Neje hajdi cajta minulo od kak je došlo do kraja Svecko rokometno prvenstvo za dečke tak da se još si dobro zmislimo kak so naši dečki odišli po riti k meši, očem reči, neso došli do oni utakmici posle šteri se delijo pehari i želencije. Verjem da si znate kak so nas, kak mi Međimorci to lepo velimo, mam odkraja prečitali Egipčani, i to ne sam prečitali nek so nam i očitali „bukvico“ i to tak kaj smo se drugi den si spituvali pokaj smo opče mi, očem reči, naši Kauboji išli v Švecko? No, Egipčani so posle „bukvice“ našim Kaubojima pokazali sima da znajo igrati rokomet i da so ne zalutali na svecko prvenstvo, ali je to več bilo prekesno za nas tak da so naši rokometaši od toga šoka još dendenes ne došli k sebi. A nejhuje je prešel izbornik Hrvoje Horvat jerbo je on dobil vritnjaka i to tak kaj mo več nigdar ne bode palo na pamet kaj bi štel biti izbornik Kaubojov. Nikaj nam je ne pomoglo kaj smo posle pobedili Amere i to 18 golov razlike. No, posle „bukvice“ Egipčanov morali smo pobediti svecke prvake Dance ak smo šteli iti dale, ali tu so nam na pot stali jakši od nas, a to so soci i oni šteri so nam te soce z Španjolske poslali kaj nas sredijo i to sam zato kaj nej mi sredili Dance kak so Egipčani nas. Morem vam reči da so se naši dečki, naši Kauboji, protiv Dancov, prijeli posla i tirali so, i to od prve minote, vodo na naš melin, ali da so soci vidli kak je vrag zel šalo i kaj Kauboji delajo od Dancov zeli so fučke vu svoje zmazane roke i pomogli so Dancima kaj so ne odišli po riti k meši kak smo mi to naprajli v prvoj tekmi z Egipčanima. Mortik ste zeli v pamet, a mortik ste i ne, ali protiv Egipčanov so nam sodili isti soci, Španjolci, kak i protiv Dancov sam kaj nej nekaj odišlo nekam krivo i kaj se nej Dancima nekaj pripetilo. Ve vidite, Dancima so protiv nas soci pomogli, a nam so ne protiv Egipčanov pak je se došlo na svoje, očem reči, se je onak završilo kak so to svecki rokometni oci splanerali. Kaj vam nek rečem, Danci so pobedili se na sveto sam so od nas trebali zgubiti, kaj znači da smo mi bolši od Dancov i ak ste me dobro razmeli Danci so prvaki sveta, a mi smo nejbolši na sveto. Kaj je jeje!
Nejbolši rokometni soci na sveto so z Lepe naše, to so naši soci Matija Gubica i Boris Milošević i več so tri leti, nejmeje, nejbolši na sveto. Kaj reči na to? Mi imamo nejbolše soce na sveto, a nas kradejo! De je tu pravica – to te ja pitam?
Ve vidite, makar so igrali naši Kauboji, makar so oni zgubili od Egipčanov po riti k meši je odišel izbornik Hrvoje Horvat. Si so rekli, si pak i Lino Červar, šef trenerov, šteri mo je presodil. Kak zgledi da je Lino pozabil kak je to bilo dok so rokometni soci jemo krojili kapo i jemali mero, dok so ga krali, kak na priliko 2009. leta v Zagrebo v finalo Sveckoga prvenstva protiv Francoske ili pak par let posle protiv Nemačke na Evropskomo prvenstvo. Niti unda, a niti denes je ne muoči igrati, očem reči, ne muoči pobediti protiv jakši.
Je li bodo Dinamovci presodili svojemo Zdravkeco Mamičo?
Verjem da si znuomo što je i de je Zdravko Mamičov, negdašji i denešji (još navek) glavni čovek labodoritanja v Lepoj našoj. Si znuomo da je on vedril i oblačil ne sam med labodoritašima Dinama nek i med Vatrenima. Ruon tak si znuomo da se je on navek rad igral z ogjom i da je se ono kaj je on napravil po svetlo dneva ili pak je to skrivala noč bilo blagoslovleno, očem reči, navek je on bil na ovi strani zakona. Istina Božek negda je on pisal zakone po šterima je delal, ali so jiv navek blagoslovili soci ak ne drugdi unda na sodo v Osjeko. Si znuomo da so soci Zdravkeca hajdi koštali, ali ruon tak znuomo da je „tata“ (čitaj: Zdravkec) nigdar ne škrtaril. A i sima nam je poznato kak je Zdravkec navek mel globoke žepe. Ali dok so politika i političari (i soci v Osjeko) obrnuli pločo unda je Zdravkec završil v rešto, ali je predi nek so reštanti došli po jega zbrisal prek Save v Bosno, očem reči, Hercegovino.
Kupil si je grunta i napravil hižo pre Marijici v Međugorjo. Hajdi dugo je bil mir i Zdravkec je vedril i oblačil z našim labodoritanjem i Dinamovcima z Međugorja. Ne tak zdavnja nekaj se je čudnoga počelo kuhati v Dinamovom lonco tak da so jeni metali grincajga nutri v lonec, a drugi so kuhanoga bonceka jemali vum. Pak smo zazvedili kak je točna ona stara pučka izreka: dauoko od oči, dauko od srca, očem reči, kak so se nešterni funkcioneri štere je Zdravkec dopelal v Dinamo i šteri so tam na leta hercuvali za dobre peneze premislili i ve bi šteli vedriti i oblačiti bez Zdravkeca. A i peneze bi, ruon tak, šteli deliti bez onoga šteri jiv je dopelal blizo te kase z penezi. Kuliko čujemo ve se bodo zišli skupštinari Dinama i oni bodo zdigli roke i rekli je li so za Međugorje ili pak za domače purgere.
Ruon tak smo zazvedili kak si je Zdravkec v Međugorjo našel tretjo ženo tak da smo ve ne ruon stoprocentno sigurni je li bode on i dale ostal med labodoritašima ili bode se vejč i gosteše motal (i ne sam motal) okoli tretje žene. Najgerek sam, jako sam najgerek kaj bode na to rekla Marijica Međugorska z šterom si je Zdravkec več na leta zdobra? No, tak nam je bar rekel!
Dočakali smo još jeno novo leto
Minulo nedelo smo dočakali još jeno novo leto i to ono gorično. Si znuomo da je svoje godovno mel sveti Vinci tak da smo preslavili Vincekovo. A si znuomo, bar mi prinas na falačko zemle med dvemi vodami kak z Vincekovim počne novo leto v goricaj. Posle Vincekvoga naši vinogradari počnejo z poslima v goricaj, a kakši so to posli lepo se vidi na samo Vincekovo: to je obrezovanje. Nejpredi tre obrezati doli z trsa ono kaj ne vredi i na čemo ne bode raslo grozdje, a posle dohaja vezanje, kopanje, gnojenje, špricanje i kaj nem dale nabrajal. No, verjem da znate da se nigdar ne dela v goricaj, a kaj bi pelnica bila zaklejena jerbo se pravi težaki morajo negdi i okrepiti. Trsje i zato davle kaplico kaj dobri težaki ne dehidrerajo na poslo i kaj duže morejo zdržati. Se je to dragi Božek lepo posložil. Verjem da so se zdošli vinogradari šterima žene imajo ključa od pelnice!
Naš pjesnik Tin Ujevič je ne mel gorice, ali je lepo rekel kak nema rad dve stvari i to: „Pijane ljude dok sam trezen i trezne ljude dok sam pijan!“. Ne sam uspel zazvediti da je to rekel dok je bil trezen ili pak posle sedmoga frakleca?
