Verjem da se zmislite, kak da je bilo fčera, da so na se štiri strane sveta v čakoskoj varoši zrasli velili, kaj veliki, nejvekši plakati kak se v Čakovco pojavila zver štera se bode utrkivala za čakoskoga gradonačelnika. Zazvedili smo črez kratek čas da so to zver našli dečki i puce z Fokusa, a to je bila nova stranka na oblačnomo čakoskomo političkomo nebi štera je obečuvala da bode te oblake restirala i da je pred Čakovčankama i Čakovčancima čuda svetleše, vedreše i čuda bolše političko zutra i to sam unda ako bode čakosko biračko telo svoje glase dalo stranki Fokus i jivomo nositeljo liste i kandidatlino za čakoskoga grackoga načelnika Darkija Zvera. Kak so Darko i Fokus hajdi toga obečuvali tak je i čakosko biračko telo hajdi pušleki svojih glasov dalo Darkijo. Kaj reči, Darko je dobil hajdi glasov ak v pamet zememo to da je prvi pot priznal pred Božekom i ljudima da bi i on štel biti čakoski gracki načelnik. Dobil je hajdi glasov, ali ne dosti tak da je ipak ne postal čakoski načelnik, ali je dosti glasov nazobačil za precednika čakoskoga Grackoga vječa.
Se je to bilo dobro i Darko je kormanil z čakoskom grackom šajkom leto dni, a unda se je nekomo zameril med čakoskim smetlarima, očem reči, komunalcima i počeli so spominki o tomo kak Darko makar je on ne mala Zver, ali da on brenza napredak čakoske varoši i da tre iskati novoga bolšega „kapetana“ gracke šajke. Znate več kak je to, dok jempot počnejo spominki na mlekari ili pak na čehari unda je teško spasiti šajko štera se je pomalem počela puniti z vodom, točneše rečeno šajko bodo spasili ogjogasci, ali brzčas bode „kapetan“ šajke odišel po riti k meši. Znate i sami dok se v cajtungima po celoj stranici raspisal direktor komunalcov i jegov pajdaš čakoski vodeči esdepeovac da je to ne zabadav i nekomo bode odzvonilo. Kaj si vi, prosim vas lepo, gruntate što bi to mogel biti?
Nesam znal da komunalci vedrijo i oblačijo?
Morem vam reči da sam do pred dva – tri tjedne ne znal da težaki, i to komunalci oliti smetlari, mejajo političare? Do ve je navek bilo da so političari mejali težake kak one v direktorskim foteljama tak i ove na porti, a ve najempot se je kotač sreče počel obračati v drugo stran. Nekak si gruntam da bi si oni gradi i se one opčine štere imajo svoje komunalce, svoje smetlare morajo paziti kaj ne ostanejo bez svojih načelnikov ili pak precednikov grackih ili pak opčinskih vječa. Znate kak je to dok komunalci zazvedijo da i oni morejo zmeniti političare i to takšo Zver kak je precednik čakoskoga Grackoga vječa što jim bode stal na rep?
Međimorje se je još jempot skazalo
Kaj bom vam rekel, ne pripovedam i ne pišem zabadaf da prinas na falačko zemle med dvemi vodami još navek rastejo, krstijo se, pretačejo i pijejo nejbolša vina na sveto. Naši vinari i naša vina pak so se skazala na Dekantero v Londono. Verjem da znate da je London glavni grad Engleske, a Dekanter je nejglavneši festival vina na sveto i oni šteri imajo nejbolša vina pošiljajo jif v London po ocjene. Tak je bilo i ovo leto, a morem vam reči da so se naša međimorska vina vrnola z Londona z pušlekom želenciji. Ve pak smo mi Međimorci v problemima: zna se da mi imamo nejbolša vina na sveto, ali šteri naš vinar itak ima nejbolša? Teško je to reči jerbo znate kak smo mi Međimorci špuravi i ne verjemo nikomo nek očemo sami sprobati i unda poslati ovima v London svoje mišleje. Verjem da je tak i vredo, pak mi šteri znamo de to nejbolše vino raste unda moremo reči štero je pravzaprav nejbolše. Ve vi očete kaj bi ja rekel, pak bi se unda zameril nešternomo našemo vinaro? Ne, nebom nikaj rekel, lefko oni v Londono velijo šteri je jim nejbolši, a to ne mora biti točno da je to isto vino i nam Međimorcima nejbolše. No, čim so Englezi rekli kak mi Međimorci imamo dobra ak ne i nejbolša vina na sveto unda jim mi moramo mam priznati da se oni razmejo vu vina makar se negda delajo Englezi.
Več je Čiro ne trener sih trenerov??
Morem vam reči da nemam nikaj protiv našega velikoga i hajdi dugo nejbolšega trenera, ali morem ve slobodno (bez zamere, prosim) reči kak je Miroslav Čiro Blaževič več ne naš trener sih trenerov. Zakaj sam si tak pregruntal? Si znamo da je zdavnja, 1998. leta na Sveckomo prvenstvo v Francuskoj Čiro z našim labodoritašima (Ladič, Boban, Šuker, Prosinečki i pajdaši) osvojil tretje mesto i brončano želencijo. Od unda je Čiro postal trener sih trenerov. Si znamo da je izbornik i trener naših Vatrenih Zlatko Daličov, pred štiri leti, osvojil srebrno želencijo na Sveckomo prvenstvo v Rusiji i došel je čistam blizo kaj postane trener sih trenerov. Makar je Daličova želencija vredneša od Čirijove, ali Čiro je bil prvi i prvi je odofnal leda prema velikim sveckim uspehima naših labodoritašov. Istina je jena i to moram vum reči, Čiro je v polufinalo zgubil od Francozov, a Zlatko je ruon tak zgubil od Francozov, ali vu finalo. Štiri leti je minulo otkak so nam Francozi „fkrali“ zlatno želencijo, ali ovo leto je i Zlatko došel na svoje i pobedil je Francoze v Ligi nacija i to v Parizo. Kaj reči, to je bila kaplja štera je prevagnula na Daličovo strano kaj on postane trener sih trenerov. Čim je pobedil Francoze i to na jivomo igrališčo, na jivoj travi i zato verjem da si je Zlatko to zaslužil. Pak morali smo jempot i mi odigrati našega međimorskoga čardaša Francozima. Ve vidijo kak je to plesati dok jim nešči drugi igra!!!
Posle kak so Vatreni „zeli mero“ Francozima šepetuji se i to se glasneše i glasneše: Veli Benzema: – Mene je Božek poslal na of svet kaj bodem nejbolši golgeter na sveto. Na to se javil Mbape: – Mene je Božek poslal kaj bodem nejbolši labodoritaš na sveto. Dok je to čul naš Luka Modrič javil se je i on: – Dečki…nesam ja nikoga poslal!
