Naš Roko Farkaš na krovo sveta, bolši i od Štefa
Imamo i mi Međimorci svojega sveckoga prvaka, a to je devetnajstletni Nedeliščanec Roko Farkašov, šteri je na Sveckomo juniorskomo prvenstvo skočil 8,17 metrov i osvojil zlatno želencijo. I to sam zato kaj je bil nejbolši, očem reči, si drugi so bili slabeši od jega. Kak je to lepo dok svecka želencija, i to zlatna, dojde k nam v Međimorje na te naš “Falaček med dvemi vodami”. Ne moramo niti govoriti kuliko se je let Roko muočil, kuliko let je treneral kaj bi bil nejbolši, ali dok se mo je jempot pružila prilika unda je skočil nejdale. Pred jim ga još hajdi prvenstvi tak da se moremo nadjati još želenciji i još fešti. Zazvedili smo kak je Roko hapil skakati još v pučkoj školi jerbo biti nejbolši na sveto to ne muoči postati prek noči. Kak smo rekli hapil je z treningima v pučkoj školi v Nedeliščo de se je i narodil, a nastavil je vu Varaždino v atletskomo klubo Sloboda. Da se vu Slobodi dobro dela, da so dobri treneri govori i podatak da je osemnajst letna Jana Koščak ruon tak svecka juniorska prvakinja i to v sedmobojo. A kak je mlada neje još rekla zadjo reč, očem reči, neje još pokazala se kaj zna i kaj more. Makar je Jana naša soseda, ali mi smo ne jalnoši nek jednako navijamo kak za Rokija tak i za Jano, oni so svecki prvaki tak da morejo dosti dece povleči na atletsko stazo i to fkrej od televizije, mobitela, kompjutera, kafiča…
Predi Rokija nejdale je skočil Štef z Puščin i to za vreme korone. Štef je sam skočil v pekarnico po kruha, a našli so ga na Varaždin brego i to na šanko.
Zakaj so Budo ne šteli ovi na otoko Ugljano?
Kak znamo pred tri tjedne je hmrl Budimir Buda Lončar i to v Preko na otoko Ugljano de se je narodil i de je živel ova svoja zadja leta, zadje dneve. V Preko se je narodil, v Preko je živel, v Preko je hmrl pak so se si nadjali da bode i zaslužan sin bivše države Juge, šteri je ne mel rad Lepo našo, zakopani na grobjo vu svojemo rodno mesti. No, to se je ne pripetilo i nišči je nigdar ne rekel što je bil protiv da bode Buda zakopani na rodni grudi. Najbrž so boduli s Ugljana meli nekaj protiv Bude pak so ga sforšibali na Mirogoj v Zagreb. Hajdi je dugo živel, prek sto let, a još je ne ftegnol poravnati račune z svojim sosedima na otoko. Ili pak je to po onoj staroj, negdašjoj: saki svojega nejbole pozna!
Da mi je to nešči rekel ne bi veruval
Ne bodete veruvali, ali več leto dni nebremo nikoga najti što bi v direktorskoj fotelji komunalnoga poduzeča Čakom iz Čakovca zamenil Ivico Perhoča. Čovek se ravna v penzijo i mirovino i nebre nikak oditi jerbo nebremo nikoga najti što bi dale hercuval na grobjo i na totoskom smetliščo. Nejpredi smo probali direktora najti po Čakovco i Međimorjo, ali je ne išlo: malo jiv se javilo, a i oni šteri so se javili so ne bili onakši kakše je nadzorni odbor i grad Čakovec kak glavni gazda iskal. A si mi smo si gruntali da je gospodariti z grobjom, smetjom, saditi cvetje po Čakovco i kositi travo tak lefko i da to si morejo. Nebrem nikak razmeti kak je se bilo stiha v Čakomo ovih minulih nekaj vejč od tridesti let, a ve je zaškripalo na smeni direktora. Dobro veli teca Franca, vu zadja leta se se je spremenilo i kaj je negda bilo jako lefko denes je nejteži. Nikak mi nejde v glavo kak je teca Franca tak spametna, a ima sam štiri razrede pučke škole i to pol mađarske. Najbrž so leta donesla svoje. Kaj bom vam rekel, noge jo ruon ne držijo kak treba, ali v glavi je još navek spametna kak vrag. A sam joj malo fali kaj joj se spuni prva stotka.
No, da je problem z smetjom i komunalcima ne sam prinas v Čakovco nek je tak i v Zagrebo. Poznato vam je kak se je več parpot vužgalo smetje v Zagrebo na Jakuševco, kak so zagrebečke vulice pune vreči, konti i kontejneri štere nišči ne vozi, kak nišči ne kosi travo, nišči ne obrezavle drevje, nišči ne sadi cvetje, nišči ne farba tramvaje šteri furt kesnijo i kaj ne bodem dale nabrajal… Zagrebečki gracki načelnik i jegovi igrači nikak nebrejo dojti na kraj z tem komunalnim nevolama i ve so platili stranjske savjetnike, i to pet milijonov ojera, kaj bodo jim rekli kak nek “beli” (negda) Zagreb grad v red dotirajo. Morete vi zeti v pamet kuliko je to pet milijonov ojera? Ali kaj morete, dok je vrag v sili i muhe žere, tak je i Tomica napravil.
Naši stari so rekli: uzdaj se use i svoje kljuse. Zakaj? Jerbo dok se osloniš na sebe bar znaš z kim imaš posla! Bar bi moral znati?
Dinamovcima je v pipi vgaslo
Minuli petek je Dinamovcima prvič vgaslo v pipi dok so jim Hajdukovci očitali lekcijo v Zagrebo, očem reči, v Maksimiro. Najme kaj, Hajdukovci so došli v Maksimir onak stiha i šteli so kaj čim meje zgubijo od Dinamovci šteri so se zalaufali v našemo labodoritaškomo prvenstvo i čakali so Bajerna v Ligi prvakov. Neje se bog zna kak igralo, ali so, na se zadje, Hajdukovci pobedili, a gola je zabil Marko Livaja. Saka čast pobedi “belih ftičov”, ali se Torcida ne skazala jerbo so kurili kak da so doma na Poljudo. Dinamovci so ne mam došli k sebi nek drugi den vjutro i falili so se kak bodo očitali lekcijo labodoritašima Bajerna v Minheno i da se pobjeda Hajduko trefila. V Maksimiro je osvanul grafit:
Posle velike pobjede Hajduka v Zagrebo, igrači Hajduka se obraćajo k svojim evropskim obavezama, gledanjo utakmice Lige prvakov Bajern – Dinamo!
Neso si kibici Dinama niti mogli misliti z kakšim veseljem so Torcida i Hajdukovci gledali utakmico z Minkena, a posebno drugo poluvreme. Verjem da si znate kak je Dinamo fasoval 9:2 i v Minkeno mo je drugoč vgaslo v pipi. Dok tak zgubiš nemaš se kaj buniti na soca makar je španjolski sodec Munuera zmislil tri elvere. To so bili takši elveri štere negdašji varaždinski državni sodec Marijan Rauš ne bi niti svojemo brato dosodil. No, kak je bilo bilo je, Dinamovci so odišli po riti k meši, a jedino kaj jim ostaje je kaj se zmislijo kak je velika Barcelona i to z Mesijom, pred štiri leti, zgubila v Minkeno 8:2 tak da so ve Dinamovci egal z Barcelonom. Za Bajern je unda igral dofčerašji Hajdukovec Ivan Perišič i zabil je jenoga gola. Se se moremo spominati z Dinamovcima sam kaj ne bodete nikaj pitali za ovih 9:2. Malo treba kaj se tua velika nevola pozabi.
