Tri dni smo bili na krovo Evrope
Tri dni je bilo lepo nama Međimorcima i našim sosedima Hrvatima, bili smo na vrho labodoritaškoga krova v Evropi jerbo so naši labodoritaši pobedili „galske kokote” (čitaj: Francoze) i to v Splito, na Poljudo pred vejč od tridesti jezer kibicov. Bilo je lepo sima onima šteri so u živo drukali za naše Vatrene, a i sima nam drugima šteri smo drukali doma pred svojim televizorima oblečeni v kockaste majce, z kockastim kapama, z kockastim čipsom i z kockastom pivom v rokami. Ipak, kapa doli sima onima šteri so se izborili za karte na Poljudo, sima onima šteri so resprestrli sliko vukovarskoga dragovoljca i heroja Jeana Michela Nicolera, šteri se je 1991. leta došel boriti za Lepo Našo i dal je svoje mlado živleje za neovisnost i samostalnost Lepe Naše. Još je lepše bilo, ako more biti nekaj lepše, dok so cele tribine popevale „rokometaško” himno „Ako neznaš kaj je bilo” u znak sječanja na Domovinski rat, šteri nam je donesel neovisno Lepo Našo. Verjem da je to genulo naše labodoritaše pak so oni genuli v tretjoj brzini od prve minote i stisnuli so Francoze na jiv hatar (čitaj: jivo polovico) i več posle prvoga poluvremena naši Vatreni so vodili z 2:0, makar je Kramarič na početko utakmice fulal elvera. No, pravzaprav ga je on ne fulal nek mo ga je francoski golman obranil. A teca Franca je mam rekla: kak mo ga nej obranil da je tak vritnul kak da mo je ne bilo volja. Tak je bilo, tak je počelo, ali na se zadje je se čistam vredo završilo. Pobjeda je bila višeša nek smo planerali.
Ali za tri dni je se došlo na svoje. Nejpredi so nam Francozi zabili dva gole, prvo poluvreme smo zdržali, ali kaj je utakmica bole išla krajo bilo je sam pitanje minote da bodo i Francozi zabili. V produžetkima se je nikaj ne pripetilo pak se je o tomo što bode išel dale odlučivali elveri. Naši labodoritaši so bili po tomo poznati kak so nejjakši kaj se elveri dotikavle, ali to nedelo v Parizo je sreča bila na protivničkoj strani tak da so dale odišli Francozi, a mi kibici i naši Vatreni moramo čakati novo priliko. Kak bilo da bilo, nebremo nikaj zameriti našim labodoritašima, pokazali so da još znajo labodo ritati, Luka Modrić je kak vino, kaj je stareši je bolši, a pokazalo se da navek ne pobedijo naši Vatreni nek oni šteri zabijejo več golov. Fala dečki, pak ste nam dali kaj smo feštali tri dni kak nejbolši na sveto jerbo smo glatko pobedili svecke doprvake. Takšo srečo nema što god!
Ak je žena stiha dok moški pripoveda, unda znači da je zaspala!
Bič je počil: Thompson ipak dohaja v Zagreb grad!
Dosti se je praha zdiglo okoli toga je li bode Marko Perkovičov, z conom zvani Thompson, popeval v belom Zagreb grado ili pak ne bode. Neje bilo tak zdavnja pak se si zmislimo kak je to zgledalo dok so si naši srebrni rokometaši zaželeli kaj jiv dočaka Thompson dok so se s želencijama vrnuli z Sveckoga prvenstva. Kak so naši rokometaši pobeđuvali z utakmice v utakmico tak so se glasneše i se gosteše popevali zadjo Thompsonovo pesmo, zadji Thompsonov hit, „Ako ne znaš kaj je bilo”, a štero so si naši rokometaši zebrali kak svojo himno. Kak god steška, ali Thompson jiv je dočakal, Thompson je skupa z rokometašima i z rokometnim kibicima popeval na Jelačič placo i morem vam reči da je ne nišči ištekal mikrofone, a niti pak strujo. Si oni štero so bili na Jelačič placo, a bilo je nejveč mladih, so popevali, a si oni zagrebečki purgeri kaj so gledali rokometaše i z teška srca poslušali Thompsona so kleli, ne mater nek se po spisko, sima onima šteri so to organizerali, šteri so pozvali Thompsona kak i onima šteri so popevali. Morete si to pregruntati, naš hrvatski pevač, naš čovek z Čavoglava v glavnomo grado Lepe Naše dobi tuliko kletvi. Nebrem razmeti kaj se je to ftrglo našim levičarima i antifašistima kaj ne trpijo Thompsona, šteri popevle sam domoljubne i ljubavne pesme, a bil je i vukovarski i hrvatski branitelj.
No, ve smo zazvedili nekaj velikoga: Thompson je dobil viziperta od zagrebečke gracke vlasti kaj bode mogel popevati 5. juljuša ovo 2025. leto i to na zagrebečkomo Hipodromo. Nebrem razmeti zakaj bi to trebala biti nekša senzacija kaj Hrvat popevle vu svojemo glavnomo grado. Ali je je. Najgerek sam kuliko se bode itak ljubitelja Thompsonove glazbe zišlo, očem reči, zarivalo na Hipodrom? Nadjam se, toplo se nadjam, da bode dosti mesta za se šteri kanijo dojti. Verjem da znate zakaj bode Thompson popeval ruon na Hipodromo? Kaj se jegova popevka ne bode čula do Jelačič placa i okolice de živijo oni šteri ga ne trpijo!
Spameten popušča predi nek mora!
Što se to prepravlja za promjene v grado Čakovco?
Da so novi izbori pred vratima to si znuomo makar se to preveč ne vidi i nikaj se ne čuje. Ve se si, ne sam v Čakovco, nek i v celomo Međimorjo, prepravlamo za Vuzem, šteri bode mesec dni predi izborov. Si gradi i se opčine (čitaj: (grado)načelniki) davlejo vuzmenke (čitaj: uskrsnice) svojim penzičima jerbo saki grad i saka opčina v našem Malom (Među)morjo ima hajdi penzičov, a kuliko znamo si penziči imajo pravo glasa, a dok se penzionerska srca složijo i olovo (čitaj: zebrani načelniki) plivati morejo. Ne znati za kaj se prepravljajo v našemo gardo Čakovco? Na zadjoj grackoj sesiji so se gracki večniki prcali (tak smo bar v novinaj prečitali) kak ženske i ženske, a niti pak so se moški ne dali doli. Nesam znal kaj bi si bil gruntal dok sam zazvedil kak sadašnja vlast prepravla terena za dolazak, očem reči, povratak na vlast čakoskih esdepeovcov? Nesam mogel to razmeti, no, bil sam v gracki vječnici i videl sam da je jeden zid gracke večnice pun zvezdi petokraki. Istina Božek, zvezde so ne ruon črlene, ali so petokrake. Mortik so gracki večniki kanili precrtati vedro zvezdano nebo ober grada, ali nesam na nebi našel niti jeno zvezdo petokrako. Razmil bi da je nešči zahuzal što je crtal zvezde ili je šparal na farbi, ali da so ruon se zvezde sfušane to nebrem razmeti. A mortik je v pitanjo nekša skrivečka koalicija z esdepeom kak se je to pripovedalo na grackomo vječo za vreme prcanja na zadjoj sesiji Grackoga vječa. Najbrž je, ipak, tak!
Došla je mlada paška janjetina, ravno z Novoga Zelanda!
P.S.
Posle prcanja na zadjoj sesiji čakoskoga Grackoga vječa, vječe je respuščeno, a Ljerka Cividini ostaja gradonačelnica i to tak dugo dok se ne zbere novi(a) gradonačelnik(ca).
