Nejvekši demokrat nam je ne prešel!

Fala dragomo Božeko kaj je tua predizborna kampanja minula. Makar je prekratko trajala, tak so bar rekli oni šteri so nam biračkomo telo saki den meli nekaj novoga za reči, ali je i to malo bilo preveč jerbo smo se kajkaj toga naposlušali. Ak sam ja to dobro poslušal si šteriso bili na listekaj so jako spametni i znajo se kaj nucamo. I ne sam to, se kaj bodemo mi nucali, se kaj bodemo zaprdnoli oni nam bodo zrihtali, očem reči, privoščili. Si mi znamo da je ne tak da i mi kak biračko telo saki den nekaj novoga očemo i nucamo i to nam negda nišči, pak niti dragi Božek nebre privoščiti, ali tre ljudima dati novo šanso. Ne tre cendrati jerbo ve posle izborov nam bode čuda bole, ak ne nam unda sigurno onima šteri so zebrani. Nesmemo biti jalni, makar je nam Međimorcaj jal v genima, pak nek bode bole bar nekomo ak nam nebre biti sima. Ve smo jim mi dali svoje glase i ak ne bode išlo onak kak so nam obečali tu je korona štera bode kriva za se kak je v sa ova leta predi za se bil kriv Fašnik. Nebremo več iskati od Davorčeka Bernardiča, z conom zvanoga Bero, kaj nam bode sima povečal plače ili pak penzije ak smo ga ne zebrali. Biračko telo ga je delo na čakanje tak da bode mel ve čas kaj si pregrunta gdje je tu fuljal i de je zglajzal z pobjedničkoga pota. Kuliko vidimo Bero je računal na ljubičico belo z conom zvano Tito, ali mo je on brzčas ne došel glase davat jerbo so ve na ovim minulim izborima mrtvi ne dohajali glasat, ne so dobili viziperta od stožera. No, ne bi rekel da je Bero (čitaj: Davorček Bernardič) zgubil izbore jerbo je on, dok je pregledal snimko svojega sučeljavanja z Drašekom Plenkovičom Plenkijom glasal je za HDZ-e. Tak sam bar čul pre čakoski gracki vuri.

Mam posle izborov Bero je izjavil: mi SDP-eovci smo pobjedniki izborov ak ne računamo HDZ-e. Nebre Bero veruvati da je zgubil izbore, a nebrem niti ja, ali je Bero najbrž ne zel v pamet da je SDP-eovo biračko telo saki den se stareše i da pomalem ide svojemo kraju i pomalem imajo duho po čempresima tak da so niti ne vupali iti glase davat jerbo jiv je korona viros ne pustil vum z hiže. Nekoga je korona ne vum pustila, a one druge pak mladi z hiže šteriso svoje glase dali drugima. Kak bilo da bilo se je dobro zišlo i za SDP-e, ankete so bile na jivi strani, ove predizborne, a i ove izlazne, ali je hajdi glasov falilo dok so se glasi brojili. Kak veli teca Franca, na krajo bič poči, a dok je bič počil SDP-eovci, očemreči, velika Restart koalicija je bila menša od makovoga zrna i skrivala se negdi po pelnicaj.Ve je tua leva Restart koalicija zišla kak Retard kak so jo zlobni desni protivniki zvali.

Minoli so još jeni izbori na šterima so si pobedili i z šterima so si zadovolni. No, neje ruon tak jerbo so se javili i nešterni šteri so ne zadovolni. Neso zadovolni Mrsičovi Demokrati, a po riti k meši so odišli dečki i puce z Živoga zida skupa z Ivekom Pernarom. Kuliko vidimo Živi zid je fletno, očemreči, prefletno došel na vrh političke lojtrice v Lepoj našoj, ali je čuda predi potonul i opal doli z lojtrice jerboso se šprliči po šterima so išli gori strgali tak da so f časi bili na zemli. Čuda predi nek so se nadjali. Rekla je teca Franca, ve so tam de jim je mesto. Hajdi bode ljudi prinas v Međimorjo, pre našim sosedima v Lepoj našoj, pak i v Evropi ostalo brez posla, ali brez posla bodo ostali i dečki, šteri so vum z Sabora nosili Iveka Pernara dok je zdelaval humalije. Najbrž se je z tem svojim huncutarijama zameril biračkomo telo, pak so ga zbog radi toga poslali na hlađenje, a mortik i v ropotarnico povjesti.

Več pet-šest pot premečem te rezultate izborov, kak Bero šalabahtere na sučeljavanjo z Plenkijem, i nikak nebrem najti v šteromo koto Sabora bode sedel Milanček Bandičov i jegovi saborniki. Mortik bi se još i ve z tem muočil da mi je ne teca Franca pošepetnola kak je Bandič tak zaposleni z obnovom porušenoga belog Zagreb grada kaj je zakesnil na izbore. Teško je, kuliko vidimo , sedeti na dva stolca, a kaj ne bodeš negdi nekaj zahuzal. A politička (čitaj: izborna) cuk – mašina nikoga ne čaka, pak niti Milančeka. Nekaj si gruntam, ve je to minulo kak je minulo, sam kaj ne bode i kleto zakesnil na cuk, šeri vozi po Zagrebo?

Nejvekši Demokrata med sim demokratima v Lepoj našoj je naveliko planeral vedriti i oblačiti v Saboro Lepe naše. Da bi privlekel biračko telo sima je i to jasno i glasno rekel kak ne kani koalerati z Škorijovim ustašama, a niti pak s HDZ-eom jerbo so i oni preveč desno od jega i jegove leve demokracije. I morem vam reči da je on jeden od retkih političarov šteri je održal reč i neje z nikim koaleral najbrž zato kaj mo je biračko telo ne dalo viziperta.

Si smo najgerek, a to ne znajo niti ovi klošari pre čakoski gracki vuri, a i teca Franca se sam fuji i fkrej beži da jo to očem pitati, je li je slučajni precednik slučajne države, šteri je nejpredi zalutal kak premijer na Banske dvore, a ve pak se je zagubil na Pantovčako, na vreme zdigel svoje (ne znati od čega) zmuočeno precedničko telo i došel glasa davat? Si šteri nekaj znajo o tomo to skrivlejo kak zmija noge tak da bi jedino to mogla udba znati, a Joža Manolič mi se ne javlja na telefon!

Naš i međimorski župan, Matija Posavcov, je svojim izbornim rezultatom malo popravil kaktastrofalno bledi rezultat SDP-eovcov i Restart koalicije v Međimorjo i v ovoj našoj Tretjoj izbornoj jedinici. Matek je štel, još jempot, sprobati kak diše naše biračko telo kaj se dotikavle jega i jegovoga tela. Zišlo je tak da na štero god se listo skrije naše međimorsko biračko telo ga najde i da mo svojega (i to ne malo) glasa. Štel je Matek videti kak diše međimorsko biračko telo, a još ga je bole intereseralo kak diše čakosko biračko telo jerbo so za meje od leto dni lokalni izbori, a si znamo da čakoski gradonačelnik more sedeti v sabornici kaj je županima ne dopuščeno.

Kak je ovo naše vreme posebno zbog radi korone tak so i ovi izbori posebni jerbo smo se mi kak biračko telo morali plesati kak korona igra, očemreči, morali smo dohajati na izborno mesto onak kak nam je to naredil naš svemoguči izborni stožer. Nejpredi smo morali dojti z brnicom (čitaj: maskom) na gopco, a i penkalo smo morali donesti z sobom. Zbavil sam svojo obavezo i dal sam svojega gospođi štera je to nejbole zaslužila, a dok sam došel k brato on se je nekaj okrajal i neje štel iti svojega glasa dati, pak sam zel jegovo osobno i odišel sam na jegovo biračko mesto. Izborni odborniki so me prespodobili kak brat jerbo sam mel masko, pak sam unda zbavil i bratovo izborno obavezo. Kaj reči, sve po naputko stožera i odobrenjo izbornoga odbora. Kak veli Mujo, tre igrati dok te karta ide.

Ostavi komentar