Lojzek seposod čaka na red!?
Minulo je cirka dva mesece od kak je Papa Franjo odišel k Božeko na račun. Kak sam več i pisal, bil je Franjo malo drugačeši papa nek so bili ovi predi jega i nek smo mi, kak oni šteri delamo stisko v cirkvi tak i oni šteri verjejo kak Božek ne postoji, navčeni. On je vodil cirkvo onak kak si je on pregruntal da to treba delati i po tomo smo ga mi ljudi i verniki zapamtili. Jeni so bili zadovoljni kak je on to delal, a mi drugi smo gombali. Verjem da se još zmislite kaj smo mo mi katoliki v Lepoj našoj zamerili? Zamerili smo mo kaj je ne našel cajta kaj bi došel k nam v Lepo Našo, a još bole to kaj je ne našega blaženoga Lojzeka Stepinca proglasil svetim. No, nesmo mo to zeli za nejvekšo falingo nek smo mo zamerili to kaj je poslušal Srpsko pravoslavno cirkvo o tomo kakši je bil Lojzek, a si znuomo da SPC nema ruon lepo mišleje o Lojzeko, a kaj ne bodemo spominjali i to kak so Srbi odnavek nekaj meli protiv nas Hrvatov, a to se je pojačalo bar tri – štiri pot posle kak smo jiv sforšibali z našega hatara, z Lepe Naše v zadjemo Domovinskomo rato. I kuliko vidimo papa Franjo se spominal z Srbima o Lojzeko i tak je jedenajst let jegovoga pontifikata minulo, a blaženi Lojzek je ne došel na red kaj bi ga Papa zdigel jeno štengo više, kaj bi ga zdigel na oltar kak si je i zaslužil, nek je ostal tam de ga je ostavil naš dobri papa Ivan Pavao II.
No, mi Čakovčanci se ne bi smeli preveč srditi na papo Franjo kaj se Lojzeka Stepinca dotikavle jerbo se v Čakovco več duže od deset let čaka kaj bi se pred čakoskom starešom cirkvom Svetoga Nikole biškupa postavil spomenik našemo blaženiko i nikak da te spomenik dobi zeleno svetlo čakoskih grackih ocov i gracke uprave. Verjem da ste ne pozabili kak so čakoska Zrinska garda, čakoski Ogranak Matice hrvacke i međimorska Družba „Brača Hrvackoga Zmaja“ prosili čakoske gracke oce kaj bi se Lojzeko postavil spomenik pred čakoskom cirkvom, ali se je to ne meknulo dale od početka (kak v Pačjoj školi). Lani se je ipak nekaj genulo kaj se spomenika dotikavle jerbo je čakoska gradonačelnica Ljerka Cividini respisala anketo, i to prvič od da Grad Čakovec postoji od 13.stoletja, vu šteroj so se Čakovčanci izjasnili da so za to kaj se postavi spomenik blaženomo Lojzeko. Ali dale od toga se je pak ne genulo. Ne znati da bode Grad Čakovec, kak servis Čakovčanki i Čakovčancov, spunil željo građanov šteri so za Lojzeka z jene strane, a z druge strane, furt i navek, punijo gracko kaso.
Z jene strane gombamo na papo Franceka kaj je ne Lojzeka proglasil svetim, a z druge strane mi postavljamo spomenika tomo istomo Lojzeko duže od deset let i još navek se ne zna da ga bodemo postavili makar so se čakoski verniki izjasnili da očejo kaj bode Lojzekov spomenik na kvarteljo v centro Čakovca! Najgerek sam, jako sam najgerek što bode predi obavil svojo zadačo, papa Lav XIV ili pak čakoski gracki oci?
Čakosko južno proščeje
Minoli vikend so Čakovčanke i Čakovčanci na čakoskomo Jugo preslavili patrona svoje južne cirkve i svoje župe, svetoga Tončeka Padovanskoga. Kak je i red dok glavni patron ima svoje godovno unda župa i župljani obslužavlejo i svoje proščeje. Tak je bilo i ovo leto, a tu je pomogel i dragi Božek jerbo je celo vreme proščeja bilo lepo vreme. Nejbole so srečna i vesela bila deca jerbo so ringišpili i lunapark delali non-stop. Istina Božek da so meli nekše skračeno radno vreme, ali najbrž so se mameki, japeki, očem reči, mamice i japice tak dospomenuli z čakoskim grackim ocima, očem reči, turističkim težakima i to zbog radi toga kaj se nej potrošilo preveč penez. Znate kak je to, dok deca dojdejo na ringišil, na auteke ili pak nekam drugam unda ga ne kraja, a denes je nikaj ne fal. Žetoni so dragi, a vožnje jako kratko trajejo i tak devet – deset pot i radnička ili pak penzionerska buksa se fletno sprazni. I ne sam to, nekaj drugo me gvinta: zakaj so mužikaši igrali tak kratko, očem reči, fletno so se odvečer hapili dok ga jako još nikoga ne bilo, a još je ne mrak opal i dok so stareši došli na proščeje unda so tamburaši i bandisti odišli dimo. Tu vam ja nikaj ne razmem, zakaj je to proščeje bilo tak ošpitno, tak bogo, a v grado Čakovco proščeje i fešte počnejo v deset ili pak v jedanajst vur navečer, a tu na Jugo se je gotovo v deveti vuri. Se osim lunaparka, šankov i langušov!
Dva tjedne predi južnoga proščeja spominal sam se z Mladenom Grdovičom pak sam ga pozval na naše južno proščeje, očem reči, pital sam ga ja li bi došel k nam v Čakovec na bevando za Antonovo. Mam mi je otpovedal da bi drage vole došel, ali kuliko mi se je posle požalil nišči ga je ne zval. Osim mene. A ja nemam mandata biračkoga tela. Ve je bila prilika kaj se i na čakoskomo Jugo napravi nekša festa jerbo je Tončekovo godovno bilo črez celi vikend, ali najbrž je nešči zahuzal. Pak se ne mora šparati na Čakovčancima z Juga, z župe Svetoga Tončeka, jerbo tu živi sam nekaj malo meje od pol Čakovčancov!
Kaj je nejvekše zlo v Priloko?
Da čovek ne poverje, nejvekše zlo Priloka i Priločancov je HDZ-e, ali vam ne bi točno mogel reči je li je to priločki HDZ-e ili pak of državni šteroga vodi premijer Drašek Plenkovičov? Tak vam je to bilo do pred par dni, a ve je kak nejvekša priločka nevolja splaval narodnjak Dražen Novakov. I ne bodete veruvali zakaj je to tak? Dražen je na minulim izborima zaslužil jenoga mandata v priločkom Grackomo večo i dok se je zafremalo Gracko veče moral se je stati na jeno strano i to na levo ili pak desno. Najme kaj, na saki strani novoga priločkoga Grackoga veča ga bilo po šest večnikov i si so čakali na štero strano bode genul Dražen. Dražen si je pregruntal da bode bole Priloko i Priločancima ako on stane na desno strano, na strano HDZ-a i tua je genol. Ali to je ne bilo praf ovima na drugoj strani i se drevje i kameje so počeli na jega hitati. Ne bodete veruvali, ali da si je stal na levo strano unda bi bilo 7:6 za levičare i se bi bilo vredo, a ve dok je 7:6 za desničare ve je nikaj ne vredo i Dražen je kriv za se. Kak Fašnik. Znate kaj, nejde mi nikak v glavo zakaj so itak Priločanci protiv HDZ-a, zakaj so protiv Ljubija, zakaj so ve i protiv dobroga čoveka i vodečega međimorskoga obrtnika Dražena Novaka? A se kaj Prilok i Priločanci imajo jim je HDZ-e omogučil. I još se navelikom dela po celomo Priloko, a Ljubo garantera da so to ne zadji penezi štere bode v Prilok dovlekel. A neje tak zdavnja bilo i neje se teško zmisliti kak je Prilok zgledal predi nek je priločki HDZ-e prijel cugle vlasti vu svoje demokracke roke?
