309[layerslider id=”6″]
Minoli so još jeni izbori i to ovi lokalni ( neje od glagola lokati), a kak se ovo kaže brzčas bodemo morali znova iti i na ove za sabornike jerbo jako sam najgerek je li bode Drašek uspel popuniti prazne ministarske fotelje z šterih je sforšibal mostove ministre jerbo so ne vezali koje tam de je gazda rekel. Kak bilo da bilo nek si z tem Drašek glavo tere, pak je on za jif presegel, a mi idemo nazaj prek Drave na of naš „Falačec zemle med dvemi vodami“. Kak sam vam več rekel, hodili smo glase davat i to nekak čudno, nejčudneše do ve jerbo so si, šteri so se nudili na izboraj, zadovoljni kak so prešli i si so pobjedniki, očem reči, si so zadovolni. Morem vam reči da sam nikoga ne čul što nej bil zadovolen!!?? No, neje to se kaj sam mel za videti: čuda se je mladi zrivalo na liste, brzčas so i oni šteli sprobati toga trdoga kruha z sedem kori i očejo kaj bi vu tem teškom poslo zamenili nas stareše. A mi, kakši smo več je, priznamo, furt i seposod, kak na mlajšima svet ostaja, ali se vupiremo v se štiri kaj nej dopustili kaj bi mladi toga sveta ipak zeli vu svoje roke. Najme kaj, očemo jif odvleči fkrej od toga teškoga posla kaj se jim ne bi prefletno politika predurila ili pak kaj nej prefletno bruha dobili. Ak mene pitate nešči se je od nas stareših negdi z lanul, pak ve i mladi znajo kak je politika ipak kruh brez motike. Verjem da ste primetili kak se je hajdi ženi nudilo kaj si jif zberemo, a na to so nas navenodjali ovi z Evrope jerbo da je ne došla depeša z Brisela mi najbrž ne bi žene pustili na izbore več bi jif stajli v kuhji z kuhačom i pralom vu roki. Mi Međimorci tak delamo kak so nas naši stareši vučili i nikak drugač. Ak nas nešči na to podsili unda si nebremo pomoči, a zapovedanoga posla je nejleži delati i ne moramo iskati zgovore. No, ali sikak znamo da ak žene odido v politiko unda bodo negdi drugdi falile!? Što bode se unda brigal za jive tri vogle vu hiži? Znate da mi moški to se ne ftegnemo jerbo ak zememo prek sebe i te tri vogle unda bodemo falili na labodoritaškoj utakmici, pre ogjogascima, v krčmi, goricaj, na kartarajo… A i te zadače nešči mora zbavljati. Morem vam reči da sam jako vesel kaj so ti minoli izbori tak lepo prešli i kaj smo si ostali pobjedniki.
Najbrž so i naši Međimorci, kak mladi tak i si drugi, zazvedili za istino američkoga gospodarstvenika i političara šteri je rekel: Ljudi idejo v politiki zbogradi dve stvari: prvo so penezi, a drugo se nebrem zmisliti. Ima čovek praf, nejso seposot jednako veliki penezi, ali ak je politika višeša vekši so i penezi. Nejso jednaki penezi v Dekanovco i v Zagrebo, da so je nej se Bandič na se mile načine cukal kaj bi ostal i dale z ključom gracke kase v roki.
Čakovčanci so ne zeli promjene štere so jim se nudile, očem reči, nejso zebrali gradonačelnico štera jim se je nudila, tak da bode v Čakovco i dale hercuval gospon Štef Kovačov. Ostal je i vodeči čakoski ogjogasec Mario Medved, jedino je esdepovca Romanija Bogdana, šteri se je vrnul v Pinklece, zamenil „seljak“ Zoki Vidovič, šteri se je vrnul v Čakovec posle štiri leti kak je bil gastarbajter v Županiji. Posle izborov sam si prespal i to pošteno, kak dragi Božek zapoveda, a unda sam znova prelistal se izborne listeke i ve sam najgerek što bode itak, i je li bode, popravil našega čakoskoga starca (Režekovoga) nadvožnjaka pre staromo Hrasto? Gradonačelnica je tak lejpo obečuvala, a mi smo si stajli gradonačelnika. A večina je navek v pravo!? Znajo žene kaj očejo!
Rekel sam zadjipot da se bode na izboraj zazvedilo čiji je bažol za prvi maj bil nejbolši. I zavedilo se je, a i izbori so pokazali da je to bil esdepeov. Nekaj mi je o tomo govorila teca Franca več na prvi maj, ali sam joj ne štel ruon dati na praf, ali kuliko vidimo, mela je praf kak i navek! Se to razmem sam nebrem razmeti kaj je esdepeovo biračko telo ne prepoznala svojega čoveka šteri je štel biti župan, Mladena Novaka. Čovek kreden, navek zbegecani, i kravato nosi, a kaj ne bodem mustače spominjal. Kaj se mustači dotikavle, ( a kaj je čovek brez mustači, prosim vas lejpo?) tu nebrem razmeti žensko biračko telo jerbo meni navek gombajo da bi bil fest čovek, fest moški da bi mel mustače, a ve jim se je nudil čovek z mustači i nejso ga prepoznale. Kaj reči, pak so ne, mortik, preveč niti gledale? I još nekaj, Mladen Novakov, je več hajdi dugo gospodarstvenik, na svojemo kruho,ne steči okoli, a jegovi radniki imajo velike plače, (on i Đurek Horvatov z Tehniksa so pravzapraf zafremali Kluba jezero), ali to se mo je ne bilo dosti kaj bi ga zebrali za župana. Velijo da se o ukusima ne raspravlja, ali nebrem zdržati, a kaj ne bi zbajal ili pak pital to spametno i preštimano međimorsko biračko telo: gospona Novaka je za novoga župana zebralo nekaj meje od osemnajst procentov biračkoga tela, a jega je kak nositelja listeka za Županisko skupščino prepoznalo tridesti procentov biračkoga tela? Isti čovek, isto biračko telo, a čistam drugačeši rezultati??? Ve mi se je presvetila žarulica: pak listeki so ne bili iste boje, drugo nikaj nebre biti jerbo je nišči ne nigdi prijavil kaj je nešterno biračko telo melo z sobom šalabahtere. Brzčas je tak nejbole, pak što bode hodal znova i kružil drugipot ak se to more rešiti odjempot. Nesmo niti znali kak imamo spametno biračko telo, a ne oni kaj se v pandelek ne zmislijo kaj so (i zakaj) v nedelo naprajli.
Ne znati komo je itak palo na pamet kaj bi selničkoga opčinskoga načelnika zabrenzal kaj nej i drugoč bil zebrani i to prek staroga hrvackoga grba na spomeniko branitelima v Selnici. Najme kaj, več je hajdi cajta minulo, vejč od pol leta, otkak je postavlen spomenik v Selnici i to sim međimorskim braniteljima šteri so na sim frontima Lejpe naše dali svoje živote za ono kaj mi denes imamo i mam so na spomeniko bili dva grbi, stari hrvatski i of novi zadji. I nikomo je to ne smetalo do ve, par dni pred izbore. Kuliko vidimo neje stari grb uspel zrušiti načelnika Vičeviča i on bode još štiri leti hercuval vu selničkoj fari. No, neje to se, najbrž bi te šterima smeta stari hrvatski grb morali oditi i v beli Zagreb grad i tam se z gvardjanom cirkve svetoga Markija na Kaptolo dospomenuti kaj prekrijejo cirkvo i tak vništijo staroga grba šteri je tam več duže od pecto let. Ak je tak, a tak je, kak unda to more biti ustaški grb? Ve se bode još nešči zmislil pak bode rekel da je to se nešči napre splaneral jerbo je stari hrvatski grb na cirkvi svetoga Markija v Zagrebo, a lani so takšega postajli i na Selnici de je, ruon tak, župa Svetoga Markija. Ne bodemo pretiruvali jerbo kaj je preveč neje niti z kruhom dobro.
Što na ovomo našemo „Falačko zemle med dvemi vodami“ ne zna da se ve prinas obslužavlejo Dnevi vina, očem reči, Vrbanovo te je ne zaslužil kaj bode Međimorec. Tak smo vam, sosed Tonča i ja, išli v Štrigovo sprobavat te dobrote i finote štere je lani dragi Božek dal našim Goričancima prek trsa. Morem vam reči, nesmo se šparali i hajdi toga smo sprobali i dok so nas pomeli vum z šporcke dvorane genuli smo pomalem dimo. Pomalem, kak se to i šika zmočenim težakima. Pak je, dragi moji pajdaši i preljubljene nam pajdašice, ne ruon tak lefko delati dve smene kak smo mi to odelali minulo soboto. Soseda Tončija sam skipal pred jegovom hižom, znate več da mi je on tretji sosed. Još sam se niti ne spat pospravil jerbo mi je to zbog sakefele naporov minuloga dneva malo teško išlo, več je soseda Barika, Tončijov prva žena, došla bajat i nared me pobirat kaj sam to žnjenim čovekom napravil. Povedala je ovak: Nešči je pozvonil na vrata, dojdem i otprem, ali nigdi nikoga, a unda sam spazila mojega devedeset kilnatoga prasca kak leži na poceko i nekaj gomba sebi v brado. Ne mi je mam palo na pamet kaj mo se je pripetilo kaj je doli opal, ali dok sam spazila kaj mo okoli zobov lečejo vinske mušice mam mi se je rezbistrilo. Pak, Jožek, kaj si to žnjega napravil? Lepo sam joj otpovedal da smo mi navek pokazali zobe našemo neprijatelo i vništili smo se kaj nam je bilo na poto. Tak smo i ve naprajli. Morem vam reči, a to i vi znate, kak so te naše brežne dobrote i finote nejbolše na sveto tak da se je sosed Tonča več vjutro španceral po svojemo vrčako i bil fajneši i zdraveši nek predi kak smo genoli za Štrigovo. Čoveka negda vino fkani, ali noč to se vum zeme. Ak je vino tak fino , tak dobro i tak zdravo kak so to naša međimorska vina, nejbolša na sveto i bližešim planetama.
