Nek se zna što je novi minister graditeljstva i kaj se ne bode pripovedalo kak je na to mesto došel po babi i po stricima (to je nekaj čistam isto kak da bi ja nekam došel prek tece France) Ivek Paladinov se je mam prijel posla šteri tu stoji i čaka več dve leti (od Manoličovoga 100-toga rođendena), očem reči. od predlanjskoga potresa. Verjem da si znate o čemo je reč i da tre poprajti sih šest jezer v potreso oštečenih i vu viziperte inženjerov i građevinskih stručnjakov zapisanih hiži, a do ve je, kuliko znamo, ne popravlena niti jena makar so penezi je i čakajo kaj se potrošijo. Denes vjutro mam posle sedme vure z se štiri strane sveta v beli Zagreb grad so nahrupili bageri, kamijoni i meštri šteri so mam počeli rušiti ono kaj je za zrušiti ili pak popravljati kaj se more poprajti. Morem vam reči da so niti nejvekši optimisti v belom Zagreb gradu, a niti pak v Lepoj našoj ne očekuvali kaj bi minister Ivek več prvoga dneva ovoga četrtoga meseca tak naglo fljučnul v svoje preštimane ministarske roke i počel z obnovom. Nek se ve oporbenjaki grizejo dok vidijo kak je premijer Drašek trefil z novim ministrom:
Ne znati kaj je to za petek, bar je ne trinajsti, nek je prvi, ali denes vjutro je precednik sabornikov, Gordan Jandrokovičov, dobil depešo od Peđe Grbina da eSDePeovci napuščajo sabornico i to sam zato kaj je precednik Gordan dal črlenoga kartona vodečemo esdepeovco Peđi Grbino, a Var je posle utvrdil kak je to ne smel naprajti. Ne znati, a to se z depeše nebre točno prespodobiti je li se esdepeovci kanijo vrnuti nazaj v sabornico ili bodo, kaj se politike dotikavle hitili puške v kuruzo, očem reči, je le se bodo morali zbirati novi saborniki kaj se popuni sabornica i Sabor? Čim bodem zazvedil mam vam bodem javil!
Sima nam je poznato kak niti jeno zlo, i ne sam zlo, ne dohaja samo tak to kaj smo posle depeše esdepeovcov zazvedili kak Milči Pupovac i Boris Miloševič napuščajo Vlado nas je se hitilo v depresijo i to ve dok se prepravla tretja ili štrta rekonstrukcija Vlade. Najbrž je denes v noči več moral biti jako niski pritisak v zrako da se tuliko sega pripetilo. Ili pak je to bil den da je teško bilo biti političar?
Neje to jedina politička vest štera nas je mam vjutro dočakala jerbo si mediji halavajijo kak je Zoran Zoki MIlanovičov napustil Pantovčak i spraznil je foteljo precednika države za štero se z rokama i nogama boril. Što bi rekel da bode svaja Milanovič – Plenkovič, Milanovič – Banožič i Milanovič- Hranj tak v srce pogodila precednika Zokija. Nigdar ne bi rekel da Zoki ima tak mehko srce i da bode zbog radi toga kaj misli drugač nek Plenkovič i Banožič napustil Pantovčaka i dal priliko nekomo drugomo nek ratuvle z hadezeovcima. Na se zadje sam uspel zazvediti kak je MIlanovič odišel jeebo so ga Plenkovič i Banožič ne pustili blizo drona (čitaj: bespilocke letilice) na Jaruno i jemo so rekli kak ga v drono ne bilo bombe, a sam par dni posle se zazvedilo kak so komade letilice (čitaj: drona) našli na otpado jenoga poduzeča v Kozari Boko. Rekel je Zoki, ne bode nišči delal norca od precednika države, a još meja od jega. Neje mo nikak moglo ziti v glavo to zakaj skrivlejo bombe od jega šteri komandera z našom vojskom i našom protivzračnom obranom?
Ono kaj se mesecima pripovedalo kak je Ivica Todorič ne zdigel roke od svojega Agrokora ve se pokazalo točnim. Denes vjutro se je na sim portalima, sim radijima, a posle i na televizijama pojavila vest kak je Ivica kupil dionice Sberbanke štere so Rusi meli v Agrokoro i z tem dionicama je znova postal nejvekši dioničar, očem reči, glavni gazda kak je to i negda (predi stečaja) bil. Nesam uspel zazvediti od ekonomskih i gospodarskih stručnjakov Lepe naše je li je to dobro za Agrokor i je li je to dobro za Lepo našo. Nejfletneše sam prelistal knigo Martine Dalič o Agrokoro, ali sam nikaj spametnoga ne zazvedil.
Znuom da me bodete spituvali, ali vam tu ne bi znal reči je li Lepa naša bode to zdržala to kaj se je denes vjutro pripetilo na debeloj vodi, točneše rečeno, na Brijonima. Najme kaj, Rade Šerbeđija je napustil Brijone i Lepo našo skupa z svojom družinom je odišel, bar za ve, v nepoznatomo pravco. Kuliko se uspelo zazvediti od pazitelja Radeove hiže na Brijonima Rade je bil jako srdit na Lepo našo ne zato kaj je sam bil na Brijonima nek zato kaj je na sprevodo jegovomo pajdašo Igoro Mandičo minuli tjeden na Mirogojo bilo sam dvajsti ljudi. To je bila kap štera je preljala kupico strpleja i jegove tolerancije prema Lepoj našoj i nam Hrvatekima.
Kak strela z vedroga neba me je potrefila šporcka vest kak Miroslav Čiro Blaževič znova dohaja v Hajduk. Kak je napisal na svojoj Fejsbuk stranici, Hajdukovci so mo se premili kaj nebrejo več dvajsti let biti prvaki Lepe naše, a po jegovoj nejstručnešoj procjeni ve Hajduk ima dobre igrače, a ti dobri igrači so zaslužili i nejbolšega trenera. Uprava kluba je ne bila za Čirija, ali so vlasniki kluba, a to je Torcida i ostali kibici, po staromo sprobanomo sistemo jeden čovek jeden glas nadglasali upravo. Sreča je kaj Ćiro poštuvle ovoga trenera z Litve Valdasa Dambrauskasa pak si ga bode stavil kak pomočnika. Prefrigani je Čiro, mora nešči i delati z labodoritašima dok on vodi kluba. I to je još ne se, Čiro je ne iskal nekšo veliko plačo sam je štel dojti v Split kaj pokaže svojemo kumo Zdravkijo Mamičovomo kak je on (Čiro) još ne za staro železo, očem reči, neje za fkrej hititi. Kuliko vidimo negdi so se grdo zgrabili Čiro i Mamič??
Več se par let navelikom pripoveda kak je Luka Modrič ne labodoritaš za Real i da je prestari za Madrižane, ali je još navek dober za naše Vatrene i to tak dober kaj je još navek i kapetan. Najte me krivo razmeti, ali nešči se v Realo razmi v labodoritanje i to ne malo jerbo so Realovci z denešjim dnevom potpisali novi ugovor z Lukom i to do 2025.leta. Kuliko vidimo nejso Madrižani pozabili kuliko sega dobroga jim je Luka donesel i z tem novi ugovorom očejo mo se zafaliti na semo kaj je dal klubo i za Madrid. Luka je igral super do ve, a i dale igra nejbole kaj more vu svojim letima makar ima menšo plačo od Gereta Bela šteri več dosti let sam greje Realovo klupo. Mam sam se zapital zakaj do 2025. leta, ali sam v Realo zazvedil da so se z Lukom dospomenuli da bode igral do svojega četrdesetoga leta, a unda bode obesil kopačke na klin. Lepo je to dok se muoči tak dospomenuti z labodoritaškim gazdima.
