Nejglavneše je biti prvi, a ne nejbolši!

Kaj je glavneše popevaje ili pak labodoritanje?

Poglednite ve na kaj čovek, kak napriliko ja, dojde kaj si nebre pregruntati kaj je glavneše za nas obične smrtnike je li je to labodoritanje ili pak popevanje, očem reči, Eurosong. Najte me krivo razmeti, ali nebrem si nikak pregruntati kakše itak veze ima te Eurosong z popevanjem? Najme kaj, velijo da se na tomo Eurosongo zbiraju nejlepše pesme oliti nejlepša pesma Eurovizije, a morem si z čistoga mira deti roko na srce i reči kak sam ne čul niti jeno pesmo ak zememo fkrej ovo našo Rim tim tagi dim štero je popeval naš Markec Purišičov oliti kak se je za te Eurosong nazval Baby Lasagna. Kaj ne bodete rekli kak drukam za našega Markeca, ali ovo se drugo je bilo još huje nek negda v Revici, pre pedeset let, na Maloj selskoj priredbi. Ne sam kaj sam ne prepoznal niti jeno pesmo nek nebrem niti razmeti za koga se itak te Eurosongi slažejo, komo te tam hopšejo i koga predstavljajo. Ne bodem vam zameril ak se bodete z mene norca delali, ak bodete rekli kak se ne razmem v mužiko i popevanje, ali ak so to nejlepše pesme v Evropi, očem reči, na Euroviziji unda sam srečen kak mali Ivek kaj se ne razmem v mužiko.

Ne moram vam niti pripovedati kaj sega se je moglo prečitati na sakefele stranicama Interneta, bokček Internet kaj se mora zdržati, a za vas sam zebral dva štiklece:

  • Hrvati, bodite srečni, čuda bole je biti drugi v hlačaj nek prvi v šoseko!
  • Hrvateki, čestitamo vam, osvojili ste prvo mesto v moškoj konkurenciji!

Labodoritaši Reke so ruon tak nejbole igrali

Mi znamo, a i si drugi tak prepovedajo da je naš Markec, naš Baby Lasagna nejlepše i nejkredneše popeval, ali je na se zadje ipak osvojil odlično drugo mesto. Se vam je čistam isto i med našim labodoritašima. Si se slažejo kak so “Beli ftiči” kaj bi rekli Hajdukovci sikak kanili biti prvaki Lepe naše ovo leto, hajdi penez so potrošili, ali so na se zadje odišli po riti k meši jerbo so jiv nejpredi Rečani, a posle i Dinamovci ostajli na prvoligaški lojtrici. Ve več si znuomo kak so Dinamovci pak prvaki i to več dvajstipet pot, Reka je mam do jiv, a Hajdukovci so na tretjemo mesti kak i sako leto. Koga bodete god pitali saki vam bode rekel kak je ovo prvenstvo Reka igrala nejbole i nejlepše, ali so Dinamovci osvojili nejveč bodov. A v labodoritanjo je još navek tak da je prvak on šteri osvoji nejveč bodov, a ne on šteri nejbole igra.

Ve vidite saka sličnost z Eurosongom je čistam slučajna: neje važno kaj je naš Markec nejlepše popeval i kaj je mel nejlepšo pesmo, ali je prvi bil Švicarac Nemo šteri je dobil nejveč glasov stručnjakov. Neje pomoglo niti to kaj je publika drukala za našega Markeca jerbo struka je navek napre pred publikom, šteli mi to priznati ili ne.

To sam vam več napisal pred pol leta: da bi publika odlučivala Hajduk bi bil prvak jerbo na jegove utakmice dohaja nejveč kibicov. Neje pomogla publika, a neso pomogli niti stranjski soci. Drugoč bo najbrž bole. Hajdukovci to pripovedajo i tomo se nadjajo več dvajsti let!

Drašek je prvi nabrojil do sedemdesetšest…

Dok bodete ovo čitali prvi zestanek novih sabornikov zebranih na izborima pred mesec dni več bode za nami. Čim so izbori minuli, čim so se prebrojili glasi i čim se zazvedilo što je dobil kuliko sabornikov mam se je počelo brojiti do sedemdesetšest jerbo 76 je broj roki štere nuca v Saboro on šteri oče biti premijer, očem reči, precednik Vlade i zeti vu svoje roke cugle vlasti i državno kaso v Banskim dvorima. Si več znuomo da je prvi došel do broja 76 i ne sam do 76 neg i do 78 dofčerašji premijer Drašek Plenkovičov. Ruon tak znuomo da je to on ne mogel sam naprajti jerbo jegov HDZ-e je uspel dobiti sam 61. sabornika, a to je čuda meje od 76, no kcoj so svoje roke donesli i saborniki z Domovinskoga pokreta, a i nacionalne manjine. Vi več znate što je novi precednik Sabora i što so novi ministri štere so novi saborniki zebrali. Štel sam vam sam reči da so Zoki Milanovič, Peđa Grbin i jiva pajdašija, na se zadje, ipak priznali da so zgubili izbore, ali ne predi dok je Drašek ne predal Zokijo te pušlek od 78 roki. Kaj vam bodem rekel, biračko telo zna da je Drašek ne bil kak treba, ali of potok pravice je bil preslab i neje nudil nikaj bolšega tak da je biračko telo dalo Drašeko još jeno šanso. Toplo se nadjam, kak i si mi, da bode Drašek to skoristil i da ga ne bodemo morali šinfati kak smo to delali minule štiri leti. Istina božek, da smo čistam kredno živeli, ali smo ne bili zadovoljni i šteli smo kaj bi nam bilo još i bole. Zna Drašek kaj i deje zahuzal pak ga prosimo nek to več ne dela!

Grad i županija rokometa

Lanjsko leto je naša Međimorska županija bila evropska regija športa i unda so nam naši labodoritaši ispali z tretje vu štrto ligo i do dneva denešjega so se ne oporavili, očem reči, ne so k sej došli. Nebrem razmeti kak mi vu tem našem malom Međimorjo nebremo na kup nametati se nejbolše labodoritaše i kaj bi unda meli labodoritaškoga kluba bar v Drugoj ligi ak smo si več ne zaslužili kaj bi ga meli vu Prvoj? Kuliko vidimo labodoritaši nebrejo, a rokometaši morejo pak si nekak gruntam da bi rokometni težaki mogli navčiti ove šteri delaju z labodoritašima kak se to dela. Poglednite, napriliko, ženski rokometni klub, očem reči, Zrinskice več na leta igrajo v Prvoj državnoj ligi i ovo leto so osvojile tretje mesto tak da bodo igrale i vu Evropi, a rokometaši Čakovca so ovo leto osvojili prvo mesto v Prvoj državnoj ligi tak da bodo drugo leto igrali v Premijer ligi. Kak morem moram pofalil i jene i druge i rokometaše i rokometašice, a i rokometne težake, šteri so pomogli igračima i igračicama kaj bodo tak dobri ili pak nejbolši vu svojim ligama. Mi Međimorci se navek falimo kak nam je labodoritanje nejvažneše posle jesti i pijače, a ve ispadne da smo čuda bolši v rokometo. Si priznajo da nam falijo pamet i penezi. Najbrž, čim zazvedimo kaj nam bole fali unda bodemo i čuda dale došli.

Ostavi komentar

Povezani članci

Ostanimo povezani

49,208FanoviLajkaj
608SljedbeniciSlijedi
0PretplatniciPretplatiti

NAJNOVIJE