Što je zakuhal kašo na čakoskoj kirurgiji?
Neje sejeno de, što, da i zakaj štrajka ili pak odide na bolovanje kaj ne mora delati. Na leta se je šepetujilo kak naši ljudi, naši međimorski težaki odhajajo na bolovanja na jesen dok se bere kuruza, kalamper ili pak grozdje, a ve pak smo meli slučaj kaj so doktori (kirurgi i ortopedi) odišli na bolovanje (i to ne si) jerbo je novi ravnatelj ne dobro podelili, očem reči, popunil šefovske fotelje. A kaj moremo ak je došlo do toga kaj si težaki (čitaj: doktori) zbirajo što jim bode šef. Najte me krivo razmeti, ali ne vidim da je to tak važno, ali kuliko vidimo neje mortik jako važno, ali je ne niti sejeno. Se razmem, nek si ljudi zbirajo ako morejo, pak i žene si celo živleje zbirajo, ali nek si zbirajo tak kaj ne bode nišči nastradal ili pak ne bode kvaren. Poglednite, na priliko, dok štrajkajo navučiteli ili pak profesori jiv podržavlejo đaki ili pak študenti, dok štrajkajo soci po sodima jiv podržavlejo lopovi, kriminalci i tati, ali ne verjem da doktore šteri štrajkajo ili pak so na bolovanjo podržavlejo betežniki, a posebno ak se dela o kirurgima i ortopedima. Poglednite, prosim lepo, dok štrajka birokracija jiv nišči ne podržavle jerbo dok ne delajo nikomo ne falijo makar jim, na se zadje, premjer Plenkovič zdigne plače. Ruon tak si gruntam što je itak pred bolnicom podržal kirurge? Betežniki brzčas ne! Slažem se z tem kaj se furt pripoveda da se politika vugne vum z bolnice, očem reči, fkrej od betežnikov jerbo je betežniko sejeno v šteroj stranki je jegov doktor ili pak što je ravnatelj bolnice, što je šef odjela ili pak pododjela, oni imajo sam jeno željo kaj jim doktori pomorejo kaj čim predi ozdravijo.
Siguren sam da se bodo te problemi z doktoraj, šefaj i ravnateljaj rešili i to tak kaj bodo doktori zadovoljni, za to i ja drukam, i kaj bodo betežniki na vreme ozdravili. Se ostalo se bode pozabilo. Neje denes nti nekša sreča biti ravnatel bolnice jerbo politički vetri pušejo na se strane. Ali sam mimo bolnice – prosim lepo!
Lepa Naša je neovisna i samostalna več 33 leti
Pred dva tjedne smo preslavili 33 leti od kak je Lepa Naša priznata kak neovisna i samostalna. Makar se je Domovinski rat stopram zahuktal države širom sveta so dale podrško kak našoj borbi protiv sosedi Srbi i jugosoldateske tak i nam Hrvatima šteri smo na referendumo zglasali da očemo iti vum z Juge i na svoje. To je jako čuda značilo našim branitelima i sima onima šteri so pomagali kaj pretiramo agresore. Verjem da se još denes zmislite kak so nsm tekle soze radosnice dok se je 5. augustuša 1995. leta počela nuhati zastava Lepe Naše na Kninskoj tvrđavi i kak smo bili veseli i zahvalni Sedmoj gardijskoj brigadi (Pumama) i četrtoj splitskoj štere so oslobodile hrvatski kraljevski grad Knin vu šteromo so se seštiri leti šepurili četniki. Sega toga se mi zmislimo i još dendenes se štimamo z Lepom Našom, z našim branitelima, ali nebrem nikak razmeti kak za 15. januar ga ne na našim hižama ili pak zgradama niti jene jedine državne zastave? Kak da se sramimo kaj imamo svojo državo i dneva da nas je cela Evropa i celi svet priznal? Kak mi poštujemo svojo državo tak isto jo bodo i drugi poštuvali. Nadjam se da si bodemo zeli v pamet kaj bodemo deli vum zastave za Den priznanja, a i na Den državnosti. Morem vam reči da ga niti v našemo glavnomo grado Zagrebo ne bilo niti jene zastave, ali jiv zato moremo videti dok se po Zagrebo špancera gej parada.
Thompson bode popeval v Zagrebo
Na velikom se pripoveda, i to se glasneše i glasneše, kak bode nejglasneši pevač Lepe Naše Marko Perkovič Thompson došel popevat v beli Zagreb grad i to na zagrebečki hipodrom kam zide nejveč ljudi. Pripoveda se kak tu more ziti prek pedeset jezer ljudi. Thompson več ima dosti prepravleni pesmi, ima veliko voljo kaj bode znova, posle hajdi let, popeval v glavnomo grado Lepe Naše sam mo još fali vizipert od zagrebečkoga načelnika i jegove stranke “Moremo”. No, kuliko sam mel za čuti na Jelačič placo v Zagrebo puše nekši novi veter i makar je duha po neotpelanomo smetjo zagrebečki purgeri verjejo da bode Thompson popeval na hipodromo stoprocentno. Ruon tak se šepetuji kak bode i novozebrani precednik Zoki Milanovičov došel na koncert!? Te koncertlin bode dobra prilika kaj bode esdepeovec Arsen Bauk v živo čul pesmo “Ako ne znaš što je bilo” kaj se ne bode moral žnje delati norca vu Saboro. Prosil bodem Thompsona kaj mo pošle pozivnico za koncert v Zagrebo jerbo saborniki morajo biti vpučeni vu se.
Zazvedilo se zakaj so sosedi Janezi drukali za Trampa
Sosedi Janezi so bili stiha kak visibabe v travi i skrivečki so feštali posle pobjede Trampa na američkim izborima v novembro lanjskoga leta, ali čim je Tramp prisegnul pred Božekom i ljudima počeli so pomalem jivi rogi iti vum tak da smo jiv i mi kak jivi prvi sosedi vidli. Najme kaj, neso oni drukali za Trampa nek so se karte hitili na Trampovo životno pajdašico Melanijo čiji so koreni još dendenes v Deželi. Sosedi Janezi so poslali pismo (čitaj: moljbo) Melaniji kaj jim pomore pre svojemo Donaldo kaj se Piranski zaljev, Sveta Gera i Štrigova polek Raskrižja pripojijo Deželi. Što bi rekel kaj so Janezi takši, tak se lepo spominajo z nami, a unda nam delajo za hrptom (kak pravi zahrptni delavci) i iščejo prek Melanije ono kaj je ne jivo, očem reči, iščejo kruha, a imajo dosti pogače. Ve vidite sosede Janeze, a dok smo jiv pobedili v rokometo na Sveckomo prvenstvo v našemo Zagrebo unda so cendrali. Dobro kaj smo na vreme zazvedili za jivo moljbo štero so poslali Trampo pak smo jiv pobedili i poslali dimo. Dosti pot so oni nas pobedili i ne sam to nek oni hasnujejo našo Sveto Gero, očem reči, Svetoga Ilijo, a to je naša zemlja, ali Janezi nikak da odidejo na svoj hatar. Ne moram vas zmišljuvati kak so “kupili” naše Međimorce v Raskrižjo šteri so na referendumo “priznali” da so Janezi. Kuliko vidimo neje sejeno kakše sosede imamo? Si sosedi halosijo prek meje na naš hatar, a imajo dosti svoje zemle, ali znate kak je to, oči so navek bole lačne i čuda vejč halosijo nek jim v želodec zide: Mi jivo nečemo, ali niti svoje, bormeš, nedamo!
