[layerslider id=”6″]
Kak se je Međimorje naše malo odcepilo od Mađarske 1919. leta i to zanavek, tak bi se trebala naša INA odcepiti od MOL-a. Ne bomo se ve spominali što je zahuzal 2003.leta, je li je to bil Ivek Račanov ili pak Slavek Liničov? I što je pobral pinko? Ruon tak ne bomo zvlačili vum zmazanoga veša Ivija Sanaderovoga, šteri je za deset pišlivih milijonov oera odnesel Inine cugle vlasti v Pešto! To moramo jempot rešiti zanavek: je li INA vredi kaj bodemo resprodali familijarno zlato ili ne? Ako vredi unda jo bomo zeli nazaj, a ak ne vredi unda si jo Mađari nek sam imajo. Oni so našo INO hasnuvali 13 -14 let i ve bi jo nam šteli vrnuti kak mladenko! Mi Međimorci smo znali da Međimorje vredi i zato smo ga dovlekli nazaj v Hrvacko. Pokazali smo kak se to dela i ne razmem v čemo je problem? Ali kuliko vidimo naši jako dobri sosedi Hrvati so se nikaj ne navčili od nas Međimorcov?!
Pripoveda se kak so naši sosedi na drugom krajo Lejpe naše, oni na istoko, ne bili za to kaj bi mi INO dobili nazaj nek so fige držali za Mađare. Kuliko sam uspel zazvediti oni so bili v straho da ak mi dobimo arbitražo za INO kaj ne bi išli i dale. Najme kaj, velijo oni, kakši ste vi več je vi bi mogli iskati od Evrope kaj vam mi vrnemo i Zemuna. Brzčas se je nešči o tome nekaj spominal, najbrž naši pravaši, oni nejbole znajo kaj je negda naše bilo i de je pavzaprav meja!
Kak se to veli, de ga jega dima tu negdi mora biti i ogej. Zmislite se kak so naši sosedi poslali voza (čitaj: cuga) z Beograda za Kosovo na šteromo je pisali ovo je Srbija i čudili so se kaj je došlo do svaje. Rečite mi, prosim vas lejpo, kaj bi oni rekli da bi mi poslali cuga Zagreba za Zemun na šteromo bi pisalo: Ovo je Hrvacka? Makar bi na zadjemo vagono pisalo: ovo je stari cug z 1941.leta mam bi nas tožili sima od Štrasbura prek Brisela, Njujorka do Moskve. Kuliko vidimo, još smo ne si jednaki pod Božekovim suncom?! Oni morejo poslati voza, a mi cuga nesmemo!
Verjem da gledite rokometa i da pratite Svecko prvenstvo vu Francuskoj. Do ve so naši rokometaši došli med štiri nejbolše reprezentacije na sveto, ali so još ne rekli zadjo reč. Dok bodete vi čitali ovo moje premišlavanje oni bodo nejpredi igrali z Norveškom i dok to zigrajo unda bodemo znali kakšo želencijo bodo dobili. Nekšo ili nikšo? Ali niže od štrtoga mesta nebremo biti. Si znamo da nam Francoska leži jerbo je 1998.leta Čiro Blaževič z svojimi sineki odnod dovlekel brončano želencijo i bili smo veseli kak vušive gače. Od toga je minulo skorom dvajsti let, ali se još navek pripoveda kak je Čiro pustil Francozima kaj poravna nekše svoje stare račune. Što zna, ovi pre čakoski gracki vuri kajkaj toga znajo. No, idemo mi nazaj z nogometa v rokomet. Našega trenera Babiča mejamo posle sake utakmice kak god naši zigrali i nebremo nikak razmeti Francoze, Dance, Španjolce šteri imajo istoga trenera več na leta. Predi Željkeca Babičovoga je naše rokometaše prek mel Slavek Goluža i jega smo magadili cirka šest let makar je ne bil bogzna kaj, ali Željkeca nebremo nikak precerati. Kak bilo da bilo, Željkec je pokazal da se nekaj razme v rokomet makar tu i tam zaluta, ali je dosti dalko došel pak mo bodemo to oprostili. Bar za ve!
Falimo naše mlade državne rokometaše šteri dobro igrajo dok je nejbole tre, a to isto nebremo naprajti z našom državnom televizijom šteroj plačamo pretplato saki mesec makar jo preveč ne rabimo. Nekaj me tu gvinta: kam ovi z televizije mečejo te peneze kaj unda nemajo za prijenos Sveckoga rokometnoga prvenstva? Bilo bi čistam vredo kaj bi rokometaši bili na državnoj televiziji jerbo jo skorom si morejo videti v Lepoj našoj, a ne kaj je to na drugomo kanalo šteroga nešterni morejo sam senjati. Najgerek sam otkod so ovi z erteela zeli peneze za rokomet, a jim nikaj ne plačamo, a ova bogata, debela i masna državna televizija jif nema. Imajo oni, imajo sam so škrti pak ne dajo. Najbrž za sebe ostavljajo?
Za vreme ovoga Sveckoga rokometnoga prvenstva smo mogli videti i filma o tomo kak so naši malo stareši rokometaši osvojili prvo zlatno želencijo za Lejpo našo i to na Olimpijadi v Atlanti 1996.leta. Vidli smo se rokometaše šteri so mogli dojti, šteri so bili pozvani i šteri so još navek živi. Nešterni so več odišli Božeko na račun, makar so još mladi bili, a i trener Velimir Kljajič Kljun je več na nebi. Se je to lepo i dobro, si znamo da je prvipot navek nejlepše i trelo je naprajti filma kaj se ne pozabi. Ali niti med rokometnim cvetjem ga ne pravice jerbo so našega Međimorca, Željkija Kavrana Tozo, šteri je bil unda precednik Hrvackoga rokometnoga saveza, vum zrezali. I to sam zato kaj se je posvadil i rezišel z Zokijom Gobcom, a on još navek vedri i oblači v našemo rokometo. To je ruon tak kak da denes nej Kljuno priznali da je on z dečkima osvojil zlatno želencijo sam zato kaj je več ne znami. Ono kaj čovek jempot osvoji to je jegovo zanavek. Vidite, v teniso je to drugač. Goran Ivaniševič je pred nekaj vejč od petnaest let pobedil vu Vimbldono i on je još navek Vimbldonski pobjednik. Engleze mi moremo meti radi ili ne, ali oni mo priznajo se kaj je jegovo, a i ono kaj je bil, a mi pišemo, krojimo i falsificeramo ono kaj se je pripetilo kak komo paše, tak kaj se črez kratek čas, črez par let, niti ne zna kaj se je pravzapraf pripetilo, a kaj je nešči vum zbrisal ili pak dopisal?
Haenesovci so se našli pozvani kaj bodo dali ocjeno za prvih sto dni nove Vlade. Znali smo da to nebre biti nikaj dobroga. Novo Vlado vidijo kak Titanika šteri plava prema santi leda i sam je pitanje dneva da se bodo zišli? Od toga i takšega Titanika ga ne nikšega hasna i zato si cvilijo v Lepoj našoj, i zemla i ljudi. Čudno je, jako je čudno kak haenesovci tak dobro vidijo, najempot so jim se oči popravile otkak so odišli z vlasti, očem reči, otkak so zgubili vlast. Brzčas so bili na operaciji mrene štera jim je zrasla za vreme „kukuriku“ vlasti jerbo so unda nikaj ne vidli. Nejso vidli kaj je BDP saki den išel prema doli, saki den smo bili se vejč dužni, a i burze dela so bile pune kak nidar do unda, a Zoki i jegovi „kukurikači“ so bili nejbolši do ve v Lepoj našoj, očem reči, od prve Francekove Vlade pak do Zokija. A ova Drašekova Vlada se nikaj ne razme, nikši hasen je ne od je i plava prema santi leda, a to kaj BDP raste i kaj smo saki den se meje dužni i kaj je saki den se meje težakov na burzi, to je čistam slučajno ili pak Drašeko pomaže nekša coprnica. Saki vidi sam ono kaj oče i kaj mo paše, a i nebre se se ruon nejbole videti jerbo još navek hercujejo zimske megle.
Grad Čakovec je došel na svoje. Gracki načelnik, Štef Kovačov, je na Grackomo večo lejpo rekel kak Čakovec more biti v minuso sam dok se živa v toplomjero spusti spod pod nulo. Kak je Štef rekel tak se je i pripetilo. Več duže od mesec dni je v Čakovco se zmržjeno, temperatura je v minuso, tak da je unda ne nikaj čudno kaj je minus i v gracki kasi. Si čakamo kaj tua zima čim predi mine, kaj temperatura odide v plus i kaj se penezi vrnejo v gracko kaso. Unda bode sima leži i Čakovčancima, a i Štefo načelniko.
Nadvožnjak je isto v minuso i to tak kaj so kamijoni hičeni doli žnjega. Da se to predi naprajlo ne bi do toga došlo. Tak vam je negda i trdi Joška zišel. On vam je foringašil z svojim kojekom, pak ga je nešči podučil kak nek kojo ne davle jesti pak bode vejč zaslužil. I jemo je ne trelo tripot reči. Joška je privučal svojega kojeka na živleje brez stroškov. I kaj se je pripetilo? Dok je kojeka nejlepše privčil kaj je ne nikaj jel unda mo je fcrkel. Saka sličnost z čakoskim nadvožnjakom je čistam slučajna. Što bode itak popravljal nadvožnjaka? Nadvožnjak je gracki, gracka kasa je v minuso i nega penez za jega. Mortik bi se moglo dojti do penez prek karitasa ili pak prek prodavanja pogači z tikvaj za Prcinkulovo, nekaj bi se nabralo i v škrlako polek gitariste na glavnomo čakoskomo trgo? Ak to se nej bilo dosti, unda Čakovčarima jedino preostaja samodoprinos. Čuda se je od teh penez naprajlo (bolnice, ceste, škole) pak bi se mogel i nadvožnjak poprajti, ak je več gospon Režek, šteri je gradil nadvožnjaka, ne zafremal zaklado z štere bi se nadvožnjak održaval i popravljal. Ve vidite kak mi moramo popravlati grehe onih šteri so vedrili i oblačili predi nas?
Da sam več spomenul gospona Režeka, morem vam reči da je on, vu ove zimske dneve, mel izložbo svojih bikov i to v belom Zagreb grado. Nej znati kuliko vas zna da on več duže od pedeset let skuplja figurice bikov i bikecov i to od sakefele materijalov. Ima jif od porculana, gline, dreva, železa, kamena, pleha, a i mešane. Kak je on jednako zagrepčanec kak i međimorec unda so mo ovi v Mimari naprajli veliko i lepo izložbo onoga nejlepšega kaj so našli pre jemo doma. Od sih bikov jif šezdeset je melo srečo putuvati v Zagreb! Nesam vam rekel da je gospon Režek črez tua sa leta dimo nanosil vejč od pecto bikov i to z celoga sveta. Kak je i sam priznal, jedino nema niti jednoga z Novoga Zelanda, ali kak on još lojsa po sveto nigdar se ne zna je li još ne bo završil i na Novomo Zelando. To je još ne se, tua izložba Zagreba seli se posle k nam v Međimorje i za navek bode ostala v Muzejo. Ak je več gospon Režek nanosil dimo celi kup bikov unda je i red da to morejo videti si Međimorci, a i si oni šteri se dotepejo k nam na of „falaček zemle med dvemi vodami“ šteroga je Božek za sebe ostavil, a unda ga je dal nam Međimorcaj kaj bode žnjim hercuvali i kaj ga bodemo hasnuvali. Fala gospono Režeko kaj je svoje bike podelil z nami.
Vincekovo je minulo. Bilo je jako friško, ali se je v gorice moralo iti. Morem vam reči da je ščipalo za vuha, ali ga komarcov ne bilo. Si znamo da z Vincekom počnejo posli v goricaj tak ak me nebodete našli doma unda znate da sam negdi v goricaj. V gorice furt hodajo oni šteri delajo, a i mi šteri degusteramo, očem reči, sprobavlemo. Saki ftič vu svoje jato leti!
