Historia est magistra vite – povjest je tu kaj se nekaj od je navčimo

Živleje je hapilo čuda predi nek smo mi došli na of naš svet zato i mi moramo, kuliko moremo, čim vejč toga znati kaj se nej pripetilo kakne bi znali de nam je mesto na ovoj našoj kugli zemaljkoj, očem reči,de nam je mesto pod ovom kapo nebeskom. Ak malo bole poglednemo nazaj, ak poglednemo kud so hodali i kud so se tepli naši stari, naši Hrvati, a posebno naši Međimorci unda bodemo zazvedili, kaj se naših genov i naše genetike dotikavle kak smo mi Međimorci ne Južni Slaveni, kak se nam več hajdi let pripoveda neg smo mi Stari Hrvati ruon tak kak i Dubrovčani. Mi Međimorci i Dubrovčani smo pomogli kaj so Hrvati v Lepoj našoj meli svoje kralje več v 10. i 11. stoletju. Verjem da ste čuli za prvoga hrvackoga kralja Tomislava, pak unda Trpimira, Krešimira, Zvonimira, Branimira, Štefa…. i kaj nem dale nabrajal. I hrvatski kralji so se krunili vu hrvackomo kraljevskomo grado Knino čuda predi nek so Srbi zazvedili za jega.

A to kaj smo mi Međimorci Stari Hrvati znači da smo mi Međimorci na ovomo našemo sveto ne od stoletja sedmog kak drugi Hrvati, nek smo bili tu dok se je Jezuš narodil i dok je hodal po ovomo našemo sveto. Međimorci so Jezušo nosili dare vu štalico i to mam posle Tri Kraljov. Ak je to tak, a stare prašnate knige velijo da je tak jerbo povjest nigdar ne laže ak ne računamo na denešje povjesničare-filozofe, šteri prekajajo povjest i furt nam rivlejo pod nos da je svet počel postojati posle Oktobarske revolucije dok se je komunizam dorival na svetlo dneva. Zato verjem da bi moglo biti točno ono kaj na Interneto piše jerbo Internet, bar za ve zna se, očem reči, zna tuliko kuliko si mi kaj se potucamo i lojsamo po ovomo našemo belomo sveto:

Joža Manolič nam se je na prtuletje žalil kak je on ne mel Vuzma i kak je ne farbal jajca dok je bil mali jerbo je mali Isusek još bil na sveto. I ne sam to, Joža je priznal kak je Jezuša videl sam jempot i to na Zadjoj večerji jerbo je tam delal kak konobar prek student servisa.

To bi moglo biti točno, ali ne da je to bil naš Joža nek so to bili Manoliči kak Stari Hrvati, ali to se moglo priprertiti sam ak so stari Manoliči bili z Međimorja. A zakaj nej oni (čitaj: Manoliči) svoje živleje bili započeli v Međimorjo, a unda se preselili v Podravino, pak v Bjelovar? Pak je i svet, tak se bar pripoveda, i to pripovedajo oni šteri so prečitali nejveč prašnati knigi, nastal prinas v Međimorjo. Sima je poznato, a verjem da i vi znate, kak je svet nastal na falačko zemle med dvemi vodami, rečite mi, prosim vas lepo zakaj to nej bilo na našemo falačko med Dravom i Murom. Zakaj?

                Župan je odišel z Međimorja

     Sake štiri leti hodamo glase davat da bi zebrali nove-stare političare šteri bodo znami kormanili štiri leti. I tak sake štiri leti znova. Istina Božek da hajdi pot zahuzamo, unda hodamo znova i nejvečpot se nikaj ne pripeti. Ako mi zahuzamo dok zbiramo unda bar nikaj ne gombamo. Nemamo komo! Kak političari imajo svoj rok trajanja tak se i naši velečasniki po župama mejajo sake tri-štiri ili pak još vejč let. Oni so težaki v Božekovom vinogrado pak jiv provincijali ili biškupi pošiljajo tam de jiv nejbole nucajo. Tak je i ovo leto dosti velečasnikov šteri so hercuvali po međimorskim cirkvama i župama poslano v druge cirkve. Minulo leto je župnik na čakoskomo jugo bil fra-pater Jožek Župan i dobil je „prekomando“ v Podravino tak da je odišel z Međimorja, odišel je z Čakovca i ve je župnik v Rasinji. A Rasinja vam je na hataro od Ludbrega prema Koprivnici, očem reči, Križevco tak da ve i naša Međimorska županija ima sam jenoga župana.

Nikola Šubič Zrinski Sigecki       

     Minuli tjeden je čakoska Zrinska garda z svojim pajdašima organizerala obilježavanja 456. letnice Sigecke bitke  i pogibije velikog našeg junaka i leonide Nikole Šubiča Zrinskog. Garda, gardisti i si oni šteri poštuvlejo Zrinske dojdo sako leto k Mauzolejo Zrinskih pre Sveti Jeleni i tam se poklonijo našim junakima i zafalijo jim za se kaj so naprajli za nas Međimorce i za nas Hrvate. Se je to lepo i dobro, fala jim, ali očem zašpotati medije, ovakše i onakše kaj jako malo i jako slabo pišejo o tomo, a to je nam jako važno jerbo je Čakovec – grad Zrinskih, a naša županija Županija Zrinskih. Morem vam reči da državna televizija dojde sako leto, a ovi z cajtungi i drugi kaj pišejo ne ftegnejo dojti pak prepišuvlejo jeni od drugih i to unda dojde polovično. Napriliko, nišči je ovo leto ne videl da je mešo v Šenkovco služil biškup v miro, monsinjor Josip Mrzljak. Bitka pre Sigeto je bila velika, naši branitelji so si dali svoje živote sam kaj Turci ne bodo išli dale, a unda prečitate v novinaj par redi i to meje nek piše o tomo zakaj so paradajz i paprika podražili? Več bi morali znati kaj nam je važno i o tomo pisati i povedati ljudima. Pak neso Zrinski sam gardini makar je garda Zrinska!

I Erdogan je došel v Lepo našo!!

     Turskoga precednika Erdogana je naš precednik Zoran Zoki Milanovič pozval k nam v Lepo našo kaj se bode na našemo hataro žnjim spominal o našim Hrvatima v Bosni de se Izetbegovič i jegova družina zbrčkavlejo žnjimi. Ne znati čemo se Zoki nadjal pre Erdogano ak mo je of več v muslimanskomo Sarajevo rekel kak je on protiv kaj bi se izborni zakon menjal, kaj znači da se tam niti na ovim izborima, šteri so pred nami, ne bode nikaj pripetilo kaj bi naši Hrvati mogli normalno dihati, očem reči, kaj bi v Bosni meli ono mesto štero jim pripada jerbo so Hrvati bili v Bosni predi tam nek Srbi i Muslimani. Ali, kak zgledi, ve so nekša druga vremena, drugi cajti i druge se pesme igrajo. I ne sam to, Zoki je pozval Erdogana v Lepo našo točno sedmoga septembra dok mi obilježavlemo obletnico Sigecke bitke. Nebrem razmeti kak smo ga ne mogli pozvati bilo šteri drugi den, osim toga imamo još 364 druge dneve. Sramota je, velika je sramota ak mi ne znamo na šteri den nam je Erdogan došel i zakaj je došel ruon sedmoga septembra i otpral džamijo vu Sisko. Ak mi ne znamo, on sigurno zna! KUliko pot smo več ponovili da narod šteri ne zna i ne poštuvle svojo povjest nebre iti naprej, jer historia magistra vite est!

Ostavi komentar