Ceplenje je pomalem genulo, ali ono zaprav, a ne sam prek veze i mimo reda. V minulo soboto je vcepleno malo vejč od jezero, a zutra se planera da bode pala i druga jezera i to se tak pomalem od subote do sobote od petke do petka od svetka do svetka dok si ne dojdemo na red. Očem reči si šteri smo se zapisali jerbo kuliko so nam rekli zapisalo se i stalo je v red nekaj vejč od deset procentov Međimorcov i Međimorki, med jimi so i Čakovčanke i Čakovčanci, a o ni drugi si još gruntajo je li bi zeli toga lekeca (nešterni si gruntajo je li bi zeli inekcijo ili pak vakcino) ili pak bodo još malo počakali i skrivali se pred koronom, štera bode mortik vpešala posle leto dni kak se je dorivala na of naš hatar. Nišči ne zna kaj te korona viros ima v plano i kak dugo još kani hercuvati po ovomo našemo sveto?
Još nam je ne nišči točno rekel štero je cepivo nejbolše, a štero pak je ne bogzna kaj. Nekak se si okrajajo od AstraZeneca, a toga cepiva so naš minister Vili Beroš i jegova desna roka Kruno Capakov nejveč kupili. Ali kuliko poslušam na radio i po televiziji tua Astra je saki den se bolša i bolša tak da i jo bodemo potrošili i ne bode potkvar došla. Nejsam ve točno vpučeni je li si moremo zbirati z šterim cepivom nas bodo vcepili ili si moremo zbirati tak dugo dok ga je, a čim nejpredi jeno, a unda i ono drugo sfali unda si moremo zebrati sam ono tretje štero je ostali ili pak oditi vum z reda i znova stati v red. Ali ne ta den nek tre dohjti drugi pot. Najbrž so i zato takše stiske i takši redi v Zagrebo kaj si dohajajo mam od jutra dok si još morejo zbirati cepivo? Ak mene pitate sa so cepiva dobra i čim korona vidi da ste vi vcepleni, a pozna vas po duhi, mam glavo fkrej obrača i odide dale iskat novo žrtvo štera je još ne vceplena!
Velijo ovi šteri so bliže ogjo i šteri se bole grejejo pak jim je ne zima, da se moramo vcepiti ak očemo kaj ne bodemo morali i dale nositi maske i kaj si bodemo mogli jeden drugomo ili pak jedna drugoj stisnuti junačke pesnice, a ne sam kaj se bodemo povohali i odišli dale kak ve to več delamo leto dni. Ne znati kaj si gruntajo ovi v stožero za one šteri se ne kanijo cepiti je li bodo morali nositi značke ili pak nekaj drugo kaj bo se znalo ili bode jim oproščeno kaj ne verjejo v cepivo štero je naša Vlada kupila??? Za ve to niti dragi Božek ne zna!
To kaj se maski dotikavle vredi za se sam za školarce ne, očem reči, ne vredi furt i navek. Najme kaj, dok so v školi unda so jim furt maske na gopcima, a čim odidejo vum z škole i špancerajo se po parko, grado ili pak pijejo kave ili pak nekaj drugo za vum tam (TO GO kak se to spametno i evropski veli) maske več ne treba. Kak je teca Franca rekla, korona je zaprla kafiče i krčme pak ona tua ne hoda i tam smo sigurni. Teca je več hajdi dugo na sveto, došla je predi drugoga rata, tak da je ona hajdi toga preživela i hajdi toga zna.
Prepoveda se da i naši biologi, epidemiologi, farmaceuti, rakijaši i vinari delajo na tomo kaj bodemo i mi v Lepoj našoj meli svojega korona virosa pak ne bodemo valjda mi i tuj zaostali. Ak si imajo svoje, ak more Irska meti svojega, unda je nekak čistam normalno da i mi imamo svojega? No, ali naš bode ipak drugo formo od sih drugih jerbo mi dok nekaj delamo unda je to ne da je dobro nek je i nejbolše na ovomo sveto. I ne sam to, našega virosa ne bodo mogli si dobiti, on se bode delil sam prek vezi i to ak imate deblešo vezo predi ga bodete dobili!!??
Čistam je nekak normalno kaj se krčmari bunijo kaj jiv naši stožeri držijo tak dugo zaprte, pak ljudi moji oni od toga živijo, očem reči, v krčmaj oni služijo kruheka za sakodnevno preživljavanje, a več so zaprti (i brez kruha) cirka tri mesece. Neje lefko ili kak jena naša krčmarica veli, grdo je, jako je grado, em nemajo doma kaj delati, em nemajo kaj jesti. Dok se naši političari i ovi dečki i puce v stožero spominajo o krčmama unda so jim navek na pameti krčmari, a jiv je v Lepoj našoj cirka sedemsto jezer, a nišči se ne spomina o dva milijone ženi duši štere tožno gledijo vu zaprta vrata na krčmaj. Dok denete skupa krčmare šteri ne delajo i nas žene šteri ne pijemo to je skorom cela Lepa naša i rečite mi unda kak bode preživela ona ak smo mi več dugo na najgi?
Ve vidite kaj korona dela, labodoritaši z Engleske nebrejo igrati niti v Španjolski, a niti pak v Dojčlando i sa je sreča kaj jiv očejo pustiti na igrališče ovi v Mađarskoj i Rumunjskoj. Nebrem veruvati kak so Englezi pitomni i igrajo tam de jim velijo i ne bodete veruvali kam dojdejo tam pobedijo. Kaj reči, na jeni strani jim je korona nekaj zela, a na drugoj jim je pomogla kaj pobeđuvlejo. Sako zlo za nekše dobro, kuliko vidimo!
Napriliko našim međimorskim labodoritašima je korona naškodila jerbo je predugo trajala. Dok je Goran Vincetičov bil trener naši so bili na tretji mesti, ali je to ne bilo dobro. A zakaj je ne bilo dobro? Goran je delal i pobeđuval z našim dečkima, ali je štel i za to plačo dobiti, ne sam on nek i dečki. Magadil je dugo, ali dok so se v klupski kasi prijele paučine unda je i on hitil puško v kuruzo. On je odišel, došel je drugi trener, a kola so genula doli z brega tak da so naši labodoritašive ruon tak tretji, ali od zadje strane i na pravomo so poto za tretjo ligo. Što bi v petil nam Međimorcaj? Nekaj kaj vredi tre i platiti, minoli so oni cajti da je dobra roba bila fal. Ili je, najbrž, to nigdar niti ne bilo. Fal ili zabadav nega nigdi, soseda Barika je nejbolša vu vulici, makar so jena potna vrata furt otprta, ali nebreš dojti k joj z praznom rokom ili pak z praznim žepom! Niti je doma ne zabadav, a ne kaj bi bilo pre sosedi kak god smo si mi zdobra!
