam moškima nebre pripetiti jerbo se mi preveč pot dezinficeramo , ali znutra. Nečemo kaj bi naše roke dobile vejč alkohola nek jetra. Moramo poštuvati jetra, pak več na leta nam služijo i kak jiv ve moremo na suhoma ostajti? Kak bilo da bilo tre posluhnuti stožera, bole to nek da nam korona poranjka na naša hižna vrata.
Korona i antikorona maske so me zmislile kak sam pred sedem let bil v Čavoglavima za Den pobjede, Den „Oluje“ na koncertlino Markija Perkoviča Tomsona, jegovoga kuma Mireka Škorija (unda so si još bili pravi kumi, očem reči, bili so si zdobra) i Mate Bulića. I ne sam tam bil sam. Z menom je bilo prek sto jezer Hrvatov i domoljubov z sih štiri strani Lepe Naše. Popevalo se, plesalo i feštalo globoko v noč, očem reči, črez pol noči, a dok smo se mi zadji reshajali več so kokoti kukurikali. Drugi den je v državnim cajtungima pisalo kak so policaji, med teh sto jezer ljudi, našli 5 (pišem: pet) dečkov šteri so meli črne majce z slovom „U“, spod pod tem velikim slovom je pisalo HOS i za dom spremni. Na to sam se zmislil pred par dni dok sam bil v jenaj našaj toplicaj de je bilo, osim mene, prek jezero ljudi. Si smo bili goli i bosi i namakali smo se vu vodi. Morem vam reči da sam videl nejveč 5 (pišem: pet) ljudi šteri so meli maske. Najbrž je korona de te den ne došla v toplice?
Ne bodete veruvali, ali je resnica ono kaj pišejo cajtungi. Negda se i jim trefi kaj napišejo istino. Najme kaj, resnica je da penzije idejo gori. Malo, malo pak penzije rastejo. Ali naši ministri se jako brigajo kaj se nej naši penzioneri obogatili i kaj jiv nej penezi pokvarili i zato onim penzičima (prostim težakima), šterih ga nejveč davlejo nejmenšo povišico. Tak bodo te, kaj tak rečem, nejvekši bokci dobili gori 2,oo kune (niti za jeno masko), a oni šteri ve več preveč imajo oni bodo i nejveč dobili. Zakaj? Oni so več privčeni i znajo kak tre gospodariti z velikimi penezi. Pak nešči mora popravljati prosjeka jerbo je minister zrečunal da bodo penzije išle gori v prosjeko 35,oo kuni. V one povlaštene penzije, štere v Lepoj našoj dobavla 178 jezer ljudi tu se nej štel mešati, očem reči, na bi se štel mešati de so, kak i da zaslužene!
V Središčo na Muri so se zbili lokalni političari: gracki večnik Jurica i lokalni precednik Sitnici Milorad. Nejpredi smo zazvedili da je Milorad napal Juricu i malo ga je skaramboleral. Jurica je pozval policaje, ali dok so policaji došli več ga Milorada ne bilo. Milorad se je oglasil prek pisma i po jegovomo je Jurica jemo potral lalovko. Nebrem nikak razmeti da on šteri je fasoval ne zove policijo nek zove on šteri je počel tučnjavo? I još si nekaj gruntam kak je čuda slabeši Jurica mogel potrti lalovko čuda jakšemo Milorado? Ili je to po onoj jako staro da je navek David jakši od Golijata. Zazvedili smo, a tak je i Milorad napisal, da so on i Jurica bili sami „v ringo“ i zato nebrem nikak razmeti de je Milorad unda videl ustaše?
