Dok čakamo kaj Državno izborno poverenstvo objavi što je itak, očem reči, pravzaprav pobedil na minulim izborima za sabornike se partije i stranke štere so igrale, dobro, bole, slabo, slabeše ili nejslabeše delajo inventure svojega nastupa i postignutih i dostignutih rezultatov, očem reči, kuliko so oni bolši ili hujši od onih kakše so se nadjali. I ne sam to, kuliko so bolši ili hujši od onoga kaj so jim ankete obečuvale. Nejhuje so prešli dečki i puce z Restart koalicije i zato si oni i jive črlene od suzi resplakane oči furt i non stop megleno gledijo v oporbeno budučnost. Z dneva v den spituvlejo jeden drugoga što je kriv kaj so tak globoko potonuli i mesto kaj bi se pelali na palubi pobjedničkoga broda jivi se nosi vlečejo po morskomo podo i jen drugoga spituvlejo: kam plava of naš brod? Ak so još ne uspeli zazvediti što je za to kriv bodem jim ja rekel: Krivo je biračko telo šterojiv je ne prepoznalo!
Več hajdi dugo se po sim našim televizijama z dneva vu den vrti ona antikorona poruka: OSTANIMO ODGOVORNI. Polovica biračkoga tela se je toga držala i ostala je doma, ona druga polovica je bila odgovorna i zebrala je Hadezeovce!
Čim se je zazvedilo kak so SDP-eovci i Restartači jako hudo prešli si čakajo je li bode Davorček Bernardičov podnesel ostavko zato kaj jiv je biračko telo ne prepoznalo?Bero je najavil ostavko, ali sam ne siguren da bode on odišel v ropotarnico povjesti jerbo je jegov ideal drug Ljubičica bela, a on je naveki šel sam napre i neje poslušal kaj mo što govori. Čim je Bero najvil ostavko skočili so međimorski SDP-eovci i čakajo kaj i Mladen Novakov podnese ostavko kak Berijov prijatel i kompič. Nekaj si gruntam pak zakaj bi Mladen podnesel ostavko, pak je Mladen ne zgubil v Međimorjo? Mladen je dopelal Matijo Posavca tak da je rezultat v Međimorjo, očem reči, v 3.izbornoj jedinici nejbolši v Lepoj našoj. Rečite mi, prosim vas lepo, šteri klub meja trenera dok pobeđuvlejo? Niti jeden! To niti Hajduk ne dela!
Nikak to ne razmem, išli smo glase davat sam zato kaj se rešimo MilčijaPupovca i jegovih pobočnika, Veljaca Kajtazija, Furia Radina z Vlade Lepe naše i izbori so prešli onak kak smo šteli, a Plenki znova vleče Pupija, pobočnike i druge manjince vu Vladu. Najte se nikaj fujiti na mene, ali ja vam to nikaj ne razmem. Znate kuliko je vur ak teca Franca več tjeden dni nikaj ne govori o politiki i ne spomina se z nikim drugim sam z našim pesom Bobijom.
Kaj se Brisel furt zapikavle na nas Hrvateke v Lepoj našoj kak da ga ne nikoga drugoga v toj Evropi. Furt nas pritiščejo kaj moramo Milorada Milčija Pupovca zeti vu Vlado. Do ve je tak bilo, a ve još i štečijo Plenkija kaj mo pokloni ministarsko foteljo. Jemo tre dati našo hrvacko foteljo, a on na Den pobjede, Den Oluje i branitela, 5.augustuša, hoda v Srbijo, vu „svojo otadžbino“, na komemoracijo za jegovo bračo četnike šteri so poginuli prinas v Domovinskomo rato, šteroga so oni hapili jerbo so halosili prema meji Virovitica – Karlovac – Karlobag, a štero senjajo več od dneva da je drug Ljubičica bela odišel dragomo Božeko na račun. No, neje to se, naši ljudi, naši Hrvati, šteri živijo v Srbiji so na zadjim izborima ne dobili niti jenoga zastupnika v jivi Narodni skupštini, a naših ljudi ga ne malo onkraj Drine i Zemuna. Pak kaj to ovi v Briselo ne znajo ili pak se puščajo kakRibaričovi koji?
Ne znati što ipak piše one velike plakate štere moremo videti polek cesti dok se pelamo? Pitam zato jerbo na jenomo takšemo plakato je napisano: Prodal Međimorje za stolico! A to je ne točno, točno je: Prodal Međimorje za stolec. Nešči bi itak moral paziti kaj bi se na javnim mestima pislo točno jerbo stolica i stolec je nigdar ne bilo isto ,pak je niti denes ne!
Kuliko gud težakov dela na čakoskomo nadvožnjako, bilo štiri, šest ili osem težakov nikak te posli nebrejo dojti svojemo krajo. Ve dok se tam dela si se z autima vozijo črez Buzovec i Pustakovec i ve kak ftruc štrekari saki čas puščajo nekšega cuga i rampa je malo, malo pak zaprta. A dok se rampa zapre kolona autov se nabere do Sloginoga igrališča na jenoj strani, a z one druge strane štreke so auti tijam do Marikine krčme. Morem vam reči da hajdi šoferov furt, očem reči, saki den gomba i nejvečpot spominje gradonačelnikovo rodbino, a posebno jegovo mamo. Nebrem nikak razmeti kaj je tu itak kriva Štefova mamika i kaj tu ona more pomoči? Najbrž šoferima šteri saki čas morajo postati z jene ili pak druge strane rompe Štefova mama nejpredi padne na pamet.
Makar korona još navek određuvle kaj se sme delati, a kaj se nesme, kam se sme iti ili pak kam se nesme, ipak je vreme urlaba i težaki onak pomalem, po skrivečki odhajajo na urlabe. V našemo poduzečo je prvi na urlab odišel direktor i morem vam reči da si je počinulo celo poduzeče!
