O mrtvima se nejlepše…
Papa Franjo je bil dober čovek i dober papa tak dugo dok so ga ne zakopali, očem reči, dok mo je sprevod ne minul, a posle toga je došlo vum i ono kaj smo ne znali. A ne smo znali da je on bil samo čovek makar je bil gospodar „Božekovoga vinograda“ na ovi naši zemli i da je napravil dosti falingi štere so ne došle na svetlo dneva tak dugo dok je on hodil po ovomo našemo sveto i dok je v rokami držal svojega papinskoga ščapa. Jeni so bili za to kaj se mo nabrojijo si jegovi grehi štere je napravil kak papa dok o drugi bili stoprocentno sigurni da je Franjo bil papa kak treba i da ga tre preprajti kaj bode i on, črez kratek čas, postal sveti. Rekli bi mi ili bode čakal na red kak naš Lojzek. Si znuomo da je denes teško biti spameten i da so vremena teška kak nigdar do ve tak da je prava istina najbrž negdi izmeđo.
Najgerek sam, jako sam najgerek, kaj je papa Franjo otpovedal svetomo Petro pre nebeski vrati dok ga je Peter pital zakaj je itak ne proglasil našega Lojzeka svetim? Još me nekaj gvinta, kaj bode papa Franjo rekel našemo Lojzeko dok se zidejo v nebeskim dvorima zakaj je on još navek v drugomo redo kak blaženik, a neje vu onoj vekšoj grupi de so sveci? Znuom da to nigdar ne bodem zazvedil, a tak bi štel znati. I teca Franca me furt nagovarja nek probam zazvediti?
Denes dok vam ja pišem ovo svoje premišlavanje počela je konklava vu večnomo grado Rimo. Tam so se zišli kardinali z celoga sveta, jiv 133 mlajših od 80 let šteri imajo pravo glasa i tak dugo se ne bodo rezišli dok ne bodo, med sobom, zebrali novoga papo. V sredo navečer se je z rafonga Sikstinske kapele pojavil prvi dim i to črni. Spominki med kardinalima ido dale.
O mrtvima se nejlepše, drugo so si niti ne zaslužili!
Međimorska županija je nejbolša v Lepoj Našoj
Verjem da ste to, skupa z menom, dosti pot čuli. To smo čuli i ve za Den županije i Spomenden Zrinskih i Frankopana 30. aprila dok so župan Matija Posavcov i precednik Županiske skupštine Dragec Glavinov podnašali račune za minulo leto. Čuli smo kak smo dobri, ne sam dobri nek i nejbolši vu Lepoj Našoj. Mi smo lokomotiva gospodarskoga napretka i druge županije se hodajo k nam vučit ak očejo biti bar blizo nas. Neje to od fčera jerbo naša županija strči po napretko več par let med sim drugim županijama v Lepoj Našoj. Dok bole gledima to je najbrž tak makar vam ja ne pratim preveč druge županije, ali kuliko vidimo bivši precednik Stipe Mesičov hoda jedino k nam v Međimorje dok svetkujemo svoje dneve i nejde nikam drugam, očem reči, v niti jeno drugo županijo. A kuliko on poštuje naša županijo se vidlo ovo leto da je došel k nam za Den županije i to z bolnice. Da nas ne bi poštuval i da mi ne bi bogzna kaj vredili najbrž niti ne bi došel. A si znuomo da je Stipe Mesič ne bilo što: on je bil hrvatski prolječar, bil je zadji precednik Juge, prvi precednik Vlade Republike Hrvacke, a bil je i precednik Sabora Lepe Naše. Posle tog je na raskrižjo ne skrenul desno nek levo pak je z Jožom Manoličom ostavil HDZ-e i osnoval novo stranko HND štera je ne ruon bila tak dobra kak so to Stipe i Joža splanerali tak da je Stipe črez štiri leti odhajal v HNS. Kuliko nam je poznato biračko telo Lepe Naše mo je sa tua jegova lutanja oprostilo i dvapot ga je zebralo za precednika Lepe Naše. Posle toga, posle 2010. postal je bivši precednik Lepe naše šteromo je Međimorje naše malo nejlepša i nejbolša županija i da god ima priliko on nam to dojde reči. A i kuliko sem uapel zazvediti on to pripoveda i drugima. Nebrem reči da nas fali, ali pripoveda sima drugima isto kak smo mi pravzaprav nejbolši.
V Čakovco je nejvekša stiska?
Otkak so si gracki i opčinski načelniki zdigli plače, hajdi naših lokalnih političarov bi štelo dojti na tua radna mesta štera so jako dobro plačena. Neje da je to kruh brez motike, ali sima nekak paše kaj posle sakoga meseca, šteri jako fetno prejdejo, dohaja lepi kupček penez. Em so lepi penezi, em so (grado)načelniki glavni vu svojim opčinama, a župani vu svojim županijama. Nejvekša stiska je okoli gradonačelnika Čakovca jerbo je tu plača nejvekša. Čim se je to zazvedilo mam je i negdašji gracki načelnik Štef Kovačov dobil voljo kaj bi znova bil prvi čovek Čakovca, a dok je Boška Ban Vlahek zazvedila da je plača vekša v Čakovco nek vu Saboro i ona se je prijela za lokalno politiko. Tu sam nekaj sfušal, pak Boška ak bode zebrana unda bode mogla dobavljati dve plače, jeno v Zagrebo, a drugo v Čakovco. Kuliko smo vidli Štef Kovačov se je jako zaintereseral za gradonačelničko foteljo jerbo je posle štiri leti znova došel v cirkvo kaj reče svojemo biračkomo telo, štero verje da naš dragi Božek postoji, da je on znova vu igri i da nuca jive glase. Ne znati kuliko ljudi znajo da je on prebjeg, očem reči, da je prebegel z SDP-a v HSS, a niti esdepeovci, a niti pak „seljaki“ ne delajo preveliko stisko po cirkvama. Poznato nam je da so SDP-ovci navek pre cirkvaj prešli na levo strano vulice, a „seljaki” so zgubili i vjero v Boga, a i seljačko slogo čim je stranko zel vu svoje roke Krešo Beljakov. On se ne briga preveč niti za Lepo našo, a niti pak za “seljake”, ali se zato briga za sebe i svoj žep. Štef i Boška so obedva ostajli „prvo ljubezen” SDP i prebegli: Štef k “seljakima”, a Boška k Štefo! Najgerek sam kak bode itak zišel Štef Kovačov na ovim izborima pred nami? Istina je da je Štef kak dečec popeval v cirkvi, ali to je bilo zdavnja, ali dok je kak mladi političar došel do prvoga raskrižja odišel je levo makar so mo si govorili nek tua nejde jerbo tam Božeka ne bode našel. A znate kakši so te mladi političari v uspono, ne poslušajo nikoga.
Nejspametneše je župan napravil, on si je ne zdigel plačo pak se nišči preveč ne rivle vu jegovo foteljo, ali zato so čuda vekše stiske okoli fotelji dožupana!
Oni šteri mislijo da se znajo, idejo na živce nam šteri znuomo da se znuomo!
Vi pitate, pak vam moram reči…
I ne sam vi nek me i drugi pitajo je li bode Karolina mogla biti naša prva županica, a Simona jena zamjenica i je li bodo one dve mogle voditi županijo. Stoprocentno bodo mogle, ali jiv nejpredi moramo zebrati ak očemo da nam one to pokažejo i dokažejo. Ak jiv zberemo bodemo meli nejlepšo županico i zamjenico do ve!
