10.6 C
Čakovec
Ponedjeljak, 4 ožujka, 2024

Fašnik je mel čuda vekše probleme od Iveka fiškala pak jiv je ne rešil!

Ivek najbrž nekaj vredi ak so si levi protiv jega?

Što bi rekel da čovek more meti tuliko falingi kuliko so Iveko nabrojili naši hrvatski levičari i si oni šteri se zdignejo na zadje noge dok hadezeovci ili pak jiv šef i naš hrvatski premijer AP (čitaj: (An)drašek Plenovičov) nekoga zabere za glavnoga državnoga fiškala. Verjem da znate da čim je još navek važeča glavna državna fiškalica Zlata Hrvoj Šipek hitila puško v kuruzo i priznala je kak jo glavna državna fiškalija več nejde od roke mam je počela licitaža što bode itak Zlatico zamenil vu fiškaliji i v glavnoj državnoj fotelji. Si šteri so meli vupeše so se prijavili, a med jimi i Ivek Turudičov. Dok so državni povereniki pretepli te nove kandidate i dok so jiv odvagnoli kaj morejo i kuliko znajo na vrh vode je splaval Ivek. No, oni šteri so kontra Iveka mam so skočili na svoje noge junačke i to leve i počeli so zvlačiti z Ivekovoga živleja (i z Ivekovoga mobitela) se one falinge za štere je nišči, pak niti sam Ivek, ne znal da jiv ima i to sam zato kaj je za Iveka svoje glasa dal i AP. Kaj so levičari bili glasneši to je Drašek Plenkovičov bil stoprocentno siguren da je dobro zebral. Ne bodete veruvali, ali Iveko so nabrojili i vu falingo to kaj je presodil Ivijo Sanadero negdašjemo našemo premijero i spravil ga je v rešt i to v Remetinec de je več na leta precednik sindikata reštantov. I ne sam to, još mo i bajajo kaj je poništil presudo blaženomo Lojzeko Stepinco (čije godovno zutra opslužavlemo) šteroga so na petnaest let rešta osudili komunisti na čelo z Jakovom Blaževičom i Ljubičicom belom mam posle Drugoga rata i šteri se je ne fčakal kaj bi živ došel vum z rešta. To kaj je Ivek oslobodil krivice blaženoga Stepinca neje mo oprostilo niti pravoslavno krilo HDZ-a (kak to veli Marcel Holjevac), štero vodi član hrvacke vlade Milorad Pupovac i zato nikak blaženoga Lojzeka Stepinca papa Franjo nebre proglasiti svecem.

Oglail se je i Milanovičov sodec Vrhovnoga soda Radovan Dobronič i on ve preteple Iveka kak bi mo našel nekšo falingo jerbo Ivek niti Milanovičo ne paše, a to je Zoki dal prebobjati na konferenciji za novinare i to, de drugdi nek na Pantovčako. Ne znati kakša bi to Lepa naša morala biti kaj bi bila onakša kakšo oče Zoki, a dok je bil premijer unda mo je nikaj ne trelo sam mo je bilo važno da je on glavni. Najbrž mo ve ne paše kaj je prvi do glavnoga? A nigdar so dva ne mogli biti glavni.

Kaj bom vam rekel, do ve so se si oglasili kaj se dotikavle Iveka i jegovi falingi sam so labodoritaški soci stiha. Najgerek sam, jako sam najgerek je li se oni bodo oglasili na vreme, sami ili pak prek VAR-a ili pak bodo saborniki predi zdigli roke i zebrali Ivek za glavnoga državnoga fiškala? Nebrem veruvati da Ivek ima tuliko falingi kuliko so mo črez minulih tjeden dni našli ovi naši levičari?

I oni kaj se Morejo, a nikaj se ne hapljuvlejo so svoje rekli

Ak ste si pregruntali da ova šakica ljudi šteri se znajo, se morejo, a nikaj pod milim božekom ne delajo bo stoječki odstojala i dočakala Iveka dok dojde i prevzeme svojo foteljo jako ste se grdo prevarili. Ruon tak sam si i ja pregruntal da „Možemosi“ imajo dosta ve posla okoli zagrebečkoga smetja,štero život znači, okoli Jakuševca šteri je vel preveč pun i pušča na se spehe, pak ga selijo v Resnik. NO, smetje je posel šteri more čakati bolšr zutra, ali zato so „Možemosi“ morali sima reči kak so ioni protiv Iveka. Nejglasneša je bila Sandra Benčičova šteroj soze ido zakaj je ne nigdi mogla najti svojo diplomo Pravnoga fakulteta de se ona krvavo muočila osemnajst let, a ve nema papere z šterima bi mogla postati glavna državna fiškalica kak je bila Zlatica. Morete si sam pregruntati kuliko ve jena diploma vredi štera se je prfčila vu fakultetskom suharajo i to punih osemnajst let. Da je rodila predi kak je počela študirati več ve bi dečec (ili pucka) bil na fakulteto. Celo noč so Možemosi i jivi pajdaši štrajkali i špancerali so se po Gornjemo grado i čakali so kaj se Ivek premisli. Ili pak AP! No, neje niti Ivek vesla sisal, i on je spekel svoje pravničkoga zanata tak dobro kaj je mesto flavnoga državnoga fiškala stvoreno kaj bode mogel pokazati za kaj je v školo hodal i kaj bodemo si vidli kak bode on dohajal na kraj z onima šteri bodo jemali kruha bez motike ili pak bodo hodali po krivoj strani vulice.

Si šteri poznajo Iveka pripovedeajo kak je Ivek srvoreni za to radno mesto i bodo si tati v Lepo našoj prestali mam spati čim Ivek prevzeme vu svoje pravedne roke cugle državne fiškalije.

Maškori bodo prevzeli vlast na sim frontima

Kak i sako leto tak bodo i ovo maškori prevzeli vlast i to po sim selima, opčinama, gradima, županijama. Makar je teca Franca jako najgerek kak bode to zgledalo jerbo, kak ona veli, prinas imamo sakefele cirkusov i to saki den. Cirkusa spelalvlejo premijer (AP) i ministri, a niti precednik države Zoki Milanovičov nikomo ne ostaja dožen. Kaj so državni problemi vekši Zoki nigdar ne flučne v šake i počne jiv rešavati nek te probleme povečavle, rivle jiv pod tepih i čaka kaj jiv nešči drugi reši i to ruon onak kak si je on pregruntal. Tak ili nikak, pak što je precednik?

Zoki veli kak so naše žene i to one štere tak zgledijo ili pak one štere se vu sebi tak osječajo nejzdraveši dio društva i nejpredi treba jiv pitati kak se problemi rešavlejo i unda bode se vredo, a posebno ak blagoslova daju Kata Pejovič, Vedrana Rudan, Sandra Benčič, Dalija Oreškovič, a niti fkrej od problemov ne beži Anka Mrak Taritaš, ona ima sngu za se probleme. Do ne tak zdavnja pomagala je i Josipa Rimac, ali ve je na krivoj strani vulice i mobitel joj nekaj ne posluhne jerbo piše čistam druge sms poruke od oni štere bi ona štela.

Kak bilo da bilo, ak se problem z Ivekov kak glavnim državnim fiškalom ne bode rešil do fašinskoga pondelka unda bodo žene zele celo stvar vu svoje roke i pejo skupa po kvasa za krofline i tam bodo se v koto, na šanko se dospomenule i to predi nek jiv zemljina sila teža potegne doli v ležeći položaj! To znuomo, kaj je čovek (a i žene) meje žejen sila teža je se jakša.

Ostavi komentar

Povezani članci

Ostanimo povezani

43,705FanoviLajkaj
608SljedbeniciSlijedi
0PretplatniciPretplatiti

NAJNOVIJE