Hmirajo sam dobri ljudi!?
Od da znuom za sebe, očem reči, od da sam počel hodati na sprevode primetil sam kaj hmirajo sam dobri ljudi. Najte kaj, još sam nigdar ne čul kaj bi se o pokojnomo pripovedalo nekaj hudoga bar na na sprevodo. To je po onoj negdašjoj: o pokojnima se nejlepše, a moj pajdaš Tonča bi rekel: drugo nikaj so si niti ne zaslužili. Ali moram vam reči da se i tua šega meja šteli mi to priznati ili ne? Mortik je to sam prinas, jerbo prinas se predi nek se o pokojnomo nekaj reče, dobroga ili pak hudoga, pogledne z štere je stranke. Ak je z, nedaj Božek, HDZ-a unda se o pokojnomo more govoriti i nekaj hudoga jerbo teško ili pak nikak nebre biti kaj bi hadezeovac mogel biti dober čovek. Sima nam je poznato kak ga vu sakomo žito jega kukolja, ali sam ak je pokojni z HDZ-a unda se to more i sme naglas reči, ali ako je levičar unda vum ido sam lepe stvari. Mogli ste to doživeti, napriliko predi šest meseci dok je hmrl 104-letni Joža Manolič, šef Udbe, ali se nikaj hudoga o jemo ne moglo čuti, niti pak prečitati, a pred dva mesece je na drugi svet odišel stoletni Buda Lončar šteri se je celo živleje boril protiv Lepe Naše i drukal je za Jugo, ali nikaj se je hudoga niti o jemo ne čulo, a niti pak napisalo. Još je dobil groba na Mirogojo i to zabadav. A ve da je hmrl ravnatelj zagrebečke bolnice Rebro Ante Čorušič unda smo mogli čuti hajdi toga o jemo, ali nikaj dobroga niti pak lepoga. Što mo je kriv kaj je bil hadezeovec i k tomo Hercegovac? Neje dosti kaj se ljudi (čitaj: političari) svadijo dok so živi nek se jim unda kajkaj toga naklada i dok hmerjejo. Kam bo nas to dopelalo?
Znuom da ste vure poštelali na zimsko vreme, a ve još poštelajte vage na zimsko računaje kilaže!
Da bodo prestale rasprodaje v Maksimiro?
Ne muoči prepoznati Dinamovce šteri igrajo v našoj Hrvackoj labodoritaškoj ligi od oni z Lige prvakov. Posle debaklina protiv Bajerna v Minkeno, Dinamovci so popušili 4:1 na grbavici v Koprivnici. Posle toga Dinamovci soodigrali ejnštelj z Monacom i pobedili vu Salzburgo 2:0 tak da so Dinamovi kibici bili stoprocentno sigurni da je došel kraj rasprodaji bodova v Maksimiro. Ali došli so Osječani i potanjurali so Dinamovce v Maksimiro. Sima nam je poznato kak je trener Jakirovič dobil z nogom vrit posle Minkena, a ne znati kaj se bode Bjelici pripetilo posle Osijeka. Ak bodo Dinamovci mejali trenera posle sake zgube ne znati de se bode zmoglo tuliko trenerov. Kak smo rekli Jakirovič je odišel zbog radi Lige prvaka, a Bjelica bi moral zbog ove naše domače hrvacke lige. Nekaj sam si gruntal (pomogel mi je i profesor Baltazar) i predložil sam Zajeco kaj bi vrnul Jakirovič i to tak kaj bi on vodil Dinamovce v domačemo prvenstvo, a Bjelica bi se brigal za utakmice i pobjede v Ligi prvakov. Najte se nikaj smijati, to bi bilo čuda bole nek da saki mesec davlejo otpremnimo bivšemo trenero, a novoga kupuvlejo na pijaco kaj je ne ruon tak fal. Nejdražeše je kupuvati, očem reči, mejati trenera dok se lige igrajo i dok si dobri treneri imajo svoje posle, a one druge i tak nišči neče. Dva treneri za dve lige bi najbrž bila dobitna kombinacija. I teca Franca je rekla da imam praf.
Hmrl je električar Štef! Uzemljenje bode zbavljeno zutra odvečer v štiri vure!
Da sam rafangerač mala moja…
Znuomo si da rafangerači nosijo srečo k hiži, a nejbole to znajo naše žene i snehe. Odnavek je poznato kak so se snehe štricale štera bode doma ostala kaj počaka rafangerača jerbo ak se je dobro držala kcoj unda je bilo se vredo i pre hiži. Šteroga rafunga je sneha pokazala on ga je počistil jerbo pravi rafangerač nosi meštrijo za se rafunge i za sakefele pečke. Nek se stareši rafangerači ne srdijo, ali mladi so na vekšoj ceni. Znuomo da stareši rafangerači to z roštajo kaj se se praši, ali mlada roka i mlada meštrija je ipak na vekšoj ceni. No, kuliko sam mel za čuti dok so se rafangerači falili v krčmi pre Muniki što bole i vejč rafongi počisti. Dok je došla štrta runda na šank unda se je se zazvedilo i ono kak je nejmlajša sneha z tretje vulice jako frčna i kak je dočakala mladoga rafangerača, rekel bom kak je i rafangerač rekel, bez gač. Unda znate kuliko je vur bilo i kak je mladi rafangerač počistil i snehinoga rafunga. Meli smo priliko čitati v našaj novinaj kak je z rafung, šteroga je počistil vanoski rafangerač, tekel med, no nejsmo zazvedili je li je to bil hižni rafung ili pak snehin? Jerbo ak je sneha mlada i frčna unda je čistam nekak normalno da z jenoga rafunga teče med pak unda zato i to čiščenje rafunga duže traje. Denite roko na srce i priznajte je li bi vi ostajli takšega rafunga z šteroga teče mede, a kaj nej to zvrcali do kraja? Priznajte, prosim lepo!
Žensko dobroto je ne muoči zmeriti, samo ženska more oprostit moškomo greha šteroga je ne napravil!
Saki trener si zbira pomočnike
Je li ste v pamet zeli da dok so Dinamovci zmenili trenera došel je Bjelica i z sobom dopelal i celo svojo ekipo: pomočnoga i kondicionoga trenera, analitičare, trenera golmani i kaj ne bodem dale nabrajal, a cela Jakirovičova družina je odišla po riti k meši skupa žnjim jerbo saki novi trener si dopela svoje. Denemo ve to na stran kaj Bjeličin trener golmani kesni pak Dinamovci pušijo štiri komade po utakmici, ali dok on dojde i golmani bodo mam bole branili. To sam vam sam štel reči kaj se unda čudite kaj si je novi ravnatelj naše Međimorske bolnice posložil ekipo i vugnul je staro Šegovičovo. Tak je to navek bilo, što je došel z jenom politikom i žnjom je odišel, tak se bode pripetilo i z ovima šteri bodo ve zeli v roke cugle vlasti. Još je niti jeden šef ne bil tak dober kaj bi pasal dvema gazdi kaj ne bodem gazdarice spominjal!
