Dofčerašji minister za glavno državno kaso i se državne peneze (tu se ne računajo črni fondoši i zmazani, očem reči, neoprani penezi) je fpešal posle šest let otkak je kormanil z brodom šteri je črez se bure i oluje prevažal, potepal i restepal državne peneze. Zdravkec odhaja, kak veli teca Franca, dosta mo je sega. Toplo se nadjam da je ne odišel zbog radi penez kak je to naprajlo hajdi ministrov šteri so odišli predi jega, a došli so posle. Hajdi ministrov šteri so odišli so svoje ostavke davali na porti ili pak v upravi nejvekše odgojno-obrazovne ustanove Lepe naše, v Remetinco. Dok je Zdravkec vedril i oblačil z našom državnom kasom i z našim državnim penezima nekak smo bili sigurni da te naš državni brod (čitaj: Lepa naša) ne bode potonul, ali malo, malo pak se je zazvedilo da si je nešterni minister pretovaril državne kune na svojo privatno brodico i odišel je na pot bez voznoga reda i bez potnoga naloga, a neso si meli pečata „ministarstva“ z Remetinca. Mogoče da je to prelijalo Zdravkecovo kupico strpleja, drugi so vozili, a on je bil kriv dok so penezi falili. Mortik je, a mortik pak i ne? Što zna, najbrž bodemo jenoga lepoga dneva, dok bode fest dežđ curel, zazvedili što se je ili kaj se je Zdravkeco zamerilo i kaj ga je stiralo kaj je spraznil svojo ministarsko foteljo. Ili pak je pravzaprav državna kasa ostala prazna??
V Zagrebo se bodo i dale deca delala!!!
Visoki upravni sod je rekel, i to v ime familiji, da bodo japeki i mamike v belom Zagreb grado mogli i dale biti odgajateli i za to bodo dobavlali peneze z gracke kase, ali sam unda dok ga za deco ne bode mesta v jaslicama ili pak zabavištima. Čim se to zazvedilo mam je gracki načelnik Tomek Tomaševičov v zrak skočil, a žnjim i jegova pajdašija šteri se „Morejo“, ali sam tak dugo dok nemajo v rokaj cugle vlasti. Žnjimi so v zrak skočili i si oni šteri potpirajo one šteri se „Morejo“, a križajo se z levom rokom. Tomek se je zgovarjal kak v gracki kasi nema dosti penez za te odgajatelje i soci so se malo curiknuli. No, dok so zazvedilii kak Tomek ima dosti penez za antifašiste i povorke ponosa (čitaj: pedere i lezbače) unda so ga soci ostajli nek zmore i za deco i za odgajatelje. Ili bode Tomek zmogel penez ili bodo znova zagrebečki purgeri hodali glase davat i zebrali bodo nekoga što bode zmogel peneze za ono kaj je Zagrebo i Zagepčancima nejglavneše. A to je kaj ne bodo zagrebečke hiže i zagrebečke škole prazne.
Nekaj je ipak čudno v Lepoj našoj!?
Nekaj je ipak čudno v toj Lepoj našoj šteli mi to priznati ili ne. Najme kaj, retko šteri mesec mine kaj ne dojde na svetlo dneva nešterni kakši takši političar kaj je posegnul v državno, županisko, gracko ili pak opčinsko kaso i kaj si je napunil žepe prek sake mere. I ne sam to, nek smo zazvedili da ne kradejo sam jeni nek i drugi, pak i tretji, očem reči, retko što zdrži kaj ne posegne za pogačom prek kruha ak mo to prilike dopuščajo. Ak denemo roko na srce bodemo morali priznati da kradejo si, tu se i teca Franca slaže z menom, a več hajdi dugo se pripoveda, i to seposod od mlekare, prek čehare, pijaca i novinarov, kaj nem rekel medijov, kak so lopovi sam HDZ-eovci. Mortik je jiv nejveč, mortik oni nejvečpot imajo priliko, ali ne moramo se druge skrivati, a jiv sam „faliti“. Lopov je on šteri jemle ono kaj je ne jegovo, a ruon tak i on šteri vrečo drži i neje opče važno kakšega dresa nosi.
Čakom i z Šenkovca vozi smetje
Neje čuda vode preteklo spod pod mostom na Trnavi otkak je dofčerašji precednik čakoskoga Grackoga veča Darko Zver odišel po riti k meši, očem reči, gracki večniki so ga zmenili tak da je več ne na vlasti nek je prešel na ono drugo strano i to v opozicijo, a več se nekaj isto takšega pripetilo v prvoj opčini do Čakovca, a to je Šenkovec. Tam je do pred par dni bila precednica opčinskoga veča gospođa Ruža Sermek. Pred cirka mesec dni joj se jena partija SDP-e nekaj zamerila i ona jiv je ostajla. Da si je ne dobro pregruntala dok je to naprajla zazvedila je na zadjemo opčinskomo večo da so jo zmenili. Nišči je ne rekel zakaj so to naprajli, šteri je jeni greh, ali so na jeno mesto zebrali drugoga večnika. Šteli mi to priznati ili ne, ali kotač sreče se još navek obrče tak vidimo da se nešterni vjutro stanejo i još so na vlast, a navečer idejo spat kak opozicija. Neje lefko denes biti niti selski, očem reči, opčinski političar.. Darko Zverov nam je rekel da je jega z precedničke fotelje zmenil Čakom, gospođi Sermek so ne nikaj rekli, ali si znuomo da Čakom vozi smetje i z Šenkovca.
Črez fkajuvanje se nejleži do penez dojde???
Hajdi let je trelo kaj je naše međimorsko koščično olje došlo na dober glas, a neje dugo trelo kaj so šverceri počeli prodavati ljucko črno olje pod naše. Kaj reči, dečki so se jako dobro zmislili, nabavili se hujše koščično olje od našega međimorskoga i još so ga malo rezredili, ali so zato doma, v domačoj tiskari, naštampali originalne etikete i došli so prodavat tak predelano črno olje na čakoski pijac. Nebrem veruvati da so dečki došli ruon v Čakovec de se ljudi razmijo v koščična olja i znajo kaj je to pravo, a kaj pak je ono s falingom. Dečki so si pregruntali da Čakovčanci i Međimorci verjejo se ono kaj piše na flaši. Ali kuliko vidimo neje se tak zišlo kak so si pregruntali, nabrž so ne vupali oditi vu Varaždin jerbo jim tam preveč dobro poznajo. Znate, i to od negda, da je ne se istina ono kaj piše jerbo je več zdavnja na potnim blanjkama pisalo pi.ka, pak je Imbra, dok je išel dimo malo preveč alkoholno zmočeni, porinol venoga v lukjo od sovoja i naskalil si je venoga. Tak so i varaždinski dečki z čakoskoga pijaca z „međimorskim“ koščičnim oljom odišli po riti k meši i završili na sodo.
