Ojer i po grobjima dela reda
Pozna se kaj so se ovo leto, očem reči, za ovoletošje Se Svece cvetje, lampaši, buketi kupuvali v ojerima. Istina Božek cene so bile dosti menše nek lani sam kaj smo mi v žepima meli čuda meje ojerov nek lani kuni. A to kuliko imamo ojerov po žepima ili pak buksama vidlo se po grobjima i grobima naše rodbine i naših pajdašov. Nebre nišči reči da smo šparali na jimi, ne, ali smo meje sega donesli na grobja. Meje je bilo cvetja, menši so bili buketi, a i meje lampašov je svetilo. A to kaj lampaši krajše svetijo to nas fkajuvlejo ovi šteri jiv delajo, šteri nam jiv prodavlejo. Poglednite, prosim vas lepo, ojeri so naprajli to kaj ga meje lampašov svetilo, a ovi šteri delajo lampaše so japrajli to kaj so ne preveč dugo svetili. Em so zdigli cene lampašima, em so nalijali meje petrolina. Fkajuvlejo nas de što ftegne, a mi si moremo zbirati ne je li bodemo kupili lampaše nego kuliko bodemo kupili. Ovo leto se vidlo da smo si mi ne znali reda dati, ali dok so došli ojeri mam so nas navčili reda. Dok je čovek bogec, kak smo ve mi, napriliko, unda ne kupuvlemo lampaše kuliko bi šteli neg kuliko penez imamo.
Kam se ide dok čovek hmerje?
Dok smo več na grobjo da nekaj rečemo kaj bo z nami dok jenoga dneva odidemo z ovoga beloga sveta k dragomo Božeko na račun? Moremo zi zbirati, ak nas bodo posluhnuli oni šteri bodo ostali posle nas, je li nas bodo zakopali v grob vu raki ili pak nas bodo skurili v Zagrebo? A z pepelom morejo naprajti ono kaj bodemo deci ili pak rodbini mi rekli ili pak bodo z pepelom naprajli kaj so si oni namislil, očem reči, pregruntali. Verjem da ste čuli ili pak prečitali vu ovim našim novinama da dok čovek hmerje i dok čoveka skurijo nikoga ne brige kaj bode rodbina naprajla z pepelom. Očem reči, pepela morejo restepsti kam god očejo, morejo po zemli, sinokoši ili pak po vodi. Morejo ga restepsti po vrčako ili pak po goricaj ili pak na vrto v zemljo zakopati. To kam bodete vi deli pepela več nikoga preveč ne sekera i to je sam vaša briga. Ali ak rodbina oče pokojnomo vužgati svečo za Se Svece, a pepel je doma ili pak vu vrčako unda more dojti do svaje, ali ne velike jerbo se denešji ljudi slabo brigajo za svoje mrtve ne kaj bi se brigali za ljucke.
Pred par let je sosedo hmrla žena i on jo je dal skuriti, a kak je bila korona več se je ne nišči brigal kaj je sosed napravil z pepelom i da je urno odnesel na grobje. No, neje čuda cajta minulo i sosed je odišel k Božeko na račun. I on si je zaželel kaj i jega skurijo. I skurili so ga. Dok so deca čakala kaj dojde pepel Zagreba pospravljali so hižo i v japekovom kasleko so našli maminoga pepela tak da so unda meli dva sprevode najempot. Kak bi rekel moj pajdaš fiškal: se je bilo po zakono!
Pak je došlo do svaje: Što bode itak išel vu Vukovar?
Dok dojde november, mesec v šteromo so četniki 1991. leta pokorili Vukovara; nekaj branitelov potukli (bolnica, Ovčara, Mitnica, Semišče, Velecomerc…), a ostale so otpelali v logore, dojde do svaje što bode došel vu Vukovar, što bode se poklonil i zafalili poginulim branitelima, što bode vodil kolono sječanja, što bode…? Ovo leto je gracki načelnik Vukovara Ivek Penava napravil plakata z šterim pozivle se šteri kanijo dojti vu Vukovar nek dojdo jerbo ima mesta za se, a i sobota je a k tomo državni svetek. Se je bilo vredo dok so ne plakati došli na svetlo dneva i unda so počele svaje. Jeni so bili za plakat (desni), a drugi so bili protiv plakata (levi i antifašisti). Nejveč špotanciji je Ivek doživel jerbo je odedil kaj bodo HOS-ovci vodili kolono sječanja i kaj je na plakato napisal Vukovar i to z slovom U. Hosovci još prešli jerbo ak so bili vu Vukovaro 1991. leta unda morejo biti i denes. Ali, čim se spomene slovo U mam so na dnevnomo redo ustaše, a z ustašama dojde na dnevni red i Jasenovac i unda je ne nikaj čudno kaj je došlo do svaje. Pobunil se je protiv slova U i Milči Pupovac pak si nekaj gruntam kak bi itak on napisal Vukovar bez slova U? Još nekaj, ak je slovo U tak velika nevola za Lepo našo zakaj si Milči Pupovac na premeni prezime i to tak kaj mesto slova U dene nekše drugo slovo, nekšega drugoga samoglasnika? Teca Franca je mam rekla kak bi se Milči mogel prezivati Pipavac ili pak Pepavac pak unda mortik ne bode mel problema i ne bode po noči senjal slovo U i ustaše. Toplo se nadjam da bodemo tuliko spametni kaj bodemo ipak, kakši god plakat bil, došli vu Vukovar i zafalili branitelima šteri so vu Vukovaro postajli fondoša slobodnoj i neovisnoj Lepoj našoj vu šteroj se mi, ovak ili pak onak, gavalerimo.
Pajceki so ipak došli na svoje!
Kak se je tua afrička kuga pojavila i prinas v Lepoj našoj mali selski birovi so prebobjali, očem reči, dalo se na znanje, kak bi to rekli, urbi et orbi, da se smejo klati sam pajceki šteri ne cvilijo jerbo so se svije dobile kugo, a betežni pajceki se nesmejo klati. Tak je bilo prve dneve, ali se je posle zazvedilo da pajceki šteri cvilijo so zdravi i oni bi se mogli ponucati v kuhjama, očem reči, za stolom. Stručnjaki za svije i pajceke (kaj odojke ne bodem spominjal) so se seli za stol i čim je nešči donesel litro slive i sakomo koršmito frakleca dal mam so se nekaj spametno dospomenuli, a to je da se zdravi pajceki smejo klati, a zdravi so oni šteri cvilijo kaj bi rekli ak vam pajceki počnejo cviliti čim noža spazijo vu vašim rokama unda so zdravi i smejo se jesti ili pak metati v tiblico.
Nekaj mi je teca Franca rekla, ali sam ne uspel zazvediti što joj je to pošepetnol da so afričko kugo donesli ovi naši šverceri dece iz Zambije ili pak Konga, ali je kugi malo duže trebalo kaj se aklimatitera tu na hataro Lepe naše.
