Međimorje komo drugomo nek Međimorcima!

Na noge bračo – domovina nas treba!

Tak so nas Međimorce zvali pred 105 let plebanoši v cirkvaj z predikalnici na polnočkaj za Badnjak ( Božič) 1918. leta kaj nas čim vejč dojde na Veliko narodno skupštino na Fratarski trg pred cirkvo svetoga Nikole biškupa v Čakovco. Si znuomo ili pak skorom si stareši jerbo našo deco i vnuke smo to ne navčili, kak je Međimorje bilo za vreme Prvoga rata pod Mađarima i da so oni z nami gospodarili. Ne sam da so z nami gospodarili nek so nam naheznuli svoje škole, svoje navučitele i šteli so kaj bi se mi vučili i navčili jivoga jezika. Ne znati je li so Mađari bili slabi navučiteli ili pak so naši japice i mamice bili slabi đaki pak so nas Mađari ne uspeli navčiti kaj bi znali po mađarski govoriti, a kamoli čitati i pisati. A mortik je rat ne dosti dugo trajal, očem reči, prefletno je završil? Mortik? Kaj god mi rekli, trajal je kak si svecki rati, štiri leti, ali je zato bil nejkrvaveši rat, kaj bi rekli, poginulo je nejveč ljudi v jenomo rato. No, rat je več zdavnja minul, a Mađari so se nikak ne dali z Međimorja. Mađari so se ne dali, a našim Međimorcima se je več ne trpelo ljuckoga jarma.

Mađari so se ne dali z Međimorja

Probali so naši stareši v novembro pretirati Mađare, ali so se Mađari ne dali i bili so još žilavi kak vrag pak so pobedili našo međimorsko vojsko, ali so nam na Badnjak 1918. leta došli v pomoč naši sosedi Hrvati onkraj Drave i Mađari so podvinuli repa i pobegli tak kaj se je se prašilo prek Mure v svoj Orsag. Kak sam več rekel, zišli so se naši Međimorci pred glavnom čakoskom cirkvom i naprajli so Veliko skupštinu štera je zanavek pretirala Mađare i prepojili smo se Hrvatima prek Drave. Predi skupštine je fra Kapistran Geci odslužil mešo tak da so posle meše si Međimorci bili za domovino Hrvacko. Tak je to bilo pred 105 let i zato nebrem razmeti zakaj se i denes ne služi nejpredi meša, a posle napravi Svetešja akademija kak je to pravzaprav bilo? Znuom, rekli bodete kak je meša isti den navečer, ali zakaj je to tak jerbo navečer nišči ne dojde na mešo. Ovo leto se je prvič popevalo na Svetešjoj akademiji „Tebe Boga falimo“ kak je to bilo i pred 105 let sam se tua pesma trebala popevati na krajo meše. Si se slažemo z tem da so plebanoši (velečasniki i fratri) nejveč pomogli kaj se je Međimorje pripojilo Hrvackoj domovini i kaj je hrvatski jezik pobedil mađarskoga i unda bi bil red kaj bi se zafalili i dragomo Božeko šteri nam je čuda unda pomogel prek svojih plebanošov. Kak nejglavneše mi se navek zmislimo na Juru Lajtmana z Priloka, Vinka Žganca z Vratišinca i fra Kapistrana Gecija, čakoskoga gvardjana, šteri je i zafremal prve Mađimorske novine, a čuda je pomogel i Ivek Novakov z Macinca. Odišli smo od Mađarov, a dočakala nas je država SHS vu šteroj so hercuvali Srbi, tak da je do prave države Hrvacke trelo čakati do 1991. leta, točneše rečeno do 1995. leta. No, da je tua 1918, očem reči, 1919. ne završila tak kak je završila najbrž nej bilo niti 1991.

Nejlepša božična molitva

Ostala mi je jena jako lepa božična molitva. meni nejlepša, a štel kaj bi jo i vi znali pak jo bodel podelil. z vami. Prosim vas lepo kaj mi javite je li je i vam tak prirasla srco kak i meni. Molitva je došla do mene z Ukrajine, a napisalo jo je jeno dete: – Božek, čuvli mojega tatija, mamu, braceka i sekico, mamicu, japico, a i mene…, ali posebno te prosim, pazi na sebe jerbo ak se tebi nekaj pripeti, gotovi smo si mi…!

Kakši smo to gospodari mi Međimorci z bregov

Još negda, čuda predi od Bleska i Oluje smo se mi Međimorci štimali z Štrigovom jenim goricama i vinom štero je vu tem goricama zraslo i takše kak nejbolše nosilo se po stolima Međimorja našega maloga, a i cele Lepe naše kaj ne bodem spominjal države štere so sosede ovom našemo vinorodnomo hataro. Odnegda je Štrigova, očem reči, štrigoska pelnica bila poznata po dobrim, kaj dobrim, nejbolšim vinima i to vinima po šterima se pamet dobavlala. I ne sam pamet nek i zdraviče tak da je našim betežnikima ne trela apoteka nek sam štrigoska pelnica. Ruon tak nam je poznato kak je čakosko i međimorsko Agromeđimurje hercuvalo z temaj gorica i z temaj pelnicaj kaj nejbolša vina ne bodem niti spominjal. Dok je naš Domovinski rat završil genuli smo v pretvorbo i privatizacijo sega vrednoga kaj smo meli v Međimorjo pak so tak i štrigoske pelnice došel na red. I ne sam pelnice nek i gorice kaj one prašnate flaše v pelnicaj ne bodem spominjual, a vu tem flašama je bilo nejbolše vino. Treba deti roko na srce i reči da smo ruon ne znali kak bi te negdašnje naše štrigoske gorice i pelnice pošložili kaj bi od zutra bile moje. Se je vu tem pelnicama bilo vredo: i vino i težaki, a ruon tak so vredo bile i gorice, ali pravi gazda nikak da se pojavi i da zeme cugle vlasti v roke i počne delati kak to dragi Božek (i sveti Remuš) zapoveda. Kaj bom vam rekel, gazdi so se mejali, ali prave sreče ga ne bilo kak za gorice tak niti za pelnice. Nikak mi nejde vu glavo zakaj so se naši poznati vinari i vinogradari okrajali teh štrigoskih goric i pelnic makar so bili nejbliže tomo i znali so kuliko to se vredi. To vam je tak dugo trajalo kaj so to našo nejbolšo i nejslajšo fabriko (čitaj: štrigoske pelnice) kupili naši sosedi prek Drave. Ne bodete veruvali čim je v štrigoske pelnice došel novi gazda se je genulo na bolše i si mi Međimorci smo počeli znova kupuvati štrigoska vina. Novi gazdi so otprli i novo vinoteko v Čakovco tak da so nam ve štrigoska vina mam tu polek nas. Sejeno mi teca Franca ne da mira i furt me spituvle kaj se je itak tom spremenilo vu Štrigovi kaj znova imajo nejbolša vina i kaj jiv mi kupuvlemo? Najbrž se je to nekaj v nami pripetilo jerbo štrigoska vina so navek bila nejbolša i na dobromo glaso po celoj Lepoj našoj, a i ovi dok dojdo z Evrope nejpredi pitajo za Štrigovo. Čistam mi je toplo pre srco dok vidim kak Štrigova i štrigoska pelnica znova cvetejo sam sam malo tožen kaj so ne naši ljudi gazde. Pak sam vam još nekaj štel reči i verjem kak bodete me razmili: – Pak kaj bi se sveti Remoš (čitaj: Jeronim) narodil v Štrigovi da tam ne bi nekaj bilo v redo?

Ostavi komentar

Povezani članci

Ostanimo povezani

49,208FanoviLajkaj
608SljedbeniciSlijedi
0PretplatniciPretplatiti

NAJNOVIJE