-1.7 C
Čakovec
Nedjelja, 5 veljače, 2023

Dinamovci so ipak, na se zadje, zmenili trenera

Več sam vam par pot pripovedal kak labodoritaški kibici nemajo radi trenera Dinama Anteja Tončeka Čačiča. Na semaj Internet mrežaj bilo je hajdi komentarov na Čačičov račun, ali niti jeden dober nek je glas labodoritaškoga naroda furt, navek i vu semo bil protiv jega kak trenera. I to ne sam dok je došel na prtuletje v Dinamo nek i još dendenes, a on, Tonček, ftruc sima stalno pobeđuvle i Dinamovci so pod jegovom „dirigenckom boticom“ osvojili se kaj se dalo (prvenstvo, superkup), a i došli so i v Ligo prvakov. Ne sam da so došli nek so i v prvomo kolo pobedili Engleze i to ne koga god nek londonskoga Čelzija, dofčerašjega prvaka Evrope, kaj je nišči ne računal, pak niti kladioničari. Kaj se je posle pripetilo? Dinamovci so v tork navečer pobedili Čelzija, a v sredo vjutro so zmenili trenera. Ali ne svojega nek Tomasa Tuhela, trenera Čelzija. A niti tomo se je nišči ne nadjal, niti to je nišči ne računal, a nejmeje Tomas Tuhel. No, još jempot se je pokazalo da je labodoritaška laboda okrogla i da se nigdar ne zna kak bode i kam odskočila. Trener Tuhel je z Čelzijom lani osvojil Ligo prvakov, posle toga Superkup i Svecko klupsko prvenstvo, ali, kuliko vidimo, to mo je nikaj ne pomoglo i novi gazdi so ga zmenili. Kak zgledi v labodoritanja minulo delo jako malo vredi, a sindikat labodoritaških trenerov je ne još navek zafremani. Najme kaj, novi gazdi v Čelzijo so hajdi penez potrošili kaj so dopelali nove i bolše labodoritaše, a oni gubijo. I koga bodo unda zmenili nego trenera. Nešči mora biti kriv.

Verjem da ste vpučeni kak je gola za Dinamovce v tork zabil Mislav Oršić i on je glavni krivac kaj je trener Tuhel dobil otkaza. Pred dve leti je Oršič otpravil z tri gole v gajbi i londonski Totenhem, ali se je trener Murinjo ipak uspel spasiti od otkaza.

Dinamovci so črez ova leta kak igrajo v Ligi prvakov uspeli poslati po riti k meši štiri kluba z Londona i to ne koga god nek Arsenala, Totenhema, West Hema i ve Čelzija i ve Bed Blu Bojsi seposot spituvlejo je li je v Londono je kakši jakši labodoritaški klub?

Kuliko sam mel za čuti Dalmoši so zmislili Ligo prvakov Dalmacije sam kaj bodo i beli ftiči (čitaj: Hajduk) igrali v Ligi prvakov!

Da delam v INI, mala moja,  je li bi me štela???         

     Da čovek ne poverje, nebre minuti ni jeden mesec kaj se nej pripetilo nekaj kaj ne priliči političaraj ili pak jivim pajdašima šteri so bliže političkim ogjima (čitaj: državnoj kasi) i bole se grejejo. Kak sam več rekel skorom saki mesec nešči roko porine v državno kaso ili pak kaso kakšega državnoga poduzeča i privatizera nekaj kaj mo ne pripada, očem reči, nekaj kaj je ne jegovo nek je to naše. Nebre zeti nekaj kaj je ne jegovo ili pak točneše rečeno ne bi smel zeti ono kaj je ne jegovo, ali čuda je naših ljudi, a v zadje vreme se vejč i vejč, šteri so ne bogoboječi, šteri se ne bojijo nikoga i žjejo tam de so ne sejali. Verjem da vam ne moram pripovedati kak je to zišlo z plinom vu INI kak so ga prodavali i kak so žnjim švercali i kak se je, dok se je podvlekla crta, zazvedilo da je zginula milijarda kuni, ali se je pol molijarde našlo na štedni knigici jenoga penzionera. Kaj je preveč preveč je, a se ono kaj je preveč je niti z kruhom ne dobro.

Teca Franca me je lepo pitala: kaj se je itak pripetilo z tem našim poštejakima, pak nigdar so ne tuliko krali kak denes?

Jeden moj pajdaš pak je pital kaj pak se je pripetilo z našim političarima? Veli: – Mi smo jiv zebrali kaj bodo doprinašali Lepoj našoj, a oni reznašajo?

Kak bomo se v zimi greli?

Pomalem se tre prepravljati za zimo jerbo znuomo kak se Putin i Rusi prepravljajo kaj bodo kak nam tak i celoj Evropi, očem reči, celomo sveto zaprli plina, a ve smo se si i to na leta greli na plin. Denes so druga vremena, Rusija i Ukrajina ratujejo, a Evropa, NATO i svet se svadijo z Putinom, a on ima se kaj mi nucamo sam se tre lepo žnjim spominati i platiti tuliko kuliko on zaračuna. A to je saki den se vejč i vejč tak da bode na se zadje zišlo da celi svet plača Putino stroške jegovoga rata. No, pustimo to, štel sam vam pravzaprav reči kak sam bil na semo i štel sam kupiti drva za zimo. Pregruntal sam si kak bodem nejpredi kupil drva, a unda peč na drva. Morem vam reči da so drva hajdi odišla gori i još jiv ga ne dosti, a podražila so tuliko kaj sam mel premalo penez za deset metrov kuliko sam kanil kupiti tak da bodo drva došla drugi tjeden na red. Dok sam več bil nabrušeni pogledal sam v štacun kaj bi kupil peč ak sam več ne mel dosti za drva kupiti. I peči so podražile, ali jiv ve niti nemajo tak da sam dimo došel z praznimi rokami i z penezi v žepo. Kuliko vidimo se je podražilo: i struja, i plin, i drva (uglena več nišči ne kopa), jedino nas još Božekovo sonce greje po stari ceni. Kaj nam unda drugo preostaja nek kaj prosimo Božeka kaj nas bode čim duže grel i to po staroj ceni, a to je Bog plati.

Kak je itak v Zagrebo?

     V minulo nedelo je na državnoj televiziji, pre Aci Stankovičo, bil zagrebečki gracki načelnik Tomislav Tomaševič, šteri se zna, se more, a več je vejč od leto dni minulo kak ga je purgersko zagrebečko biračko telo zebralo, a još je nikaj ne pokazal od svojega „raskošnoga talenta“. Ne bodete veruvali, ali je niti, da čovek ne poverje, Aca ne mogel dojti do reči dok je Tomek počel nabrajati kaj so se naprajli, on i jegova leva koalicija (čitaj: Moremo i pejdašija) od da so prijeli v roke cugle vlasti vu belom Zagreb grado. To kaj ga je Aca ne mogel zastajti je ne preveč važno jerbo je čuda važneše kaj se to kaj so naprajli ne vidi prostim okom, a kak bi unda vidli ovi z očalima štere imajo slabešo dioptrijo. Dok bode Tomek bar dva pot zaredom otpelal smetje  štero se na kupe nabralo po zagrebečkim vulicama unda mo bodemo mortik nekaj veruvali. Več bi mo bil zadji cajt kaj prešel z reči na djela. Zagrepčanci se nadjajo da bodo ipak to doživeli predi nek bodo morali iti na popravni i znova glase davat i zbirat novoga grackoga načelnika.

Ostavi komentar

Povezani članci

Ostanimo povezani

0FanoviLajkaj
3,695SljedbeniciSlijedi
14,700PretplatniciPretplatiti

NAJNOVIJE