Od šteri penez se bodo zidala zabavišta ili pak stani?
Naši levičari i levičarke so protiv toga kaj bi mi v Lepoj našoj kupuvali reoplane ili pak tenke, a ruon tak i samohotke. Kaj če nam reoplani, kaj če nam tenki, kaj če nam puške, kališnikovi, kaj če nam se to pak mi živimo mam polek Balkana, a tu je navek bilo se mirno, a i Lepa naša je v NATO, a on nas brani od si nevoli. Si se znajo kaj jim se bode pripetilo ak bodo ratuvali protiv zemlji članici NATO pakta. To znajo si sam se nešterni pridržavlejo toga, a nešterni, kak napriliko naši sosedi Srbi, jiv se to ne dotikavle i oni delajo kaj sami očejo. Što Srbima kaj more, pak oni so i Turkima zobe pokazali pred nekaj vejč od šesto let na Kosovo makar so unda odišli po riti k meši i do dneva denešjega so ne došli k sebi. Puce na levoj strani vulice so pomalem zračunale kuliko bi se zabavišti moglo naprajti z penezima štere smo potrošili za francoske reoplane Rafale, a kuliko pak z oni štere bodemo potrošili na Dojčland tenke. Kuliko vidimo saki šteri zna računati more čistam lefko to zračunati, kak moški tak i žene. Znuomo da moškima čuda leži ide množenje i zbrajanje, a ženama djelenje i oduzimanje.
To smo čuli i to smo rešili, a štel sam pitati kuliko bi se zabavišti dalo naprajti od tri milijonov ojerov šteri so poslani v kaso Milčijo Pupovco kaj bode zidal kulturne centre i to vu sakomo malo vekšemo seli de živijo jegova bratja. Za tenke je zrečunala Ivana Kekin, a za kulturne dome bode, najbrž, Sandra Benčič jerbo je ona nejduže hodala vu škole. Nebrem vam točno reči kak joj je išla matematika, očem reči, računica od roke jerbo se je diploma z ocjenama negdi zgubila na poto od fakulteta do sabornice.
Naš grad daruje penzionere za Božič, pak ak nešči oče penzinera za Božič nek se javi v gracko upravo!
Kaj je sfondalo Vilija Beroša, korona ili pak “Mikroskopi”?
Nebremo reči, istina je, Vili Beroš je bil minister šteroga so, ne tak zdavnja, dok je korona hercuvala si falili i to tak fest kaj si je Sveti otec Papa več počel premišlovati kak bi ga proglasil svetim kuliko je “dobroga” napravil za nas i naše sosede Hrvate. Kak znuomo, mic po mic, korona se je nekam preselila, a minister Vili je furt i navek bil na meti opozicije i jega so nejveč pot mejali. Ne znati zakaj ga je precednik AP ne dal i dale ga je držal kak malo zdraviča na junačkoj desnici. Svi su “veruvali” kak je Vili pravi čovek na pravomo mesto. A tak je i precednik AP rekel, a dok on nekaj veli unda je to istina o šteroj se ne raspravlja. Ali kak i vu sakoj lepoj priči (čitaj: bajki) semo jenoga dneva dojde kraj pak je tak bilo i z našim Vilekom. Nišči je ne računal na Iveka Turudičovoga, glavnoga državnoga advokata i kak je on stiha došel i počel delati svojega posla zbog radi čega je i postavleni i to mimo naši levičarov, šteri so se postavljali na zadje noge i to skupa s Zokijom Milanovičom. Najbrž je Ivek jako dober čovek i k tomu još je ne zlopamtilo, očem reči, neje nejpredi presorteral ove na levoj strani vulice nek je mam prešel na drugo strano i kak se je pokazalo da so tam čuda vekši grešniki. Kak smo vidli, Vilek je jako visoko namanđeral tak da ve dok je opal je čuda bole zružilo. Ne znati je li je nekaj kriv? On veli da je ne! No tak si velijo, tak je rekla i soseda Barika ali se je pravica skozala črez devet meseci. Tak je i Vili, predi nek je nekaj ftegnul reči završil na kvarteljo v Remetinco pre svojemo negdašjemo stranačkomo pajdašo Ivijo Sanadero. Vili je bil v Remetinco 4-5 dni dok so minoli oni mrzleši dnevi, a čim se je sneg restopil Vilija so pustili dimo. Kak da je ne nikaj kriv. Bil je dosti dugo kaj ga je premijer Drašek ftegnul zmeniti.
Čuda bole da so Vilija pustili dimo kaj nam ne bode v rešto stroške delal kak Sanader, šteri je po reštima več petnaest let, a neje vrnul oni deset milijonov ojerov kaj je dobil kak mito. Priznal je da je dobil i ostavil jiv je doma. Čudna nekša pravica!
Duže sam ja bil v kazni dok je japa došel z roditeljskoga sastanka nek je Vili bil v Remetinco!
Neje lefko biti lider, kaj ne bodemo spominjali elito
Saki od nas ima nekšo svojo listino na šteroj so zapisani oni šteri nejveč vredijo i štere nebremo nigdar, pak niti unda pozabiti. Tak smo minuli tjeden v našim novinama čitali o liderima šteri so, črez stoletja, zadužili Međimorje i nas Međimorce. Čistam bi bilo čudno ak tu ja ne bi mel nekaj za zgombati. Morem vam reči da mi je malo čudno da smo od Nikole Šubiča Zrinskoga našega hrvatskoga Leonide i branitela Sigeta skorom štiristo let ne meli nikoga šteri si je zaslužil kaj bi se o jemo nekaj reklo ili kaj bi se ga bar spomenulo. No, rekel sam več, saki od nas ima nekšo svojo listo, svojo elito i svoje favorite. Napriliko ja se ne slažem kaj tak čuda falimo Ivija Novaka z Macinca, a on je k nam v Međimorje dopelal srpsko žandarmerijo mam drugi den čim so naši braniteli oslobodili Međimurje na Badnjak 1918. leta, a nišči niti ne spomene fratra Kapistrana Gecija šteri je skupa z svojim pajdašima plebanošima i župnikima 9. januara 1919. leta dozval na Fratarski trg prek deset jezer Međimorcov, šteri so aklamacijom dali svoje glase za to kaj se Međimorje pripoji matici Hrvackoj. To sreča je ne dugo trajala jerbo so Srbi fčasi pokazali svoje pravo lice, a mi Hrvati smo odišli po riti k meši kak Radičove goske v megli. A kaj ne bodemo pitali što nam je pretiral gospodarstvenike Židove z Međimorja?
Nesmo niti spomenuli našega prvoga međimorskoga župana Marijana Ramuščaka jerbo da smo jega ne meli ne bi meli niti županijo, a brzčas bi nam Štrigova bila odišla za sneho v Deželo skupa z Raskrižjem. Bez njega Prilok i Središče nikdar, pak niti unda, nej bili gradi.
Jedini problem nas penzionerov je kaj nemamo niti dneva dopusta!
