Maškori vladajo tri dni, a žene predi i posle

Službe štere se skrivlejo od svetlosti dneva čistam se znajo

Američke službe štere delajo skrivečki (čitaj: CIA) so nikaj prema našoj skrivečkoj službi, očem reči, prema našoj Udbi, ako još postoji? Najbrž Udba još postoji jerbo što bi drugi, itak, javljal našim penzičima, i to onima šteri so več prešli osemdeset let i pomalem šeklerijo prema devedesetoj, i još navek hodajo v Kumrovec ili pak na Kozaro, Tjentište, još so nigdar ne bili v Maclju, na Jazovki, a nedaj Božek kaj bi išli vu Vukovar, Lipik ili pak v Škabrnjo, se ono kaj se pripeti vu Vašingtono i to v Trampovoj Beloj hiži i to v jegovom Ovalnomo salono. Si znomo da se tam pripeti hajdi toga, probajte se zmisliti kaj se je tam pripetilo dok je precednik Amerike bil Bil Clinton, a zišel se je z Monikom Levinski, štera je praha brisala po namještajo Bele hiže, ali to se je ne mom zazvedilo nek dosti kasneše dok je svojo plavo kikljo donesla na kemisko čiščenje, a denes je se čistam nekak drugač: kaj se navečer pripeti vu američkoj Beloj hiži naši penziči več drugi den vjutro, ak je jedanajst vur dopolne jutro, več se zna za stolom za šterim sedijo nejstareši penziči. A što bi to jim mogel drugi reči ak ne Udba. Ne sam kaj znajo kaj se je pripetilo nek znajo se od reči do reči kaj je američki precednik Tramp rekel ukrajinskomo precedniko Zelenskomo i što bode kuliko penez i komo dal? Ak ne verjete meni morete dojti bilo štero jutro, očem reči, dopolne i se bodete zazvedili, od A do Ž. Nebrem veruvati do čega je Tramp toga sveta dopelal? Predi Trampa se je nikaj ne znalo, Bajden je nikomo nikaj ne štel povedati, a ve otkak je Tramp prijel v roke cugle vlasti vu Ameriki (čitaj: sveto) se se zna i to tijam vu našoj čakoskoj krčmi.

Nejvažneše je zvati se Donald

Ove naše ankete prek šteri mi v Lepoj Našoj zazvedimo se kaj očemo znati so nam pokazale da je za uspešno političko karijero nejvažneše ime. I to ne kakše god, važno je zvati se Donald. Ankete so pokazale da Tramp nigdar nej po drugoč postal precednik Amerike da se ne zove Donald. Brzčas bi Tramp postal precednik Amerike dvapot za redom da so mo ne fkrali glase, očem reči, da si je on sam brojil glase. No, nemajo sam Ameri Donalda, Donalda imajo i Poljaki sam je v Poljskoj Donald premijer, a ne precednik. Poljski premijer je Donald Tusk i jeno deset let je mlajši od svojega imejaka v Ameriki. Istina Božek da je mlajši, ali, ruon tak, spameten kak vrag, očem reči, tak spametnoga so Poljaki vejč hajdi dugo ne meli. Poljski premijer prati svecko politiko, a posebno ovo prepucavanje Amerike i Rusije mimo Evrope i polek (čitaj: bez) Ukrajine. Kak velijo oni šteri se vu svecko politiko čuda bole razmejo, a med jimi je i moja teca Franca, glavni, no ne ruon svecki, problem je vu temo, a to je na svetlo dneva donesel poljski Donald što bode od ovi tri igrači stal na strano mira, a što pak bode ostal na onoj drugoj strani. Veli Donald Tusk: 500 milijonov Evropljanov prosi 300 milijonov Amerikancov kaj jiv bodo branili od 140 milijonov Rusov! Da je Putin Donald čistam bi se lefko dospomenuli.

Negda je čuda bole iznesti trosjeda neg mišleje… Istina je da to nejde bez švicanja, ali pomaže zdravjo!

Francozi i dale prodavlejo „naše” Rafale…

Kaj se mora zdržati novinski paper prinas vu Lepoj Našoj to si nišči nebre niti zamisliti. Mogli ste prečitati ak ste šteli kak se naši ljudi čudijo kaj Francozi prodavlejo „naše” Rafale i našim istočnim sosedima Srbima! A mi smo se nadjali kak bodo Rafali sam naši reoplani i nišči drugi na sveto se ne bode vozil v takšim reoplanima. Nebrem razmeti kaj je to za stručnjake šteri se čudijo kak picek glisti kaj Francozi delajo Rafale i za druge, a ne sam za nas. To več mora biti nekša posebna pamet, i to ne za dve nek za štiri noge, štera si je pregruntala da bodo Francozi naprajli fabriko za reoplane Rafale i da bodo v toj fabriki naprajli dvanaest komadov za Lepo našo i unda bodo fabriko zaprli. Najte me krivo razmeti, ali ja vam takše naše stručnjake ruon nikaj ne razmem.

Moški vladajo z svetom, a žene z moškima

Minuli tjeden smo prefeštali Međunarodni den ženi, a to se odnavek zvalo „Osmi mart” i dok je nešči spomenul osmoga marta se se je znalo: znalo se je da je to Den ženi, a nejbole ga slavijo moški. No, kak demokracija napreduvle v semo tak se je doteknula i Osmoga marta tak da so žene več ne doma nek one same idejo kaj preslavijo svojega dneva, a ne kak je to negda bilo kaj so jim moži pripovedali kak je to bilo dok so tretji den došli k sebi. Žene so se seposod emanciperale pak tak i doma jerbo kuhača je ne več sam ženska nek i saki pravi moški ima svojo kuhačo makar je kuhja ne ruon mesto de bi moški svoje kvalitete mogli nejbole pokazati, ali moški redovito trenerajo tak da sakoga dneva vu sakomo pogledo i v kuhji napreduvlejo. Ovo leto je za osmi mart – Međonarodni den i naši ženi skorom saka opčina preprajla nekšo fešto ili pak poklonila svojim bolšim polovicama nekšo kazališno pripredbo. Jako je to lepo od opčinskih načelnikov šteri so ne zabili da v opčini imajo vejč od pol ženi štere imajo pravo glasa, a ovo leto v majušo bode se znova hodalo glase davat, a načelnik šteri oče znova pobediti na izborima mora se dobro pobrigati za svoje žensko biračko telo jerbo i moški davlejo svoje glase onomo šteroga so si žene zebrale.

Čakovčanci i Čakovčanke so mogli videti kazališno priredbo „Ja, trudnica”, a Serjančari i Serjančarke so vidli kak to zgledi dok je žena „Gola v kavezo”. Predstave „Bankrot” so bile v Strahoninco i v Štrigovi, ali kak da je to ne bila ista predstava jerbo v Strahoninco so jo mogli gledati sam stareši od osemnajst let, a v Štrigovi si ljudi i žene dobre vole. Mortik je to zbog radi toga kaj so Štrigovčanci več doživeli bankrota dok jim je, zvali bomo jo Marica, odnesla peneze štere so šparali vu Štedionici. Se je bilo vredo dok so peneze nutri nosili, a problemi so se pojavili dok so jiv šteli nazaj i to z poštenaj kamataj. Unda ga nejpredi ne bilo penez, a mam posle je i Marica zginula.

Čuda lepše je bilo ovo leto za Den ženi dok je „Bankrota” doživel i preživel Aleks z svojom Barikom.

Ostavi komentar