Mobiteli i veverice

Sabornik šteri predstavla „građevine“ Lejpe naše z istoka Milči Pupovcov je postal glavni, ak ne i nejglavneši političar v Lepoj i neovisnoj našoj. Nikaj nebre brez jega minoti ovak, a dok nekaj dojde v Sabor znate da tam niti trava ne raste brez jega i jegovi roki. On je kumoval kaj je Vukovar (čitaj: Penava) znova opal. Premijer Plenki je vukovarskoga grackoga načelnika zašpotal zakaj vodi državno politiko jerbo je to ne jegov posel i državna politika se vodi v Zagrebo, a ne vu Vukovaro. Ve najempot je tak, a 1991. leta so se oči bile vprte vu Vukovar i unda so Vukovar i jegovi braniteli, šteri so došli z sih krajov Lejpe naše, obranili i spasili Lejpo našo. Kuliko vidimo se se je to več zabilo i denes je to nekak drugač. Brzčas so naši braniteli ne čučeli po rovima i davali svoje živote kaj nam bodo stranjski vedrili i oblačili?

Najbrž so se naši braniteli ne borili za to kaj bodo srpska deca sedela dok igra naša himna, naša „Lejpa naša“. Sabornik Milči bi i tu moral reda naprajti. Si oni šteri jejo našega hrvackoga kruha morajo poštuvati Lejpo našo, a z tem i našo himno. Drugač ga prinas ne bode reda.

Što bi se nadjal kaj se naši političari vpuščaju v kurvanje i v drogo? Več hajdi cajta se o tomo pripoveda. I Fejsbuk je za to zazvedil! Nebrem veruvati da te nevole stanuvlejo med našim političarima, a mi smo zebrali nejbolše??? A kaj se se unda dela med rajom, med običnim smrtnikima, ak ovi nejbolši delajo tak velike grehe? Kakši so oni nam svetli primjer? A našoj deci?

Morem vam reči da toga alzajmera muoči seposod najti i on je furt tu med nami šteli mi to priznati ili ne. Napriliko došel i k sosedi Bariki. Ona se nikak nebre zmisliti da sam ja bil, negda zdavnja, v jenomo krilo i kaj sam delal. Najbrž sam sam bil, ali sam jako slabo delal, pak se zato nebre zmisliti. A kak se i zakaj zmisli sih drugih, štere mi je pod nos fteknula? Kak i zakaj?. Čuda so bole i gosteše delali od mene, pak so ostajli traga šteroga niti alzajmer nebre zatrti.

Pitala me i teca Franca, što mi je to te Švaba Alzajmer? Otpovedal sam joj: – Teca, to vam je takši beteg kaj nikaj ne boli, a čovek saki čas zazvedi nekaj novoga! – A, to je tua nevola, pak kaj si mi to ne mam rekel? Jožek, pak mi stareši ljudi to nevolo kaj čuda toga pozabiš zovemo senilnost. – Ve vidite, teca, mi imamo svoje vuteske (čitaj: senilnost), a Evropa nam rivle svoje (čitaj: alzajmer). Odnavek je tak bilo, navek so nam stranjski, šteri so gospodarili z nami rivali svoje, a naše so zapravljali. Negda je to bila Austro-Ugarska, posle Mađari, a ve pak Evropa. Nikak nebremo dojti do toga kaj bi mi svoje nevole zvali onak kak mi očemo!?

Nejpredi sam si gruntal kak nešči z nas dela bedake ili pak hrmake dok se je počelo pripovedati kak bode precednik Plenki zafremal „Ministarstvo istine“ kaj bodemo mi v Lepoj našoj znali kaj je pravzaprav istina. A zakaj to? Kak morete pitati, zakaj? Pak poglednite malo okoli sebe, obrnite se, posluhnite kaj se pripoveda i mam bode vam se jasno. Kak i meni! Poglečte, jena istina vam je v Saboro, druga istina vam je vu Vladi v Banskaj dvoraj, tretja istina je na Pantovčako… No, ali to je još ne se, imamo nešterne istine štere se dobavlajo prek emajlov, imamo istine štere dohajajo prek sms poruki, unda se nešterne istine najdejo na Fejsbuko i drugaj mrežaj štere Internet nudi, kaj nem spominjal istine štere zna moja teca Franca i jena skorom stoletna pajdašija. Dok se te istine denemo na kup unda so ove istine štere naši velečasniki čujejo v spovedalnici malo vejč kak nikaj. Denes saki od nas ima mobitela z kajkakšim mrežama tak da so si na spovedi saki den. Ali od teh sih istini, štera je prava? Ve vidite to niti naš Plenki nebre nikak zazvediti i zato mo je jedino ostalo kaj zafrema „Ministarstvo istine“ unda nigdar ne bode nikaj točno znal, ali ga to ne bode preveč sekeralo.

Saki den smo se bliže tomo kaj pemo znova glase davat i to ne za bilo kaj nek za EU parlament, očem reči, znova bodemo zbirali nejbolše med nami šteri nas bodo predstavljali v Briselo. Kak i vu semo, tak so i tu esdepeovci prvi na svetlo dneva donesli svojo listo, svoje nejbolše štere imajo. Ne bodete veruvali, ali ve so ne zabili na naše Međimorce, očem reči, na listeko je prvi i vodeči esdepeovec Mladen Novakov. V prvi mah sam si gruntal da je to zato kaj se župan Matija ravna v Brisel, pak esdepeovci očejo to zglihati, ali dok sam malo duže gruntal to je zbogradi toga kaj drug Bernardič sako malo dohaja v Čakovec i Međimorje, pak se je moral nekak revanšerati kaj ga naši partijci zovejo i primejo dok nišči drugi neče. Kak god steška, ali moram deti roko na srce i priznati da je politika jako čudna biljka, bole kak partizanka, nejbole raste tam de jo nejbole tuzajo!

Verjem da znate kakše nevole imajo naši krčmari z našom decom i mladima. Najme kaj, mladi dojdo v krčmo jerbo sam i deca hodajo, a mi stareši moramo deci dati peneze za kavico, pivico i za cigaretline kaj se naša deca ne bodo sramotila da imajo premaloga đeparca i da nebrejo iti v kafič kam si hodajo. Mi stareši se to sramoto nebremo i ne vupamo prevoščiti. To smo nekak zrihtali makar žmičemo sigdi drugdi, ali deca so nam na prvi mesti. Dok smo to rešili i dok dojdo v krčmo oliti kafič, unda se deca sednejo za stole, naručijo si pijačo i mobitele v roke. V tem modernim kafičima se nišči z nikim ne sapomina, sam mobiteli delajo. I ne sam to kaj se ne spominajo nek i nikaj ne pijejo. Dok si naručijo kavo spijejo jo dok se več tripot prehladi, a kaj se ne bodemo za drugo pijačo niti spominali. Kuliko sam mel za čuti pre čakoski gracki vuri, nešterni krčmari se spominajo kaj deci nej dopustili kaj bodejo nucali mobitele dok sedijo v jivim krčmama. Po zimi se to još bole pozna jerbo se deca hodajo gret v krčme, surfajo po interneto, pošiljajo sms poruke i nikaj ne pijejo. I kak bode se gazda krčme žalil poreznjakaj kaj mo slabo krčma ide, kaj se slabo pije, a krčma mo je furt puna. Ve vidite kakše se nevole so nam donesli mobiteli i Internet.

Čakoski gracki oci so dopelali v čakoski park veverice i z tem so šteli kaj se v park vrne i živleje. Negda je bilo čuda bole živo dok je v parko bilo igrališče za deco, pak so unda deca i roditeli čuda vejčpot dohajali v park, ali se je igrališče odselilo z parka, pak so i deca odišla. Negda so i mladi duže bili v parko dok ga bilo vejč drevja, ali ve se je dosti stari drevi zrušilo, pak se se vidi kaj mladi delajo tak kaj i se i oni ve družijo i parijo negdi drugdi. Lepo je to kaj so došle veverice sam sam najgerek je li veverice znajo kam so došle? Je li veverice znajo da so v parko „na vlasti“ vrane i je li se bodo one mogle žnjimi dospomenuti. I još nekaj, zakaj smo ruon morali dopelati v Čakovec črlene veverice? Ne mora v Čakovco se biti črleno!?

Ostavi komentar