Blejburg završio v Udbini
Na kaj so došle žrtve Blejburga de je počel križni pot Hrvatov šteri so bežali 1945.-toga leta pred partizanima štere so pred kraj Drugoga rata pojačali četniki. Bežali so bežali z Lepe naše črez Deželo tijam do Osterajha, tijam do Blejburga. Tam so jim nejpredi pobrali se oružje štere so meli, a unda so došli v roke Englezima. Još so si niti ne preveč dehnuli, još so si niti praha ne ftegnuli z opravi stepsti, još so ne ftegnuli biti zadovoljni kaj so pobegli partizanima i došli so v roke večnim „poštejakima“ Englezima, a ovi so si oprali roke, obrnuli jim hrpta i vrnuli jif nazaj prek meje v Deželo i dali jif nazaj partizanima. A si znamo kak so zišli oni šteri so v Blejburgo počeli svojega križnoga pota. Bilo jiv je cirka okoli šesto jezer, a dok je križni pot završil negdi v Hercegovini ili pak tijam v Makedoniji preživelo jiv je okoli deset posto. Več se rodbina onih šteri so svoje kosti ostajli v Blejburgo na leta svadi z Austrijancima kaj morejo sako leto biti pre meši i zmisliti se svojih dedekov, japekov, bratov i kaj nem dale nabrajal, i vužgati jim sveče, pomoliti se za jive dušice, ali če duže dale ovi v Osterajho tirajo naše ljude vum z svojega hatara tak da so ovo leto završili v Udbini. Ne znati kaj Udbina ima z Blejburgom i križnim potom, ali nigdi drugdi ga ne bilo mesta, nigdi drugdi so jiv ne šteli. Pitam se pitam kak bodo dugo i v Udbini dok ovi naši dušebrižniki, šteri još živijo v Jugi, dojdejo k sebi i dojde jim do pameti da i Udbina počne z „U“ unda bodo jiv selili nekam dale. Kuliko vidimo ovi z Blejburga so završili v Udbini, a jako sam najgerek de bodo ovo leto završili naši braniteli z Knina, očem reči, naši braniteli šteri so pobedili i pretirali četnike z Olujom?
Nebrem nikak razmeti te farizeje Austrijance šteri pregajajo nas Hrvate kak ustaše i kak fašiste, a oni i jiv nacist Dolfi (čitaj: Hitler) so bili v koaliciji (čitaj: pakto) z fašistom Musolinijem. No čuda je leži z prstom kazati na nekofa drugoga, kak to delajo Austrijanci i ne dopuščajo komemoracijo nam z Lepe naše na našemo Blejburškomo poljo za se one štere so partizani potukli, a svoje spomenike štere som zdigli Dolfiju skrivlejo kak vrag grešno dušo ili pak se štimajo žnjimi!? A imajo jif skorom vu saki seli.
Kaj bodemo z našim reštantima?
Spominajo se i to seposod i več hajdi dugo kaj bi udbaše Jožo Perkoviča i Zdravkija Mustača trelo pustiti vum z rešta makar si mi znamo da so si oni rešta zaslužili. Sam dragi Božek zna kuliko so oni naših ljudi sprajli na drugi svet bez soda i socov. Z druge strane nišči se ne spomina kaj bi z rešta pustili Zdravkeca Mamičovog i jegovoga brata Zokija, a šteri so v rešto jer so zahuzali peneze v labodoritaškomo klubo Dinamo. Nejpredi je čudno to kaj so se Dinamovci nikaj ne žalili kaj jim penezi falijo, ali sod i soci so tak presodili. Ve vidite Zdravkec i Zoki so vrnuli se peneze kuliko so ima soci i poreznjaki zračunali, a dinamovcima so šenkali se peneze šteri so tam ostali. I to je još ne se, Zravkec je priznal kuliko je mita znosil socima kaj ga nej v rešt sprajli, ali kuliko smo, na se zadje vidli, nosil je peneze krivim ljudima jerbo so penezi došli do soci glasnogovorniki, a ne do onih šteri so ozaj za ferongom donašali presude. Vidite, neje dosti meti peneze nek jiv tre znati i komo dati. Nešterni šteri so dosti dali i pravim socima so još fraj i još dišejo friškoga zraka v Lepoj našoj i nikak nebrejo biti nikaj krivi. Nesam tu mislil na Horvatinčiča.
Nekaj se pripoveda, i to na velikom, kak bode precednik Zoki Milanovičov ipak podragal (čitaj: pomiloval) Perkoviča i Mustača. Ne znati je li jif bode podragal po serim lasima ili pak negdi drugdi. Ak bode negdi drugdi unda bi to moglo biti posle gej parade ili pak nekšega drugoga vekšega svetka. A znamo to odnegda dok se nekaj na velikom pripoveda unda s to i pripeti.
Zagreb nebre preživeti brez ljubičice bele!?
Neje čuda vode preteklo spod pod savskim mostom i Viktor Gotovac na čelo zagrebečke SDP kolone je donesel povjesno odluko i oče kaj se ljubičica bela vrne na nejlepši Kazališni trg v belom Zagreb grado. Ne znati kak dugo bode to Viktorovo željo zagrebečki gracki načelnik Tomica Tomaševič držal v kištici predi nek jo donese pred zagrebečke skupštinare. Ak bodo vrnuli Jožu v Zagreb, na Trg unda bodo najbrž pozvali i se one štere je Joža potukel ili dal potuči kaj dojdo na postavljanjo table za novi Trg. Kuliko se je čulo v Kumrovco trebal bi i Joža dojti. Najbrž nebre zdržati v peklo da ga tuliko zovejo? Bo si zel dopusta.
Več me hajdi ljudi pitalo, šteri bi šteli prejti v partijo „Moremo“ je li pre upiso morajo meti i viziperta od ženi ili pak švalerki da prav zaprav morejo?
Grad Čakovec ima svojo povjest!??
Ove dneve dok so Čakovčanke i Čakovčanci obslužavali, očem reči, obilježavali den svojega grada meli smo priliko i to v čakoskomo Kulturnomo centro videti izložbo sliki o tomo kak je Čakovec živel (po dnevo i po noči) zadjih šezdeset i nekaj vejč let. Čim so na svet došli aparati za slikanje, a za jimi i filmi, aparata je v roko zel Ivica Žiškovičov i on svojega još navek nosi sobom sam ve ne nuca filma, ali ne zato kaj mo je aparat več ne tak frčni i vesel kak je negda bil nek zato kaj denes več nišči ne slika na film. A zakaj? Predrago je, a i čuda leži je poslikati z mobitelom šteroga čovek, kak i druge vene štrumente, furt sobom nosi. Kak bilo da bilo meli smo priliko, a hajdi ga bilo oni šteri so to i naprajli, kaj smo se zmislili kak je to negda bilo. Nikaj ne bajam, a verjem da mi Žisa ne bode zameril, ali je čuda vejč slikal žene nek moške. I sam je priznal da je živleje brez ženi ne pravo, pak se on toga receptlina več negda držal. Ak bode i dale tak delal on je na pravomo poto kaj dostigne Jožo Manoliča. No, ak bode Joža pravzaprav čakal kaj ne bode predi odišel k Božeko na račun nek bode Hajduk prvak Lepe naše unda se ga ne bodemo tak fčasi rešili.
