Teško je tu biti spameten i nekaj spametnoga reči. Najme kaj, v Karlovco so jivi gracki večniki meli na dnevnomo redo kršteje Koranskoga mosta, očem reči, trebali so prekrstiti Koranskoga mosta i dati mo ime po specijalnoj jedinici Gromovi šteri so pred trideti let, 1991.leta spasili Karlovca, a z tem celo Lepo našo od četnikov. Četniki so nahrupili na most i šteli so prek jega dojti v Karlovac, a posle Karlovca Zagreb jim je čistam blizo. Sa je sreča kaj so tu bili Gromovi i Mihajlo Hrastov šteri so ne hitili puške v kuruzo nek so pokazali da so Korana i Karlovac v Hrvackoj i da tu žive Hrvati. Tak je to bilo pred tridesti let, a ve na karlovačkomo grackomo večo je bilo oštro jerbo so jeni bili za Gromove, a drugi so bili kontra kaj nam četnike spominjal. Kaj se dotikavle esdepeovcov pre jimi se je ne nikaj spremenilo jerbo so oni predi nek so trebali glase dati odišli vum ruon tak kak i jivi zastupniki pred tridestri let, 25. junjuša 1991.leta dok je Sabor Lepe naše donašal odluko o odvajanjo od Juge. Od 49 zastupnikov SDP-a vum jiv je odišlo sam 48, ali je odluka donešena i Lepa naša je odišla na svoje i fala dragomo Božeko još navek je tu živi i raste ftruc sim esdepeovcima. A ove dneve v Karlovco so SDP-eovci odišli vum, a oni kaj se Morejo, a nikaj ne delajo, so ne mogli zdiči roke za Gromove nek so jim roke ostale v žepo, očem reči, bili so protiv. Nekaj tu ne razmem, sam je tridesti let minulo od našega Domovinskoga rata i mi več ve ne znamo što je bil na pravi strani, a što na onoj drugoj. Ne znamo ili pak nečemo znati što je koga napadal, a što pak se je branil. Mi to ve ne znamo, a kak partizani se znajo kaj je bilo pred osemdeset let. Oni se znajo makar jiv je još jako malo živih, ali priče se prenašajo z kolena na koleno i od starih na mlade i to kaj je jempot rečeno se je ne spremenilo zadjih nekaj vejč od sedemdeset let.
Naši mesari (čitaj: Vajdači) i jiv direktor Alen Kajmovičov spametno delajo i več đakima v sredji školi davlejo stipendije štere se ne odbijajo tak da bodo črez par let meli dosta domaći dečkov, dosta mesarov i ne bodo jiv morali uvoziti z Srbije ili pak, nedaj Božek, z Rumunjske. Rekla mi je teca Franca kak je z dneva v den se glasneše popevle ona stara težačka pesma: Da sam mesar mala moja je li bi me štela… i morem vam reči da mlade puce rado oko (i nesam oko) hičejo na mlade mesare. Imajo i praf, to so jaki dečki kak od brega sklesani, a i pre mesarima nega gladi, nega takše nevole i takše krize kaj bi mesari bili lačni. Pred par let si so se sam držali za kompjutere i mobitele i nišči je niti ne senjal kaj bi išel v školo za nekšega obrtnika: mesara, zidar, pigera, cimermana, stolara, strujača, vodača, plinača, rafongerača i kaj ne bodem dale nabrajal, ali v zadje vreme se je se spremenilo. Mesari so pravi fahmani, imajo posla vu fabriki, a imajo i doma sam ak očejo delati. I ne sam to, saki mesar zna di tre fpičiti i kak globoko porinuti tak da so puce i žene srečne i zadolne.
Verjem da smo si z gustušom prečitali kuliko itak služijo naši selski, očem reči, opčinski političari ili točneše rečeno opčinski načelniki. Neje se ve moglo ruon točno posložiti šteri je načelnik nejbole plačeni, šteri nejslabeše, šteri je preplačeni, a šteri pak več dela nek ga plačajo. To je ne bilo muoči naprajti jerbo nešterni načelniki so na opčinskim jaslama z celim plačama, a nekaj meje od pol to dela odvečer, nabija si dnevne iberštunde i za to dobavla nagrado ili pak naknado. Čitali smo skupa teca Franca i ja te plače, nagrade i naknade, ali smo nikak ne uspeli zazvediti po čemo so itak opčinski večniki preračunali oliti zračunali kuliko vredijo, očem reči, kuliko prevredijo jivi načelniki? Ne znati je li je to broj duša na opčinskomo hataro, broj klaftri opčinskoga hatara, marha drobnih zobi ili pak ova vekša? Nesmo nikak mogli zazvediti. A mortik so nejpredi poljuknuli v opčinsko kaso i dok so vidli kuliko ga penez nutri unda so se dospomenuli kuliko jiv načelnik vredi. A najbrž ga je i takših šteri so odrezali plačico ili pak naknado pred dvajsti let i ve sam furt prepišuvlejo. To je se vredo ak se novi načelniki ne bunijo. Brzčas se počnejo buniti dok imajo svojo pajdašijo v opčinskomo vječo jerbo unda znajo da morejo nekaj zmeniti na bole i to za sebe. Hajdi dugo se je pripovedalo kak je politika, a posebno ova selska, očem reči, opčinska kruh brez motike, ali če duže dale i biračko telo je se spamenteše i od opčinskoga načelnika išče se vejč i vejč. Negda so načelniki delali od sedem do tri, a negda i krajše (znate kak se to veli: dojdem kesneše i raneše odidem) i odišli so dimo, ali denes saki načelnik ima mobitela i to opčinskoga, a broja mo si znajo i zovejo ga dok bilo kaj nucajo. Napriliko, zvali so jerbo se ne mogli mačka zeti doli z kostaja ili pak je pustač pustal celo noč na sosedovom oreho ili pak sosedov peš laja, a punica nebre spati… Kaj nebom spominjal soseda šteri igra v trubo ili pak bobja i to navek unda dok se gazda spravi spat. Neje denes lefko biti selski političar oliti opčinski načelnik i zato kuliko god ga plačjo premalo je, a kaj bi ga pošteno platili falijo penezi. No, kak god je teško, ali na sakim izborima je stiska za načelnike i to v saki, pak i nejmenši seli, očem reči, opčini.
Naš čakoski Centar za odgoj i obrazovanje je preslavil svojih prvih pedeset let od da je zafremani. Delajo po cele dneve od jutra do zutra, dece imajo preveč, ali nemajo dosti placa. Ali plac jim ne fali od denes ili fčera nego več dvajsti let. Stari pedesetletni Centar dok je bil zafremani je bil napravleni za cirka sedemdeset dece, a ve jiv je sto preveč i nišči gane vupa zaprti. Deca so natiskana kad srdelice v konzervi. Pred dvajsti let je grad Čakovec osigural zemljo v Martanaj, pred deset let so napravleni projektlini, a ve pak je na pedesetletnici državni tajnik obečal peneze. Najgerek sam, jako sam najgerek je li bode državni tajnik mogel nazobačiti dosti penez (cirka devedeset milijonov) kaj se napravi novi Centar. Tu bi si trebali glave deti skupa: štiri ministarstva, županija, opčine i grad Čakovec, a i Evropa nebre to sam tak gledati kak da se jo to ne dotikavle i unda bi najbrž bilo nekaj od toga. Pak so si to deca, a jive sakefele navučitelice to zaslužile. Kaj ne bode ve pak od toga kaj je tajnik obečal minulo deset let kaj se nekaj gene!
