Hajdi vode je preteklo i spod pod mostima na našemo međimorskomo potoku Trnavi predi nek se je zazvedilo kak je negdašji precednik hrvacke Vlade Ivo Sanaderov ne nikaj kriv. Soci so sima nama rekli kak je Ivo Sanaderov kak precednik Vlade ne zel nikše peneze od Hypo banke. Ne bodete veruvali kuliko je rešti Ivo spremenil vu minulih trinaest let, kuliko pot je zbetežal, kuliko je živci zgubil kaj nem spominjal kak je štel pobeči vum z Lepe naše, ali so ga cariniki na meji z Deželom prijeli dok si je išel „mejat zimske gume“ i se one hucvuntarije štere smo meli priliko videti, čuti i doživeti. I pitam vas, ruon tak kak i sebe: čemo se to ak je čovek ne nikaj kriv? I još nekaj, pak kaj našim socima i fiškalima tre tak čuda cajta kaj zazvedijo je li je nešči nekaj kriv ili pak ne?
Nekaj tu ipak ne razmem: Bankari so priznali da so dali peneze, a ve smo zazvedili kak so ne došli do Ivija? Kuliko pak bodo cajta ve nucali naši sodi kaj zazvedijo kam so itak odišli te penezi šteri so bez potnoga naloga odišli z Hypo banke i si so pripovedali kak so završili v Ivijovim žepima?
Ve dok vidimo kak so fletni naši soci unda moramo reči kak nišči od naših penzionerov se ne bode fčakal kaj bi zazvedil kaj i kuliko so krivi ovi kaj so prodavali Ininoga plina i kaserali milijardo kuni. Najte me krivo razmeti, ali predi bode i Hajduk postal prvak Lepe naše v labodoritanjo! Nejnoveša Zg purgerska kletva: Smetje jeno nesorterano!
Dinamovci so se poškliznoli v Ligi prvakov
Skorom si znuomo kak so Dinamovci zigrali ove štiri utakmice štere so do ve igrali. Nejpredi so pobedili Engleze, londonski Čelzi, a posle so zgubili v Milano pak vu Salzburgo. Posle toga so v Maksimiro odigrali ejnštelj z Austrijancima tak da so ve zadji na tablici. Planerali so da bodo, prek Austrijancov ostali i na prtuletje v Evropi, ali so mesto planeranih, nejmeje, štiri bodi osvojili sam jenoga. No, to nej bilo tak strašno da so ne Austrijanci osvojili štiri i tak so hitili zagrebečke modre na zadje mesto. Makar je se zišlo drugač nek so Dinamovci planerali ipak so oni još navek v igri (tak je rekel i Dinamov trener Tonček Čačičov) i tak bodo dugo dok se bode igralo. Zakaj nej Dinamovci pobedili Milan v Zagrebo kak so to naprajli z Englezima?
Napriliko „beli ftiči“ (čitaj: Hajdukovci) nemajo takše probleme kak Dinamovci i nikak nebrejo ispasti. A zakaj nebrejo? Zato kaj so ne niti hapili igrati v Ligi prvakov.
Ak Zagrepčanci ne znajo kam z smetjom nek pitajo prinas v Tehnikso
Več leto i pol oni kaj se „Morejo“ i jivi pajdaši hercujejo v belom Zagreb grado, a glavni med jimi je Tomek Tomaševičov. Neje bilo tak zdavnja pak se si jako dobro zmislimo, a i teca Franca je ne pozabila, kak se je Tomek delal norca z Bandiča i jegovih smetlarov, a ve ne zna kam bi z smetjom. Tomek je ne stoprocentno siguren je li bi purgeri trebali smetje metati v konte ili pak vu vreče? I ne sam to, nebre si nikak pregruntati kakše farbe bi te konte ili pak vreče morale biti? Kaj nek vam rečem, to sorteranje i prebiranje smetja je tak zakompliceral kaj niti sam ne zna v kakšo konto, očem reči, v kakše boje konto se meče kakše smetje? Do dneva denešjega je zebral šest farbi konti, a još dosti smetja ostaja okoli konti. Znate kak je to dok nekaj nompak gene unda dojdejo na svetlo dneva i oni problemi na štere je Tomek ne računal, tak ve lezbijke i pederi očejo meti konte vu svojim farbama. Si znuomo da so to farbe rodice, ali so ne, niti one, a niti oni, nikaj rekli je li oni kanijo se smetje metati vu te svoje pederske kante ili bi oni i nekaj sorterali. Bogec Tomek ve ne zna kaj bi tu napravil, i lezbe i pederi so jegovo biračko telo i teško je nekaj protiv jiv naprajti.
Nejfletneše so se znašli Priločanci z priločke Sredje škole. Sima nam je poznato kak Priločanci nejbole v Lepoj našoj znajo kam se štero smetje meče, pak so otprli večernjo školo o sorteranjo smetja. Ne bodete veruvali, ali razred se je popunil črez tjeden dni, a nejveč đakov imajo ruon z belog Zagreb grada. Purgeri, šteri očejo kaj bode Zagreb i dale beli, a ne znajo kak to naprajti, so se zapisali vu priločko večernjo školo. Priločanci so nam sima pokazali kak se i z smetja more dober „biznis“ naprajti.
Deca na jenoj, a škola na drugoj strani
Čakosko Gracko veče je svoje reklo, čakoska četrta pučka škola bode se delala na Vojnim vrtima. To je čakoski hatar bliže Miholjanaj. Spominek o toj školi je bil još pred vejč od deset let, pak si ve furt gruntam zakaj bi se škola delala tam pre Miholjanaj ak so zgrade z decom napravlene na čakoskom Semiščo? Na semiščo ga jeno dvanajst zgradi vu šterima stanuje hajdi mladi familiji štere imajo deco kak za zabavišta tak i za školo. Najbrž bi bilo čuda bole da bi se škola naprajla bliže deci, napriliko vu vojarni de ga je dosti mesta kak za školo tak i za dvorano. A dvorano bi mogli hasnuvati i študenti na MEV-o tak kaj bi Čakovčanci mogli z jenim udarcom sfondati dve muhe. A i negdašji GK ne Semiščo je gracki i tam hmajikuje!
Kulturnjak Romano se nekaj zameril čakoskim večnicima
Več se hajdi dugo črno kadelo z rafunga čakoskoga Kulturnoga centra. Sako malo je Romano Bogdan kak ravnatelj bil na dnevnomo redo i furt so mo članovi Kulturnoga upravnoga vječa našli nekše falinge. Nesam ruon veruval da so to tak velike falinge kaj bi mo vječniki podmeknoli ravnateljsko foteljo, ali na se zadje je Romano kak ravnatelj odišel v ropotarnico povjesti Kulturnoga centra. Morem vam reči da dok smo to zazvedili teca Franca si je ne mogla najti mesta. Znuom da ona Romanija niti ne pozna, znuom da ga je vidla sam na sliki v cajtungima, ali skorom so joj pobegle suze. Ne mi je znala reči zakaj joj je Romano tuliko prirasel srco, ali dva dni je mela visokoga tlaka, a i srčeko joj je tuklo čuda bole nek normalno. Kak bilo da bilo Romano je odišel po riti k meši i to tak naglo kaj se je premilil SDP-eovcima i to bili so protiv smene i to ove nagle. Ve vidijo kak je to bilo dok so oni vedrili i oblačili skupa z grackim načelnikom Štefom i da so kajkaj koga zmenili, a kaj je nišči pravzaprav ne znal zakaj se je to pripetilo. Kaj reči, vlast je slast štero je dosti pod teško držati na cuglama.
Jempot je nešči jako spametno rekel: – Zapamtite ljude po šterima gazite dok idete gori jerbo bodete se žnjimi zišli dok bodete se spuščali!
