Dok bodete vi čitali ovo moje premišlavanje več se bode znalo kak dauko so odišli naši Vatreni i kaj nam je hasnilo to kaj smo našemo Srbijanco iz Knina, šteri brani za labodoritaško reprezentacijo Kanade, Milano Borjano, a ne zna da je Knin v Lepoj našoj (i da je tam bil i unda da se je on skopecnol, očem reči, narodil), napunili mrežo do vrha z štiri komade. Za ve vam sam morem reči da smo protiv Kanađanov igrali kak se šika našim labodoritašima šteri so od Rusije 2018. leta druga nejbolša reprezentacija na sveto. Očem reči, prvi posle Francoske. Se je v nedelo bilo još i lepše nek smo se nadjali makar so nam Kanađani prvi zabiberili i to več v drugoj minoti, ali posle je došlo se na svoje i naši Vatreni so Kanađane zabetonerali na zadjemo mesto skupa z jivim golmanom Milančekom. Bilo je lefko navijati za naše Vatrene i to čuda leži nek protiv Maroka. Niti dragi Božek je ne ftegnul skubicirati kuliko pivi i gemištov se je pretočilo, a kuliko mesa z roštiljov potrošilo Ne bodemo dale o tomo premišlaval jerbo ne znam kak je to zgledalo protiv Belgijancov.
Tončijova Barika se je pobunila več posle drugoga kruga: – Tonček moj, ja ti odhajam od tebe jerbo si celo vreme pred televizijom i to z pivikom v roki i sam te laboda i pive intereserajo? Tonča je ne niti obrnul glavo sam je zapital: – Barika, ideš na posudbo ili zaprav mejaš hižo i posteljo?
Pozabil sam vam reči kak je Barika jedna od onih ženi štere nigdar ne boli glava!
Oglasil se je i Joža Manuličov: – Katar je se napravil čuda bole nek smo se nadjali, ali meni je bilo nekak lepše na Prvomo sveckomo prvenstvo 1930.leta v Urugvajo.
Kaj bo z našim međimorskim labodoritašima?
Ve dok mi furt i stalno gledimo kaj se odigravle v Kataro naši međimorski labodoritaši so ne kak tre: jempot jim ne paše uprava, drugi pot je trener kriva peršona na krivi mesti, onda nečejo trenerati, niti pak igrati, a na se zadje došlo je vum kak ne dobavljajo plače, očem reči, nemajo za kruh niti mleko. Nejpredi so se oglasili igrači, unda pak ovi z uprave tak da se, na se zadje, ne zna što ima praf? Najbrž, nekaj je tu ne vredo jerbo de ga jega dima tu negdi mora biti i ogenj. Znate kaj, nesmemo si mi to dopustiti kaj ve ne bode nekaj štimalo v labodoritanjo dok je Svecko prvenstvo, a naša županija je nejbolša županija kaj se športa dotikavle v celoj Evropi. Moramo najti nekše rešeje kaj bodo si zadovoljni kak trener tak i publika kaj ne bodem igrače spominjal jerbo oni so ipak nejglavneši. A znamo kaj oni očejo? Ak več igrajo kaj bodo od toga meli nekšega hasna, očem reči, kaj bodo nekaj i zaslužili jerbo od labodoritanja živijo. Verjem da bodo si skupa: uprava, gospodarstveniki, župan i županija rešili toga problema kaj se ne bodemo sramotili po Evropi. To nam, verjem da se slažete z menom, ne treba ve dok smo na tak dobromo šporckomo glaso.
Zaklada Mikec je dala nove i to vekše stipendije
Minuli tjeden so naši međimorski študenti potpisali, s Zakladom Mikec, nove ugovore o pomaganjo, očem reči, stipenderanjo. Si študenti šteri dobijo stipendije od Zaklade Mikec, štero je zafremal naš cirkovljančan Anton Toni Mikec, a on pomaže sam one študente šteri redovito študerajo, redovito polažejo ispite i nejbolši so na svojim fakultetima. To so oni mladi, šteri bodo na svojim školanim plečima zutra nosili Međimorje naše malo, a i Lepo našo. To je jiva zadača i zato jiv gospon Toni pomaže i oče kaj bodo, posle študeranja, ostali doma, tu prinas v Međimorjo, a ako jiv mi ne bodemo nucali unda bodo hodali na posel k našim prvim sosedima v Lepo našo kak je to napravil gospon Toni, šteri još den denes dela i služi peneze za Zakladao v belom Zagreb grado. Moram pofaliti gospona Tonija makar on to nema rad i znuom da me bode zašpotal, ali on je to zaslužil. Najme kaj, Zaklada več sedmo leto deli stipendije, štere so ovo leto dvesto kuni vekše nek lani, a lani so bile 1 100 kuni, i do ve je podelil nekaj vejč od pet milijonov kuni, a dobilo je stipendije 360 naših študentov. I ne sam to, študenti šteri so dobili stipendije so ne nikaj gospono Tonijo dužni sam mo morajo reči: Bog plati! A i to nejvečpot sfali. Kak je to lepo, stipendijo dobiš, nikaj si ne dužen, ali se moraš vučiti. No, rečite mi prosim vas lepo, pak študentima je vučenje jedini posel, a „Tonijovi študenti“ dobavlajo i čistam kredne stipendije od 1 300 kuni! Svaka čast gospono Tonijo i kapa doli. Do poda!
I negda se je klalo dok so bile koline!!
Znate kak se pripoveda: bole nek hmerje selo nek običaji, a odnavek je šega bila kaj so pre saki hiži meli koline, očem reči, klali smo pajceke. No, moramo deti roko na srce da se te šege denes nekak ne držimo, a ne držimo se zbog radi toga kaj ga se meje pakcekov (sviji imamo dosti), a bez pajcekov ga ne kolini. Denes ga još, tu i tam, je kolini, ali se nikaj ne čujejo. Negda so pajceki cvilili dok smo jiv klali, a denes dok se i kole to se napravi tak stiha kaj nišči ne bi čul jerbo je negda šega bila kaj smo jeni (pajdaši, sosedi) hodali na koline (frakleci, oblizeki i gemišti), a denes se se stiha dela kaj nej koga zbudili kak daj nej meli s kim potrucati ak bi nešči došel. Mortik so i pajceki preštimani pak niti ne znajo cviliti. Kak bilo da bilo, kolejo sam oni šteri imajo pajceke, a kakše se oblizeke (finote i dobrote) spravljajo nišči ne zna jerbo nikoga se več ne zove na vuglede. Negda so koline trajale dva dni, a denes dve vure. Zgledi da denes bokci hodajo po meso i dobrote v mesnico, a sam kulaki kolejo doma. Kak negda veliki gazdi šteri so doma mlatili!
Kaj je bilo predi kokoš ili jejci??
To nam se ve pak mota po pameti jerbo so nam sfalila jajca. Ne tak zdavnja, još lani, smo meli tuliko jejci kaj smo se žnjimi reshitavali. Negda smo jiv nudili i falili se kak saki od nas poje na den nejmeje jeno jejce, a ve, par meseci nazaj, nemamo dosti jejci niti za nas. Nebrem vam ve točno reči je li to mi jemo vejč jejci nek predi jerbo nam je to nejfaleše ili pak naše kokoši čuda meje nesejo. Najbrž je istina negdi na sredini? Zazvedil sam da so kokoši osnovale svojega sindikata i unda furt nekaj zaprdnejo, a jejci ga ne dosti. Prosim vas lepo dejte mi pokažite nekoga što je prek sindikata nekaj rešil i to na vreme? Ak mene pitate meni je čistam sejeno kaj je bilo predi kokoš ili jejce, ali očem kaj bodem mel jejci dok mi dojde volja za jiv. Tak i naše žene navek nejpredi iščejo jejci jerbo znajo da je ono kaj zaprav nucajo tu negdi blizo, kaj nam rekel polek!
