Strujo imamo, a kandelaberi nam falijo
Si v lepom našem Međimorjo, a ruon tak i v Lepoj Našoj znajo kak je Čakovec bil prva varoš štera je v Lepoj Našoj mela vulično lektriko. Bilo je to pred 130 let da so prvi lampaši na strujo presvetili po čakoskaj vulicaj. To Čakovčanci znajo i z tem se štimajo. No, štel bi znati zakaj so denes čakoske vulice ne onak osvetlene kak bi morale biti, očem reči, kak dragi Božek zapoveda. Struja je došla f Čakovec pred 130 let, a pred par let je zmišlena i LED rasvjeta tak da seposot de dvetijo LED žarulje tam se čuda bole vidi, a čuda meje struje se troši. Ve dok to se znuomo moram pitati one šteri vu rokaj držijo cugle gracke vlasti, a z tem imajo i ključe od gracke kase zakaj so čakoske gracke vulice ne onak resvetlene kak bi mi šteli, očem reči, onak kaj bi vidli kud hodamo i kaj nas ne bi nišči plašil vu kmici., očem reči, kaj bi mi vidli druge dok se pelajo, a i oni nas dok idemo. Probajte se prepelati po Čakovco pak bodete vidli kuliko kandelaberi i kuliko žarolji fali kaj bi mi Čakovčanci mogli iti bez brige prek ceste. Morem vam reči da smo zebre nacrtali sigdi de je to trebalo, ali zebre so sam za po dnevo, a po noči nikaj ne vredijo ak so ne osvetlene. Kak smo rekli strujo smo zdavnja dobili zato tre ve postaviti kandelabere z reflektorima tak kaj se bodo zebre vidle kak po dnevo tak i po noči. Imamo dosti težakov v gracki upravi pak se nek navečer prešpancerajo po sim vulicama našega Čakovca pak bodo vidli de svetla falijo. Bole da to napravimo mam kaj ne bodemo čakali kaj se bode nekaj pripetilo. Ili kak moja teca Franca to lepo veli: Bole sprečiti nego lečiti! Nejpredi tre tam svetla postajti de deca v školo ili pak vu vrtece hodajo, a i tam de mi stareši v štacune hodamo, a unda i dale.
Rokometašice Zrinskoga so vpešale
Rokometašice Zrinskoga več hajdi dugo igrajo v Prvoj državnoj ligi. Od kak so došle v Prvo ligo, cirka pred dvajsti let, neso niti jempot ispale več so furt bile negdi v sredini tablice. Lani so bile čistam pre vrho pak so zbog radi toga igrale i v Evropi. I ova rokometna sezona je dobro genula, a unda se je nekaj pohabilo v klubo i to ne na igrališčo nek v upravi kluba. Stopram se je prvenstvo zalaufalo več so čakoske rokometašice (čitaj: uprava kluba) dale otkaza Gorano Mrđeno z Koprivnice šteri je na leta bil trener vu čakoskomo ženskomo klubo i pod čijim vodstvom so postignuti nejbolši rezultati i plasmani. Ne znati kaj je Goran zahuzal i komo se je v klubo zameril kaj so ga poslali dimo i za jim so zaprli vrata kluba. Posle trenera Ristija Arnaudovskoga, šteri se je kratko zadržal na klupi Zrinskica za trenera je došel sosed Vlado Vujovič z Varaždina negdašji jako dober rokometni golman. Otpočetka je to genulo čistam vredo, a unda je Vladek zgubil za redom šest utakmici i to pol doma, a pol vuni i tak je to ne moglo iti dale. Znate kaj, velijo oni šteri se v rokomet razmijo čuda bole od mene, da ak ekipa zgubi štiri utakmice z jeden ili dva gole razlike unda je to trener kriv jerbo mora i trener nekaj doprinesti ak oče kaj jegova ekipa pobedi. Tak si je i uprava Zrinskoga pregruntala i zafalila se Vladeko na poslo i dala mo je otkaza. Znate kak je to, zabadav dober i lepi trener ak ga ne bodov. Na mesto Vladeka došel je još jeden Koprivničanec i to Neven Hrupec. Trelo je dopelati novoga trenera dok je još ne kesno. Trener Hrupec je počel voditi ekipo v Labino, ali nebre navek biti prvo i muško, očem reči, rokometašice so zgubile, ali se si nadjamo da so pred našim rokometašicama bolši i lepši dnevi.
Ne nas je ruon bilo na inauguraciji novoga precednika
Inauguracija je minula, novi precednik Zoki Milanovičov je prisegel za svoj novi petoletni mandat. Morem vam reči da sam se nadjal da bode na Pantovčako čuda vejč naših Međimorcov jerbo je Zoki prinas dobil prek osemdeset procentov glasov. Tomo se čudila i teca Franca. Celo vreme je sedela pre televizijom i čakala kaj bo vidla nekoga z Međimorja i na se zadje je rekla kak ga nikoga našega ne bilo. Ili pak ga je ona ne vidla. No, našo martinsko pjevačico z Filipina ne računamo jerbo za njo smo znali da bode popevala. Lefko moremo deti roko na srce i priznati kak je naša (ve jo več moremo tak zvati jerbo je prinas več duže od štiri leti i lepo tečno govori međimorski i moremo joj dati naše međimorsko državljanstvo) Chriztel Reane Aceveda jako lepo popevala, a ruon tak lepo (jerbo lepše to nebre biti) je i zgledala. Našli smo joj staro, ali zlata vredno narodno nošnjo tak da je međimorski štimung bil kompletni. Mi se več dugo štimamo žnjom, a kuliko sam mel za čuti njoj to i paše. A i teca je lepo rekla: – Da je ne Chriztel popevala na Pantovčako mi Međimorci tam nej meli nikoga. Fala Chriztel na lepoj pesmi, fala joj na lepoti i fala joj kaj se štimala z našim (i jenim) Međimorjom!
Bojkot štacunarov je prestal, a cene so ostale
Sako čudo tri dni traje. Tak bi mogli reči za bojkot štacunov i štacunarov od nas potrošačov zbog previsokih (i to prek sake mere) ceni. Malo smo se reda držali i štacunarima saki petek kazali fige v žepo, ali se je nam to zamerilo pak smo ostajli na voljo štacunarima nek delajo z nami kaj očejo. Rekel je moj vrtni sosed Tonča: – Dosti kaj me žena ne pusti v krčmo saki pot dok me tam pajdaši čakajo, a ne kaj me ve ne bodo pustili v štacun dok nekaj nucam. Ve dok očem iti v štacun nejpredi moram pogledati na kalendar da vidim šteri je den, bormeš smo se ne borili za takšo demokracijo. Idem v štacun dok nekaj nucam, a kupim tuliko sega kuliko penez mi žena da. Prosim vas lepo kak bodem išel k sosedi Bariki z praznom rokom, a lepo sam jo navčil kaj joj saki pot dok dojdem nekaj donesem jerbo ak ona meni da ono kaj štečim unda je i red kaj se malo posladi dok ja odidem. Kaj bum vam rekel, navek mi da kuliko nucam, a nudi mi još i vejč!
