Ak morejo na radio i na televiziji furt pripovedati o korona viruso unda je na meni da vam, ruon tak, još nekaj rečem o tomo viruso šteri se je k nam dotepel z Kine. Bar so nam tak rekli, makar je več ve niti to ne sigurno. Neje sigurno jerbo se Kinezi i Ameri (čitaj: precednik Tramp) svadijo i prepucavlejo što je itak toga virosa posadil ili pak zafremal v Kini i to več predi lanjskoga Božiča. Kinezi z prstom kažejo na Amere da so oni to nevolo dovlekli v Kino i pustili ga med Kineze, a precednik Tramp pak prozivle i na red pozivle Kineze jerbo znate da je on nejvekši, nejjakši, nejlepši i nejspametneši čovek na ovomo našemo sveto od sih cirka sedem milijardi ljudi kuliko živi ili pak životari na ovoj našoj kugli zemaljskoj. Znate i sami da se je nigdar ne pripetilo kaj bi Ameri bili nekaj krivi. Dok to se poslušam, gledim ili pak čitam dojde mi kaj bi na red pozval Kristofora Kolumbija štero ga je v petnajstomo stoletjo vrag vlekel pre debele vode i tam je našel Ameriko. Amere smo zadje našli na toj našoj kugli zemaljskoj i ve oni vedrijo i oblačijo z celim svetom. Ratujejo da očejo, z kim očejo i nišči jim nikaj nebre. Ak nešči oče nekaj naprajti na tomo bogomo sveto se mora Amere pitati tak da nebrem veruvati da se je te korona viros pojavil na ovoj našoj kugli, a kaj Ameri tu nej meli svoje prste.
Čim je virus duže tu med nami, čim se duže borimo kaj bi ga se rešili kaj nebom rekel, kaj ga bodemo sfondali jerbo još ne znamo kak bi to naprajli, očem reči, nesmo još našli leka za te beteg. Si kaj se nekaj razmijo vu apoteko i leke delajo po cele dneve i noči sam kaj bi nekak na kraj stali toj nevoli, tomo betego, šteri je pravzaprav zastavil celoga sveta. Saki den zazvedimo za nekšo novo vračtvo štero more pomoči, štero je tobož sprobano. Jeni nam nudijo čaja i to toploga, drugi nam nudijo meda, tretji sodabikarbono, četrti morsko sol, peti češjeka, šesti citrono, a naša domača medicina, očem reči, kak so se lečili naši stari nam nudi domačo žganico. Verjem da vam je ve palo na pamet isto kaj i meni: našim dedekima je ne trelo nikšega leka, klet jim je bila apoteka. I tak so oni živeli dugo, mirno i zdravo se do svoje smrti.
Morem vam reči da si nekaj več dugo gruntam i furt mi je na pameti misel da so toga virusa, toga betega zmislili oni šteri delajo leke. Najbrž so malo premalo prodavali pak so morali nekaj zmisliti kaj bodo prodavali čuda vejč jerbo so sako leto kaserali par miljardi dolarov, a to jim je, kuliko vidimo, bilo čuda premalo. Zakaj si tak gruntam? Več sam na par mesti čul, a i čital kaj so napisali spametni ljudi, šteri se v betege i virose razmijo čuda bole nek ja v labodoritanje, da v tomo viroso svoje prste imajo dva nejbogateši ljudi na sveto, a to so Bil Gates i Đerđ Soroš, a jim je pomagala i Trampova protivnica na zadjim izborima v Ameriki Hilari Klinton. Se bi to moglo biti, ljudi šteri jako čuda imajo šteli vi još vejč meti i nigdar kraja ljuckoj pohlepi. Takše ljudi nikaj ne sekera kaj bode pomrlo par sto hiljada ljudi važno jim je kaj si oni napunijo svoje kese kaj bodo mogli i dale gospodariti z svetom. Znate kak oni velijo, pak mora nešči hmreti i od betega, pak ljudi sikak hmirajo. Najgerek sam, jako sam najgerek je li se bode igda ili nigda zazvedilo što je toga virosa na svet donesel i što ga je po sveto restepel? I još nekaj: zakaj je prvo bil posejani v Kini?
Kaj bom vam rekel, mi prinas v Međimorjo, a i naši sosedi v Lepoj našoj se pridržavlemo sega kaj nam velijo ovi dečki i puce z našega Stožera. Nešterni bole, a oni drugi meje, sam kaj se to nevola od korona virosa nej zapažila prinas v Međimorjo. Jerbo dok jempot dojde unda se ga je teško rešiti kak perike ili pak partizanke. A mi Međimorci dobro znamo da se niti perike, a niti pak partizanke ne muoči rešiti pod milim Božekom. Morem vam reči da se mi još dobro držimo i da nas je niti v karanteni ne ostavila dobra vola i kak god nam je teško, ali z koronom tiramo šego i kajkakše hunvutarije nam hodajo po glavi. Nebrem zdržati pak vam bodem napisal jeno par štikleci štere sam prebral i zebral za vas:
- Rekla je soseda Barika posle tri tjedne karantene: – oblekla sam si nekšo haljino na cveteke, zgledim kak tri mekote nepokošene sinokoše
- Ljubavna priča za nepoverovati: – pajdaš Tonča se je za vreme karantene zaljubil v svojo ženo i ostavil je ljubavnico
- Pajdaš Štef pre doktoro: – Gospon Štef, kaj vas tira da pijete? Nikaj, ja sam dobrovolec!
- Lejpa naša bi morala meti sam dve regije za propusnice: – regija Badel šlivovica (Slavonija) i regija Maraska travarica (Dalmacija)
- Od zutra nove mere – nebrejo mož i žena skupa v postelo, zato kaj denes navečer zgrabite zgrabite
- Den je počel radno, prešel sam z postele v spavačoj na kauč v dnevnoj
- Oblekel sam si rekleca i obul šolce. Pitala me žena kam sam se spravil? Idem na balkon! Zabrenzala me: nebreš, fčera si bil!
- Vlada prosi penzionere: Zdržite još malo, nebodete još dugo
- Sosed Imbra mi se pofalil: živim kak Papa, tu i tam dojdem na balkon i mahnem ljudima
- Moj tretji sosed Jožek (moj imejak) si krati vreme v karanteni tak kaj žgajari. Pofalil mi se: kakšo sam žganico fčera spekel, žena mi je sama došla i prosila me nek jo zbijem
- Što si je mogel misliti da se bodo cirkve i javne hiže zaprte zbog istog razloga?
- OSTANI DOMA: prevod na međimorski – kam te vrag nese?
Si znamo da je pred nekaj vejč od mesec dni bil veliki potres v belom Zagreb grado i da je hajdi toga porušil. Zagrepčanci ne sam da se borijo protiv korona virosa nek i popravljajo stare i stareše hiže štere so se ne mogle odhrvati potreso. V potreso je nastradala i Zagrebečka katedrala tak da se i ona popravlja, nekaj se popravlja, a nekaj se je moralo i zrušiti jerbo se je na herek držalo. Da mi je nešći pripovedal kak se bode na pravoslavni Veliki petek 2020. leta z dinamitom rušil severni turen Zagrebečke katedrale rekel bi mo da se je rezišel z pameti. Vidite, a si smo vidli da je tak bilo. Nigdar ne smeti reči nigdar!
Moram vam priznati da sam i ja v karanteni, dok je žena doma se poštuvlem, a dok odide na vrt gredice delat unda si oduška dom. Hodam v pelnico kontrolerat kaj mi se nej žganica rezljuftala. Kaj nej si vi gruntali da ja v pelnici pijem, ne, ja se dezinficeram kak nam je minister Vili dal naputka: tre se dezinficerati dok ideš nutri, a ruon tak i dok ideš vum. Tak vam ja to i delam. Imam vam hajdi velikoga dvora i pred par let sam ga potaracal z tlakovcima. Imam osem redi tlakovci, redi so jednaki, ali ga sigdi ne isti broj tlakovcov. Nigdar to ne bi zazvedil da je korona došla i v karanteno me hitila.
Od da je korona došla k nam v Lepo našo labodoritaši Hajduka so ne zgubili niti jeno utakmico. Kaj reči, vidite, sako zlo za nekše dobro, očem reči, morala je nekša nevola dojti kaj bi Hajduk prestal gubiti!
Počelo se je pomalem prtuletje otpirati i se vejč je težakov po goricama, sadovjakima, poljima i vrčakima. Tre na vreme početi delati, rovati v zemli, sejati, saditi, špricati ak kanimo nekaj v jesen brati. Jako spametno kaj je stožer to odobril. No, nadjam se da ne bode tu postal jerbo tre otprti brijačnice i frizeraj kaj se mi moški v red dotiramo, a žene znova nazaj polepšajo. Da ga ne bilo te karantene nigdar nej zazvedil da mi je žena poserela. Ne vupam nikaj pitati kaj se nej zazvedilo da i ja imam nekše zasluge za jene sere lasi. Isto kak i ona za moje.
