Jožek ide v penzijo

Na kaj bode to se zišlo v našemo, očem reči, pulskomo Uljaniko to več niti dragi Božek ne zna. Dok je bil v pitanjo Agrokor i Ivica Todoričov unda je on bil se kriv dok je bil v Londono, dok je z sebe delal Engleza, ali dok je došel dimo, dok so se za jim zaprla jena od vrati v Remetinco se je nekak ftihnulo i več se nišči ne spomina za jega: niti žene na mlekari, niti one na čehari, niti pajdašija v krčmi, a bormeš niti klošari pre čakoski gracki vuri. A tak dugo nam je Ivica bil glavni po sim trač partijama. Ve vidite, v Puli je čistam drugač zišlo, tam je došlo do toga kaj se je istarski Hamlet počel spituvati biti ili ne biti, očem reči, stečaj ili restruktureranje? Dok so se precednik Drašek Plenkovičov, naš minister Darkec i minister za peneze Zdravkec i pulsko-rečki sindikalci ne mogli dospomenuti kaj je nejbole za brodare, a kaj pak je nejfaleše za Lepo našo? Mi z Lepe naše smo več hajdi penez dali kaj so te brodi v Puli i Reki ne potonuli, cirka, okoli četrdeset milijardi, ali kuliko vidimo ve več nema kaj potonuti jerbo se brodi več niti ne delajo.

Ali to je još ne se. Dok smo mi čakali da bode itak bič počil, da bodo našim brodarima odzvonili zdravomarijo poreznjaki i državni revizori so lohnili po paperima i nalohnili so nekše lukje na računima de so negda bili penezi, a nešči jiv je pohalosil, a neje potpisal isplatnico. Najgerek sam, jako sam najgerek kaj bode itak z toga zišlo? Tak čuda smo peneze mi Međimorci i naši prvi sosedi Hrvati dali, tak čuda penez još fali kaj bi se vužgalo svetlo na krajo Uljanikovoga tunela, a ve se još zazvedilo da ga hajdi oni šteri so nosili penze vum črez strgane blanjke i šteri so si gruntali da se to nigdar ne bode zazvedilo. Pozabili so da saka rit jempot dojde na šekret, pak tak i ove brodarske. Furt mi je na pameti ona Arsenova pesma: Kam plava of brod? Najte me krivo razmeti, ali kuliko si ja morem pregruntati, ovi poreznjaki i revizori bodo brzčas z Uljanika naprajli ono kaj je santa leda naprajla z Titanika.

Znate i sami, ne moram vam pripovedati kuliko pot smo bili srditi i kuliko pot smo režali i bavkali na sosede Janeze, kak pesi na mačke, dok so nam naprajli nekaj kaj nam je ne bilo po voli. Odnegda jiv nemamo radi dok so nam jemali nešterne stvari kaj smo kupili v šopingo v Osterajho. Nekak je jim bilo jako gustušno zeti nekaj nam Međimorcaj jerbo so nam šteli pokazati što je tu glavni i što vedri i oblači. Znali smo jif, onak z conom  zvati „zahrptni delavci“ (v Bosni se to drugač zove), došli so stiha i navek so nam nekaj zeli ili pak smo morali platiti carino. Mi i Hrvati smo plačali, a svoje so puščali. Sa sreča kaj smo došli v Evropo, pak nas več ne nateplejo i preteplejo na meji. Znate kak smo se lepo spominali o Deželi i sosedima Janezima dok so nam zeli naše Raskrižje, kaj smo jim se nabajali jerbo nečejo oditi doli z naše Svete Gere, a kaj vas ne bom zmišluval kak je to se bilo i kak je još se to je okoli morja, Savudriske vale i Piranskoga zaljeva. Janezi so kak i tati, navek jim oči halosijo prek meje i dok nekaj lepoga i dobroga prinas najdejo unda tak dugo nemajo mira dok to sebi ne privoščijo. Što bi rekel, a tak lepo i dobro zgledijo? Ali nekši vrag jim da god neda mira.

Tak je to z jene strane, ali nekaj meje od leto dni nazaj so Janezi obrnuli pločo, očem reči, počeli so nam se v rit rivati. Ne znati je li jiv je počela peči savjest kaj so nam se grdoga do ve naprajli ili pak imajo na pameti još kaj kaj toga. Brzčas je to po onoj staroj bibliskoj: Nej veruvati Danajcima (čitaj: Janezima) niti dok ti darove nosijo? Najme kaj, sosedi Janezi so počeli na svojoj televiziji prenašati labodoritaške utakmice štere igra naš zagrebečki Dinamo. Da čovek ne poverje, ali tak je bilo. Dinamovci so ne dosti dobri kaj bi jiv prenašala naša državna televizija, a neso niti dosti dobri kaj bi jiv prenašale ove druge privatne televizije i unda so se tu našli sosedi Janezi tak da smo i mi mogli videti dok so Dinamovci pobeđuvali v Evropi, a i ve dok so v Portugalo odišli po riti k meši. Ne znati de so gledali Dinamovce oni z Hrvacke šteri nebrejo loviti se ono kaj puščajo antene z Dežele? Kuliko moramo Janezima zafaliti, tuliko moramo naše z televizije šinfati. Si jako dobro znamo kuliko nam penez na mesec odnesejo naši televizači i unda ono kaj bi šteli nebremo gledati. I kaj unda moremo, na se zadje, pitati: De so itak te naši penezi kaj naša televizija ne kaže Dinamovce, ne kaže Ligo prvakov, ne kažejo naše vatrene, ne kažejo naše rokometaše…, i kaj nebom dale nabrajal. Čuda bi leži nabrojil kaj nam kažejo nek ovo kaj nam ne kažejo, očem reči, imamo dosti reprizi i turski seriji. Protiv Turčinov smo se još negda borili, i mi i naš Zrinski, i Turčini so nigdar ne pokorili Međimorje naše malo, ali ve prek Sulejmana Veličanstvenog i Istanbulske neveste so nas hitili pod sebe. Kak bubice sedimo pred televizijom dok nam se oni falijo kak so lepi i dobri.

Vidli ste kakša se je halabuka zdigla v belom Zagreb grado dok je na svetlo dneva došla istina kak bode prvi čovek Zagreba i gracki načelnik Milanček Bandičov postal doktor znanosti. I to ne nekši obični, očem reči, prosti, nek počasni. Skočili so i oni šteri imajo prek 130 kil i do ve so ne nikak mogli skočiti, ali ve so skočili. Ve vidite kak tre nekaj malo kaj čoveka gene. Nebrem razmeti kaj je gospono Bandičo to trelo? Ak je štel biti doktor mogel si je nabaviti papere pre sosedaj v Bosni. Tam je to mogel dobiti stiha kaj nišči ne bi mogel gombati. I ne sam to, tam so takši paperi čuda faleši.

Čuda toga je spremagadil naš labodoritaški kapetan Luka Modričov. Zebrali so ga za nejbolšega labodoritaša sveckoga prvenstva v Rusiji, nejbolši labodoritaš Evrope, a unda pak i sveta, dobil je zlatno francusko labodo i ve je, na se zadje, postal i nejbolši športaš sveta za lanjsko leto. Se ove predi nagrade i se pehare je stoječki zel i podnesel, ali ovo zadje, nejbolši športaš na sveto, ga je dotuklo. I kaj se je pripetilo? Naši vatreni so zgubili od Mađarov!

Neje svet, očem reči, zemlja odnavek bila okrogla. Nejpredi so se spominali da je ravna ploča jerbo da je ne tak ne bi ljudi mogli stoti. Ali dok so se počeli spominkovati kak bi ipak zemlja mogla biti okrogla unda so počeli moreplovci  putuvati na jedno strano i dok so obišli sveta unda so nazaj došli tua otkod so genuli, ali z druge strane. Tak se vam je to i pripetilo v čakoskomo Čakomo: Ivek Perhočov je bil negda direktor v Čakomo i unda ga je politika otpelala v županijo za župana. Dok je potepel županovo foteljo unda je  zemlja je okrogla) došel nazaj v Čakom. Par let je stažeral kak šef grobja i ve je nazaj došel za direktora. Verjem da ga ve več ne nikoga šteri ne verje da je zemlja okrogla!

Kak sakomo lepomo jempot dojde kraj, tak i saki težak na krajo svoje dere ide v penzijo. Ak more saki težak unda more i Jožek radnik. Morem vam reči da je bilo dosti toga i mene tuče skradja vura i kaže mi se penzijica. Kak smo mi skupa preživeli zadji dvajsti let unda je red da i vas pozovem na svojo oproštajno fešto. Se vas pozivlem na fešto v pondelek (of pondelek šteri prvi dojde) v deseti vuri pre čakoski gracki vuri. Nekaj bo se našlo za pod zob deti, a i nekaj za premočiti. Najte pozabiti, najte kesniti, makar sam ja dosti pot kesnil na posel bar bi štel na vreme oditi v penzijo. Čakam vas!

Ostavi komentar