V zadje vreme nebreš otprti radio, nažgati televizijo ili pak listati novine kaj ne bi naletel na udbo. Furt se naši političari (kaj nem generale spominjal) spominajo o udbi, furt se spominajo o udbašima i te spominki ga saki den se vejč i vejč mesto kaj bi hejali. Nebrem reči da sam do ve nigdar ne čul za udbo, ali sam se ne preveč sekeral okoli toga jerbo sam premalo znal kak o udbi tak i o udbašima. I dok so Joža Petkovičov i Zdravko Mustačov poslani v Nemačko, makar je ondašji premijer, a denešji precednik Zoran Zoki MIlanovičov bil protiv i ne jim je štel potpisati potne naloge, kaj so jim Nemci sodili za grehe štere so naprajli kak udbaši još negda za vreme zadje Juge. Nesam se preveč sekeral i za to zanimal jerbo sam preveč premalo o tomo znal i nesam tu mogel nikaj pomoči, ali ve dok so se počeli spominati i skupljati potpise kaj bi Mustač i Perkovič došli vum z rešta ve sam se moral malo podučiti o tomo kaj je to bila, a kaj je ve udba, kaj so bili udbaši i de so oni denes, očem reči, je li je to mogoče kaj još navek denes postoji udba? Čistam je normalno ak postoji udba unda postoje i udbaši.
Nejpredi sam se zatiral v rečnike, i to naše hrvacke, kaj vidim kaj tam piše kaj je to itak udba? Morem vam reči da v debelomo zelenomo rečniko piše da je to služba nekše državne sigurnosti, a kak mi je to ne bilo nikaj jasno unda sam čital do kraja i tam na krajo piše da se je to negda (predi Lepe naše) zvalo Ured državne bezbednosti i tak sam došel do Udbe. Još mi je ostalo kaj se navčim, a kaj je to udbaš. Nesam dugo iskal i našel sam kak je udbaš zaposlenik (čitaj: težak) v Udbi. Ve vidim da sam si to mogel i sam pregruntati, ali sam bil preveč leni. Teca Franca mi je lepo rekla za udbaše da so to deca Udbe. Kaj reči, teca ima, kak i navek, praf.
Ve dok sam to se lepo zazvedil kaj je Udba, a kaj so udbaši unda mi nikak nejde v glavo zakaj bi mi ve trebali drukati kaj Mustač i Perkovič dojdo vum z rešta, a si znamo (tak i v cajtungima piše) da so oni bili udbaši i to još negda v negdašjoj Jugi. On so tam meli velike grehe, tak so nam i nemački soci rekli i zbog radi toga so jiv zaprli v rešt na 40 let. Soci so rekli kak so Joža i Zdravko kaj šteroga Hrvata poslai k Božeko na račun sam zato kaj je ne mislil onak kak je negda v Jugi trelo misliti, a to je bilo onak kak so drugovi partijci rekli. Meni vam to nekak dojde kak da so Joža i Zdravko sfondali roditele, a posle so zeli deco teh istih roditelov i brigali so se za jiv kaj vredo zrastejo i dojdejo do svojega kruha. Kuliko smo čuli Mustač i Perkovič so prešli z komunizma (čitaj: Udbe) k Franceko Tuđmano i pomogli so mo kaj zafrema Lepo našo. Pitam sebe, a i vas je li so oni mogli nekam drugam prejti nek na strano Tuđmana i Hadezeja ak so šteli biti na vlasti ili pak polek vlasti. Oni so navek bili navčeni kaj so bili ba državnim jaslama i kaj so delali za one šteri so vedrili i oblačil. Na leta so bili v cukor piksi vlasti, pak nek ve odgulijo ono kaj so zahuzali.
Udba i udbaši so navek delali po skrivečki i nišči je ne znal što je udbaš sam oni šteri so bili i jivi gazdi šteri so jiv plačali tak da mi niti den denes ne znamo kak dugo so Joža i Zdravko dojili državno kravo, očem reči, kak dugo so bili v sljužbi Udbe, a niti kak dugo so bili udbaši? A niti den denes ne znamo kak dugo smo jiv plačali i kuliko, a delali so protiv nas?
Pred deset let je negdašji sabornik, profesor i doktor Anto Kovačevič napisal knigo „Čovek i jegova sjena“. V toj knigi ste mogli prečitati kak je gospona Kovačeviča Udba pratila jeno tridesti let, a toga posla je delal udbaš Željko Kekić. Željko je pomogel Anti napisati knigo jerbo je on se priznal kak je duže od dvajsti let mel na oki Tončeka. Na krajo knige je gospon Kekič, a kniga je izšla kak sam rekel pred točno deset let (2012.), je napisal: „Udba je još navek na vlasti v Lepoj našoj i nigdar je ne bila tak jaka kak je denes!“. Kaj reči, spametnomo dosta. Brzčas Željko zna!
Kaj je to z Međimorcima??
Ve poglednite na kaj smo došli kaj mi Međimorci moramo spituvati jeni druge kaj je to z nami? Najme kaj, v Priloko je nešči potukel prek tridesti milijonov čmeli, a kuliiko čujemo krivi so si oni Priločanci šteri špricajo drača po poljo. A što šprica? Špricajo si šteri pole imajo. Ak je tak, a tak je, unda je teško najti što je kriv kaj so čmele odišle po riti k meši. Kaj reči, jeno leto gacije ne cvetejo pak ga ne meda, a drugo leto ne pazimo kak treba, potučemo čmele pak ga pak ne bode meda. A si znamo kuliko nucamo meda za naše zdraviče i kaj se z medom moremo boriti protiv betegi. Na drugoj strani v Jegerseko, v Slakovco je pocrkalo hajdi ribi. Ribiči i oni šteri se bole razmijo v ribe velijo da so to mlade ribe i da so ribiči prebirali ribe i to tak kaj so bolše ostavljali, a hujše so sfondali. Nekak mi to ne zgledi tak jerbo nekak je preveč sfondano ribi. Kaj reči, ak sfondamo male ribe nigdar ne bodo od jiv zrasle velike. Bormeš je tak!
Labodoritanje ide pomalem krajo
Pomalem ide krajo labodoritanje v Ligi prvakov. Od celoga kupa labodoritašov ostale so sam štiri momčadi, dve engleske (Mančester Siti i Liverpul) i dve španjolske i to obedva Reali (Real i Vilareal). Morem vam reči da se nišči ne nadjal da bode Vilareal tak dauko došel, a nejmeje so se tomo nadjali taljanski Juventus i švapski Bajern štere so Španjolci poslali v aut. Lani je tak Vilareal išel mic po mic i v Evropski ligi i na se zadje je vu finalo pospravil i Mančester Junajteda. Kuliko vidimo Vilarealo čuda bole ide v Evropi nek doma v španjolskoj ligi. Istina Božek ve so zgubili od Liverpula v Engleskoj 2:0, ali bodemo vidli kak bodo Klop i jegova družina zišli v Španjolskoj. V drugom polufinalo je igral Modričov Real protiv Mančestera i zgubili so 4:3. Mančesterovi labodoritaši so mogli zabiti i osem golov, ali kaj se bodo muočili ak jiv je furt Real dostigaval. Da so domaći zabili osem golov na krajo bi bilo 8:7 jerbo čim je Mančester zabil gola mam so Modrič i Benzema zabili na drugoj strani. Nekak je več posle pol utakmice zgledalo da to bode jeden gol viška za domače kuliko god bodo oni zabili. I na se zadje tak je i bilo!
