Geni, geni kameni pak srebrni

Minuli tjeden smo odsvetkuvali godovno svetoga Vincija šteri je zaštitnik goric, goričnih težakov, trsja, vina, pelnice i pelničnih težakov. Makar je sveti Vincek nigdar ne mel gorice, ali so si ga gorični i pelnični težaki zebrali za svojega zaštitnika. Z Vincekom znova počnejo posli v goricaj, očem reči, z svetim Vincekom počne novo gorično leto. Z godovnim svetoga Vinceka i žene dohajajo nazaj v gorice. Verjem da ste znali kak od svetoga Tinčeka (čitaj: Martina) pak do svetoga Vinceka žene ne dohajajo v gorice nek to delajo sam moški. A zakaj? Zato kaj ga v goricaj ne nikšega posla ak ne računamo pretakanje vina i z to z lagvi i kupici v navek žene i suhe moške požerake.

Ovo leto, očem reči, ovo zimo, za samo sveto Vincekovo se je hajdi ljudi i ženi klatarilo od goric do goric, od pelnice do pelnice i tak preslavilo početak novoga goričnoga leta. Si so jedva dočakali kaj se genejo z hiži i kaj se malo prešpancerajo po hataro našega brežnoga Međimorja. Verjem da znate kak je to nigdar ne prešlo brez rezanja rozgvi i zalevanja trsja z vinom kaj donaša rodno trsje na jesen. A dok se to zbavi unda si skupa navalimo na pune stole, pune kupice, a se to z tamburašima i tancanjem. Dok so kakše god fešte po goricaj nigdar ljudi ne sfalijo. Kak se i šika. A čim so fešte minule počnejo posli po goricaj, a dok se dela unda so ne takše stiske, nejveč pot morete videti gazde goric i jive žene. No, ne bi vam štel zatajiti, ali tu i tam se doklatari i nešterni gorični pajdaš, ali nejveč pot unda dok je gazda pre stolo, a liter i voda na stolo. Kaj malo pomore!

Naši rokometaši, naši kauboji so nas pune dva tjedne držali pred televizoraj kaj smo drukali za jiv dok so igrali na Evropskom rokometnom prvenstvo. Otprajli smo jiv v Osterajh, de so igrali prve tekme, kak zadje bokce i nesmo jiv davali nikše šanse. Najme kaj, dok jiv je naš rokometni trener sih trenerov (kak Čiro v labodoritanjo), Lino Červarov pozval pod državno zastavo pol jiv je bilo betežno i poslal jiv je na bolovanje tak da smo se nikšemo dobromo ne nadjali. Ali dok so počeli igrati se je to drugač zgledalo. Dečki so igrali igrali čuda bole nek morejo i to ftruc. Pobedili so se po redo i nejso se preveč sekerali što igra protiv jiv. Tak je to išlo se do finala. Morem vam reči da so i vu finalo bili čistam blizo, ali neje išlo, Španjolci so bili bolši i odnesli so dimo zlatno želencijo, a naši kauboji so došli dimo z srebrnaj želencijaj zlatnoga sjaja. Kak i labodoritaši pred dve leti z Rusije. A več sam se prepravlal kaj napišem: rokomet je igra vu šteroj na sakoj strani igra po sedem rokometašov i to z golmanom, a na krajo pobedijo Hrvati. Kak bilo da bilo naši športaši, naši Vatreni, naši Kauboji navek pokažejo Evropi i sveto kakši smo mi Hrvati ljudi, kakši smo športaši, očem reči, da smo mi Hrvati nejbolši športaši na sveto kaj se za naše političare nikak ne bi moglo reči.

Moram vam reči da so za naše rokometaše, naše kauboje igrali i rokometaši z Hercegovine i to pol, očem reči, osem od šesnaest kuliko jiv igra. Zakaj so oni igrali? Zato kaj tam, na kameno rastejo, veliki i jaki dečki šteri znajo igrati rokomet. Hercegovci so: Šego, Karačič, Šarac, Hrstič, Marič, Mandič, Musa i Mamič. Se je bilo dobro dok so igrali i dok so dobili srebrno želencijo okoli šijaka, ali dok so došli dimo i dok so si v glavnomo hercegovačkomo grado naprajli fešto i dok jim je popeval Tomson unda so postali ustaše. Oni šteri navek se nejbole znajo i šteri se za se brigajo so jim bajali kak so slavili vu zmišlenoj državi Hercegovini. Nebrem razmeti naše ljude, Herceg – Bosna je zmišlena država štera več prek dvajsti let ne postoji, a sosedi polek so zmislili svoju državo Republiko Srpsko i ona je tu makar so i jo zabranili, ali ona več ve nikomo ne smeta. Mi Hrvati smo navek vekši katoliki od pape.

Ne znati koga bi itak naši srebrni rokometaši, naši kauboji, morali pitati kak bodo,  z kim i da feštali z želencijama okoli šijaka? Je li bodo smeli popevati Gene kamene i Lepa li si? Mortik glavnoga „seljaka“ Krešija Beljaka?

Puščeni je v promet novi rotor pre Remetinco. Još je niti dva – tri dni ne delal več so mo našli falingo: sam jena traka skreče prema rešto. Velijo: čuda premalo!

Kuliko vidimo Milani v Lepoj našoj nemajo srečo, jeden je odišel po riti k meši, a drugi je ve prvi na redo. Tak bar velijo ovi pre čakoski gracki vuri šteri se nejbole znajo. Verjem da znate o komo vam pripovedam? Of šteri je odišel je ve več negdašji minister za zdraviče Milan Kujundžič, a of šteri je ve prvi na redo za odstrel je zagrebečki gracki načelnik Milan Bandič. Milan je ne znal spuniti imovinsko kartico i zato je moral oditi, a Milan šteri je ve prvi na redo ima hajdi grehi na svoji gradonačelnički kartici. Doktor Milan je hajdi dugo bil na tapeti i na se zadje so mo otpopevali: A ve adio, a gracki Milan je več na leta sima trn v peti, ali on je žilavi kak vrag. Znate da sam takši rastejo na bosansko – hercegovačkomo kameno.

Nebrem nikak razmeti kak te naši ministri i političari nebrejo spuniti te imovinske kartice? Pak kaj je to tak teško? Velijo da je ne teško, a da god fuljajo i zfušajo. Zoki Milanovič lefko spuni kartico i nebre fuljati jerbo je nikaj ne zaslužil, furt je bil na burzi ili pak na minimalco i nikaj nema. Ljubavnice se ne pišejo v kartice. A zakaj Slavek Liničov zna kak tre spuniti kartice. Rekel sam kartice jerbo kuliko sega je on nazobačil jemo je jena kartica ne dosti.

Pol ministrov je v Drašekovoj Vladi prestalo grešiti. Zamenil jiv je!

Još je zima pravzaprav niti ne počela, a več ide krajo, očem reči, još ga niti ne bilo snega, a dok je prava zima unda mora i sneg biti, i zimi bo došel kraj. Fala čakoskim grackim ocima kaj so malo posolili po bregecima i naprajli umjetnoga snega kaj so si deca zvršila željo. Neje lefko niti ovoga kupljenoga snega posejati dok je ne prava zima i dok ne zmrzavle. Ali kak bilo da bilo, deca so ipak došla na svoje, malo so preljuftali zimske oprave i prešpancerali sanjke i kaj bodo bar znali kak sneg pravzaprv zgledi. Ak se ovi skijaši morejo skijati po snego šteri je napravleni unda se i naša deca morejo sanjkati. Več bi bilo vreme kaj bi bila jena prava zima kaj bode sanjkanja, grudanja i odmetanja snega do mile vole.

Ve bodo nam rafangerači pripovedali z kim mi nek kurimo, a mi kurimo i na ogej mečemo sam ono kaj imamo, pak makar to bili i stari šolci. Lani sam hitil stare šolce prek blanjki na skradnico i došel mi je čakoski komunalac jerbo me je sosed Pišta videl, i rebnol mi je štrofa. Ovo leto sam jiv hitil na ogej ve pak me na red pobira rafangerač Robi i ogjogasec Mladen. I kaj ve nek k leto napravim? Dok napunite peč z starim šolcima i smetjom nejbole je da odidete z doma kaj se ne zadušite ak vam rafongi nejbole ne vlečejo.

Povedal sam teci Franci kak je našega rafangerača podvozil auto. Mam mi je otpovedala: Si videl, Jožek, kakša so to vremena došla na of naš svet, denes je čovek niti na krovo, a niti na najži ne siguren!

Ostavi komentar