Božek, pazi nam Lepo našo…

Seposod, na poslo, v školaj, na fakso, v bolnicaj med doktoraj so jeni bolši, a drugi malo slabeši sam v politiki so si jednaki, si jednako vredijo, si se znajo, si se morejo, a nikaj ne delajo. V politki si morajo biti jednaki pred biračkim telom. Tak si to političari gruntajo. A kak političari ne vidijo da si biračko telo čistam drugač premišlavle jerbo da ne pak unda bi si bili zebrani, a kak znamo i kuliko vidimo zebrani so sam nešterni. Politika je žito v šteromo ga ne kukolja, to kukavičje jejci so nam pak političari podlečili, jerbo sejamo pšenico, a zraste kukolj i unda mi kak biračko telo moramo med kukoljom zbirati ne šteri je bolši, jerbo nega dobroga kukolja, nek onoga šteri nejmeje nevole i kvara donese.

Pak poglednite ove dva naša glavne, očem reči, nejglavneše političare; Plenkija i Zokija. Nesam ruon siguren da so oni nejglavneši jerbo furt hodajo po svoje mišlenje nekam drugam. V Brisel, napriliko. Kak se oni pred nami svadijo. Nesme jen drugomo nikaj reči, fkriž prste pokazati. A zakaj? I jen i drugi so spametni kak vrag i ne dopuščajo kaj bi jiv nešči pregovoril, očem reči, kaj bi drugi v nečemo znal vejč nek ov prvi. Kak dva ovni na brvno. Nebrem to nikak razmeti kaj jim to tre, zakaj tu trošijo svojo snago, svoje vreme, svojo pamet(?), a tuliko drugih problemov čaka na red. Ali ne, oni se med sobom svadijo i to saki den, a problemi čakajo nekše bolše zutra, nekše spametneše političare šteri jiv bodo rešili, a mi kak biračko telo i dale cvilimo jerbo nebremo dihati od sih nevoli štere nas pritiskajo.

Ako pak to delajo zbogradi nas publike unda si nek najdejo drugo publiko, veli teca Franca, nama je dosti toga cirkusa i več nebremo zdržati.

Rekel je sosed Pišta: Božek pazi mi na Lejpo našo, idem ja za Dojčland!

Napriliko imajo dosti posla v apotekaj. Ne da škriple nek cvili. Z jene strane veledrogerije nečejo več davati leke apotekaj jerbo država jiv ne plača., več je dužna za leke cirka pet milijardi kuni. Ak mene pitate pak je to bormeš ne mali penez. Veledrogerije cvilijo jerbo penez ga ne, a mi betežniki i dale nucamo leke ak očemo bar još malo preživeti. A precednik Plenki niti da okom trepne, kak da je to nečija druga briga, a ne jegova. Penežlivi minister Zdravkec Maričov ne zna kaj reči, znate kak je to, on more nekaj reči posle gazde, a dok je gazda tiho i on mora biti stiha. Ne znati kaj bo z nami betežniki? Ali to je več nekša druga pesma štera, kuliko vidimo, političare baš preveč ne sekera.

Nekaj si gruntam da bi tu nekaj moglo pomoči naše sudstvo i naši soci. Da bi oni svojega posla delali kak tre unda bi se i tu nekaj penez moglo nazobačiti v državno kaso. Najme kaj, si znamo kuliko mi kradljivci imamo v Lepoj našoj,tu mislim na one šteri privatizerajo naše v svoj žep. Verjem da ste ne pozabili kakšega praha smo zdigli za Vidoševiča, KUščeviča, Sanadera, purgera Bandiča, Mamiča, Liniča, a ve se več duže od mesec dni spominamo o Drageco Kovačevičo šteri je pretakal penze z Janfa vu svoj žep i to pelnici v Slovenskoj vulici. Nejsam za to kaj bi soci te „poslovne ljude“ v rešt zapirali, ne, nek jim sam zemejo naše peneze štere so privatizerali, a te penezi so ne meli potpisanoga putnoga naloga za pot z državne kase v privatne žepe. Te peneze tre zeti i z tem penezima platiti leke za nas betežne ljude. Znuom da to nebo dosti. Ali bar nekaj. Ak nam je več Plenki saki čas v Briselo pak jim nek podleči jenoga projekta prek šteroga bodo EU fondovi plačali naše vračtvo. Evropa se ionak fali da se plača tam de nejbole treba, očem reči, da gasijo tam de nejbole gori. Pak kaj ne vidijo kak fest gori v našim apotekama?

Kaj bo itak z nas Međimorcov naprajla tua korona. Saki den se se vejč i vejč virusov rivle na of naš „Falaček zemle med dvemi vodami“. Se bo pomalem dišlo v rit, očem reči, pak bode se nazaj delalo on-line, prek Internerta. Škole so več pomalem počele, pol zabavišti ruon tak več dela na daljino – deca doma, a zabavišta prazna, još sam tre se posle zarivati prek Interneta i unda bode korona fcrkla od gladi. Kak naši betežniki brez lekov. Komo so čakoski gracki oci popravlali nadvožnjaka ak bodemo črez par dni pak si ostali doma?

Dok jempot sfondamo korono unda ne bodemo meli od čega hmreti i živeli bodemo mirno i srečno se do svoje smrti…

Nebrem razmeti naše policaje, ve vu vreme korone dok se si borimo kaj se rešimo te vuteske štera se je k nam dotepla z Kine, oni i dale pregajajo nas šofere. Da bode jempot i jim minister Božinovič stal na rep i navčil jiv nekšega reda. Ak se si borimo protiv korone unda se morajo i oni, ak si delamo na daljino, unda morejo i policaji. A ne ovi naši policaji se vozijo po cestaj i to bez maske i pobirajo nas na red. Naš državni stožer je lepo rekel da si moramo nositi maske i to v sim prilikama i neprilikama i ak imaš masko da si zaštičeni od sega. A friško figo si zaštičeni, srdito je rekla teca Franca dok so teteca Pištija policaji zastajli jerbo se je malo preveč dezificerani pelal na peciklino od Tončijovoga bunkera dimo. Kuliko smo zazvedili maske so ne dosti, moraš meti i vozačko dozvolo, makar imaš masko sejeno se nesmeš fleneše pelati nek na znako piše. I to je još ne se, makar imaš masko sejeno se moraš zvezati i ne smeš se spominati na mobitel. Pak prosim vas lepo, od čega, od kakšega i šteroga vraga nas unda itak maska pazi – to te ja pitam?

Ve vidite da je istina: Maske nas čuvlejo od zaraze i sega drugoga ruon tak kak gače čuvlejo žensko nevinost!

Veli pajdaš Tonča: Masko je nejbole nositi po kuhji i polek frižidera kaj nos ne našnjofa, a mi pak pojemo, se kaj ima dobro duho!

Ostavi komentar