10.6 C
Čakovec
Ponedjeljak, 4 ožujka, 2024

Moramo jako paziti dok si zbiramo!?

Za Vincekovo se v gorice ide, kaj te brige za vreme

Minolo soboto i nedelo gorice so bile pune mladih i onih stareših šteri so došli na otpiranje goričnih pelnici, očem reči, na Vincekovo. Hajdi je ljudi došlo i to ne sam naši Međimorci, v brege, v pelnice i v gorice kaj obrežejo prve rozgve i polejejo trsj, obesijo klobasice kak bi i ovo leto zraslo čim zdraveše grozdje i kaj bi ga čim vejč bilo, makar bo tre i lagve kupiti. Nišči je ne pital kakše je vreme, je li bode dežđ ili pak sneg, je li bode mraz ili pak bode sonce svetilo za Vincekovo se mora iti v gorice. Takše so nam šege ostajli naši stareši. Morem vam reči da je hajdi ljudi bilo po goricaj, hajdi jiv je hodalo, hajdi jiv se španceralo, a si so jeli, pili i popevali. Ako vam bodem povedal po istini unda vam morem rači da se je vejč pilo nek jelo, a popevali so sam oni šteri znajo. No, to kaj so naše međimorske gorice bile pune ljudi je ne zazvedila naša državna televizija jerbo so ne došli kaj bi poslikali te ljude i kaj bi se po celoj Lepoj našoj zazvedilo kak mi Međimorci poštuvlemo svetoga Vincija, zaštitnika goric i trsja kak so nas to vučili naši japeki. Neso došli jerbo bi se unda zazvedilo da mi Međimorci delamo se kak dragi Božek zapoveda i zato imamo nejbolša vina ne sam v Lepoj našoj nek i čuda dale.

Tak je bilo v soboto i v nedeljo, a v pondelek so v goricaj bili sam gazdi. No, ne sam gazdi nek so tu bile i gazdarice, kaj bi rekli žene od gazdi. Žene so došle v gorice prvič posle Martinja. A znate zakaj so ne hodile v gorice od Martinja? Zato kaj ga ne bilo nikšega posla, Znate da moški zovejo žene v gorice sam dok tre nekaj delati. Morem vam reči da je i teca Franca potvrdila da je tak bilo dok je tetec bil živ i dok so oni meli gorice pre Svetomo Vrbano. Ne sam to teci rekel, ali tak je to bilo negda dok so još moški bili gazdi pre hižaj. Denes je to čistam drugač kak pre hiži tak i v goricaj. Očem reči, denes žene imajo ključe od pelnici tak da ga moži dobijo sam dok se držijo hižnoga zakona.

Da sam mesar, mala moja, je li bi me štela?

Znuom da furt i navek čitate naše novine pak ste unda i v zadjaj novinaj prečitali velikoga spominka za našim međimorskim mesarom z Doljnjega Kraljevca Ferijom Kišom. Morem vam reči kak je on zaslužil velikoga spominka oliti kak se to po štacunski veli, intervjua jerbo je on veliki čovek. Veliki je čovek zato jerbo je igral košarko, a verjem da znate kak košarko nebrejo igrati mali ljudi. I ne sam to, dobil je životno nagrado od Obrtničke komore kak dugoletni obrtnik i jeden od nejbolših, a slažem se z tecom Francom štera je rekla kak je Feri nejbolši mesar v našemo Međimorjo. A teca nigdar ne fali onoga šteri si je to ne zaslužil. Kak god mi je to teško, ali moram vam priznati kak je mene još nigdar ne pofalila. Bar do ve. Kajkaj toga smo zazvedili od našega nejbolšega mesara Ferija kak je mesarija ne norija i kak vu tom poslo tre strašno čuda delati ili kak je šef komore rekel: da je mesar biti lako unda bi mesar bil svako. Kaj vam bodem rekel, ovi v komori so našli pravoga meštra svojega zanata komo so dali životno nagrado jerbo sam Ferijove dobrote i finote več jezero pot sprobal. I još sam ono nejbolšo klobasico ne sprobal jerbo jo je majstor Feri još niti ne napravil!

Da smo itak zabili igrati rokomet?

Još je niti ne minulo Evropsko prvenstvo v rokometo, a naši rokometaši, štere nesmemo zvati Kauboji jerbo jim je to ne lepo, so več doma. Kak so igrali so bormeš niti ne kauboji, igrali so tak kaj smo jiv niti ne mogli prepoznati. Što bi rekel da so naši „Kauboji“ ne tak zdavnja bili Olimpiski pobjedniki, i to ne jempot, svecki prvaki, nejbolši na sveto, a na ovomo Evropskomo prvenstvo so nas pobedili si z šterima smo igrali. No, rekli bodete kak smo pobedili sosede Rumune, pak kaj smo ve došli na to kaj se ravnamo z Rumunima. Istina Božek, v prvi tekmi smo nakantali Španjolce, ali oni so igrali kak da so zalutali na Evropsko prvenstvo. Si so jiv pobedili i odišli so dimo posle prvoga kruga. Ne znati kaj je itak došlo našim dečkima posle Španjolske, nesam jiv mogel prepoznati, ne znamo kaj očemo, ne znamo gola zabiti, ne poznamo svoje igrače i lopte davlemo našim protivnikima… Kaj vam nek rečem, kak da je trener Perkovac pobral dečke šteri so stoperali usput dok se je pelal za Dojčland i ne zna koga bi poslal na igrališče kaj bi to bilo slično rokometo. Moram vam priznati da nebrem k sebi dojti. Dok so dečki genuli za Dojčland nadjali smo se jenoj želenciji, a poslali so nas dimo posle drugoga kruga. Zabadav so dvorane bile pune publike v kockastaj majcaj, zabadav se popevalo “U boj, u boj…”, ali od rokometa nikaj. To kaj so posle Španjolcov po riti k meši odišli i Norvežani to nam nikaj ne pomaže. Da smo itak zabili igrati rokomet.

Moraš si zbirati koga bodeš mel rad

Još dok sam bil mali so nas vučili da moremo meti radi koga očemo, ali nas je živleje navčilo da je ne ruon navek tak. Hajdi pot se pripetilo kaj mi je tretja soseda zapela za oko i zarivala mi se vu srce, a joj je lepši i bolši bil sosed Tonča. Denes dok več imamo bolše polovice si zbiramo što nas bode zabavljal, što nam bode popeval, koga radi poslušamo, a da pak vgasnemo radio ili pak televizijo dok nešči popevle šteri nam je ne v našoj cukor piksi. Tak so si kotoripski mladi zebrali Zdravkija Čoliča za svojega pjevača i idejo sikam de on popevle. Čolič rado dojde v Lepo našo, a pozabil je kak so jegova bratja (čitaj: četniki) 1991. leta došli prek meje i prinas ratuvali i halosili za našim hatarom. A Zdravko jim je popeval i falil se je kak so Dalmacija i Zagora srpski hatar i srpska zemlja. Tak je pripovedal i to na televiziji. A mi si ga zberemo kaj nam bode popeval i idemo za jim tijam v hrvatcki Dubrovnik, šteroga so Čoličovo četniki rušili za vreme Domovinskoga rata. Najgerek sam, jako sam najgerek kaj tem zaljubljenikima v Čoliča velijo kotoripski braniteli?

Ostavi komentar

Povezani članci

Ostanimo povezani

43,705FanoviLajkaj
608SljedbeniciSlijedi
0PretplatniciPretplatiti

NAJNOVIJE