Pak se je još jempot pokazalo kak vreme leči se rane. Najme kaj, Ivo Sanaderov naš negdašji premjer, šteri več na leta ima svojo kancelarijo v Remetinco i odnod se zapikavle v politiko, je ne mel srečo i sam on je dobil rešta za to kaj se je v Planinskoj vulici zrušila hiža. Nejpredi je za to bila kriva cela pajdašija, očem reči, Ivo i jegovi pajdaši. Ali kak so cajti pomalem sprehajali tak je jegova pajdašija bila se menša i menša, očem reči, pajdaši so spremenili Ivijove drese i odhajali so igrat za ove šteri so jiv tožili. Tak je na krajo na klupici za krivce ostal sam Ivo, a si jegovi pajdaši so bili na drugoj strani i z prstom so kazali na Ivija kak na jedinoga krivca. Kak ovi v Jeruzalemo na Jezuša. Jegovi pajdaši so se dospomenuli z tužibabama i za svoje grehe so „odgulili kalampera“ leto dni, a Ivo je ostal sam i još so mo kcoj deli leto i pol rešta tak kaj ne bode prefletno zišel na svetlo dneva i na friški zrak. Takši so vam naši soci: Ivo je kriv, šteri je nutri metal, a ovi kaj so vrečo držali so si, kak Poncije Pilat, oprali roke. Kaj god, ve, na se zadje, lopova imamo, a penez nigdi. Najgerek sam, jako sam najgerek, što je hasnuval ono kaj je bilo vu vreči je li of šteri je nutri metal, ovi kaj so vrečo držali ili pak nešči tretji. Kuliko vidimo mi „građevine“ Lejpe naše bodemo pak odišli po riti k meši i pak bodemo ostali brez sega. Da bode se jempot pripetilo da bodo tati vrnuli ono kaj so hasnuvali, očem reči, kaj so želi tam de so ne sejali.
Saki den nam je se bliže den da bodemo išli glase davat za EU parlamentarce. Te den bode drugi mesec mam posle godovna svetoga Vrbana. A znate kakši smo mi Međimorci posle Vrbanovoga, spametni kak vrag, očem reči, nejspametneši. Na listekima i slikama ga 11 Međimorcov kaj znači da mi Međimorci nebremo popuniti sa mesta v EU parlamento jerbo je tam za Lejpo našo stavleno 12 fotelji tak da bode zebrani i jeden šteri je ne Međimorec, a to bi mogla biti Ruža Tomašič ili pak Marijana Petir. Zakaj jena od dve žene? Zato kaj mi Međimorci malo slabo stojimo s ženskama v politiki. Nekaj si gruntam da je to spametno kaj smo jeno mesto ostajli našim prvim sosedima prek Drave, kaj ne bo zišlo da smo mi Međimorci pohalosili se kaj se je nudilo. A zakaj ruon mi Međimorci pemo v Brisel? Jerbo smo po semo nejbolši, nejlepši smo brzčas ne, ali smo nejbolši stoprocentno, pak je unda več jempot red da nejbolši pejo v EU kaj bodo i si drugi z Evrope vidli kak zgledijo, kak živijo, kak delajo i kak šparajo nejbolši ljudi v EU. I Evropa bode precvela dok mi dojdemo v Brisel!?
Penziči so pak došli na svoje, fljučnuli so v šake i znova genuli v dero. Pak delajo i onak usput si popevlejo: u boj, u boj za koruzni kruhek moj… Kaj reči, mi jif nucamo kak težake, a oni si malo prekratijo vreme, vidijo da so još ne za fkrej hititi, a i nekše kunice se dotepejo v žep. Kaj ga vejč kuni v žepo leži se diše i bole se živi. A i ne sam to, japice i mamice imajo nekše kunice kaj morejo i vnukima nekaj kupiti, nekaj slatkoga i čokoladnoga kaj jiv bodo vnuki i vnukice rajši meli. A kuliko sam mel za čuti, nešterna kunica bo se i na penziji poznala. Ne nekaj čuda, ali zrno do zrna pogača, kunica do kunice liter i voda.
Otpral se je novi Dom zdravja v Čakovco, glavnomo grado naše Međimorske županije, tak da so ve si doktori na jenomo kupo. Lepo i dobro. Se je vredo sam betežniki morajo dohajati k svojim doktorima pešice ili pak z peciklinom jerbo aute nemajo de ostajti. Pak je to bormeš vredo, kaj se pravzaprav betežniki imajo voziti z autima? Ak je nešči betežen unda se nek i tak betežno ponaša. Tak fest je ne nišči betežen kaj nej mogel peške iti, i ak zaprav nebre iti peške unda se nebre niti z autom pelati. I dok se takši nekši hudi beteg pripeti unda si moremo naručiti taksija. Bar ga taksijov dosti prinas v Čakovco i v Međimorjo. Škoda sam kaj v Dom zdravja ne muoči dojti z Svetojelenske ceste jerbo ak je čovek jako betežen unda ga niti taksi nebre dopelati do doktora nek sam do potne lese. Dok se več delalo nekaj tak lepoga i dobroga unda je trelo meti na pameti i betežnike šteri so fest i zaprav betežni i hiravi tak da nebrejo hodati. Kaj smo čineči? Moramo nabajti kolca, taksi kolca, z šterima se bodo vozili takši betežniki od potne bolničke lese do doktora. Moramo nekak dojti do doktora ak očemo kaj nam on vrne zdraviče štero smo potepli ili pak zahuzali!
Glas naroda (čitaj: „građevina“) je zastavil ove komunalce z motornaj žagaj kaj ne bodo več rušili drevja po čakoskomo grackomo parko. Rekel je i gracki načelnik, Štef Kovačov, da je dosti bilo rušeja i žaganja. Nekaj me gvinta, moj črvek mi ne da mira i furt me spituvle: je mortik još ostalo štero drevo za podrti ili pak so se podrla sa dreva stareša od 60 let. Kaj se čudite, pak so ljudi z 60 let za penzijo, a ne kaj ne bi bile dreve za zrušiti. Ne starijo sam ljudi, i drevima vreme, očem reči, leta ido. Bodo opče mele veverice dosti drevi kaj bodo skakale z kite na kito? Ak se vrane ne bodo mele kam skriti bodo se oteple z Čakovca. Sam nam još tre tua sramota kaj bodemo brez vrani ostali. Znate da so vrane črni ftiči pod zaštitom (si črni so pod zaštitom) i na jiv moramo paziti jerbo saki den morajo biti se na brojo. Negda je saka vrana mela svoje drevo, a ve dok so dreva odišla po riti k meši, najgerek sam što bode v parko otpral radionico kaj bode paril vrane. Znuomo da vrana vrani oče ne kopa, ali ruon tak znamo da saka vrana neče z sakom kvartelja deliti. Probajte se to pregruntati kak bi to zgledalo, očem reči, kak bi se to čulo da bi se vrane počele sfaditi. Ne sam kaj „građevine“ polek parka nej mogle to zdržati nek bi vrane i veverice najbrž pretirale.
Dotepel se je kineski premijer Li k nam v Lejpo našo. Došel je pogledati kak se ponašajo jegovi težaki šteri delajo Pelješkoga mosta. A unda dok je več bil tu malo se je pospominal z našim precednikom (svojim pajdašom) Plenkijom o tomo kaj bi mi mali mogli delati z velikom Kinom. Štel je precednik Li znati kak i od čega mi živimo v toj maloj, ali Lepoj našoj? Se mo je bilo lepo i dobro kaj je videl sam je pital de so nam ljudi, kaj so na urlabo kaj jiv je tak malo seposot kam dojde. Ne znati je li je naš precednik Plenki priznal svojemo kineskomo pajdašo da mi Hrvati imamo dve (nejmeje) države, jeno (menšo) tu doma, a drugo (vekšo) po celomo sveto. Kak bi Lejpa naša bila velika da bi seposot de živi jeden Hrvat bila Hrvacka? Znamo da se naši ljudi najdejo v Osterajho, Dojčlando, Švicarskoj, Irskoj, Šveckoj, Ameriki, Čileu, Argentini, Peruu, Australiji, Afriki, Aziji, Rusiji, a jega jiv i v Bosni…, kaj nem dale nabrajal. Verjem da si je kineski precednik probal deti v pamet kakša bi stiska bila da bi se obedve Lejpe naše našle v isto vreme na našemo hataro. On je navčeni na stisko, ali smo mi ne.
EU labodoritaši završavlejo Ligo prvakov. Od osem klubi šteri so ostali do ovoga tjedna nišči se je ne nadjal kaj bi taljanski Juventus mogel zgubiti. Ali kaj se je niti babi ne senjalo to se je pripetilo. Ajaksi so pobedili „Staro damo“. A zakaj? Zato kaj je naš Manđukić ne igral. Mislili so Talijani da morejo se kaj očejo i to brez nas Hrvatov!? Ali neje išlo, neje Kristiano Ronaldo bil dosti. On je zabil jenoga gola, ali je Manđukičov drugi falil i labodoritaši Juventusa so odišli po riti k meši. Nek znajo kuliko mi Hrvati vredimo!!!
Na leta smo se hecali za prvi april kak so gracki komunalci zeli doli Orla kaj mo pafarbajo jejci za Vuzem i to smo tak dugo pripovedali kaj je ovo leto to postalo istina. Ovo leto so pravzaprav zeli doli Orla i to za Vuzem! Orel je odišel na predelavanje, a jejci na farbanje.
Pred nami je Vuzem nejvekši katolički svetek. Srečnoga i blagoslovljenoga Vuzma vam želim, kaj ga dočakate i sprovedete u miru, ljubavi i razumijevanju skupa z svojima najdražima. Pazite na šunko, nikaj se ne bode pripetilo ak bode stala par dni, ne tre se pojesti jeden den. I Vuzem ne traje sam jeden den, pak unda se niti šunka ne mora potamaniti tak fletno. Vuzmeni pondelek je svetek šteri ide k Vuzmo pak kaj se vam nej pripetilo kaj bi vam za te svetek stol bil prazen, očem reči, brez šunke.
