Odišel nam je dobri papa Franjo
Minuli tjeden nas je napustil dobri papa Franjo, odišel je k Božeko na račun. Papa Franjo je bil 266. po redo poglavar Rimokatoličke cirkve, a bil je argentinski kardinal, prvi šteri je bil zebrani vum Evrope i prvi šteri si je zel ime Franjo. Moremo reči da je bil dober, čuda je putuval i čuda se je boril za mir v sveto i jako se je brigal za siromašne, betežne i obespravljene. Bil je skroman i jednostavan kak so bili i jegovi prethodniki Ivan Pavao II i Benedikt XVI. Otkak je papa hmrl, a posebno posle sprevoda v soboto, si se spominajo što bode zebrani kak jegov nasljednik. Makar je papa Franjo imenoval hajdi kardinalov i to vum Evrope tak da ve Evropljani nemajo večino med kardinalima i si šteri se malo vejč razmijo vu izbore pape, nejveč šanse davlejo filipinskomo kardinalo Luiso Antonijo Tagleo i talijanskomo kardinalo Pjetro Parolino. Do ve so navek kardinali zbirali papo po kompromiso, očem reči, zebrali so nekoga šteri je bil veza onoga kaj je bilo do ve i šteri bi donesel nekaj novoga, drugačešega. Mi, v Lepoj Našoj navijamo za nekoga šteri bode našega blaženika Alojzija Stepinca proglasil svetim ak je več to papa Franjo zbegaval ovi dvanaest let kuliko je jegov pontifikat trajal.
Stepinac je posle četrdeset pete bil žrtva komunizma i komunisti so ga sfondali jerbo je ne štel odvojiti hrvacko katoličko cirkvo od Vatikana, a papa Franjo ga je žrtvoval po želji patrijarha srpske pravoslavne cirkve Porfirija šteri je bil protiv toga, a papa Franjo je mel željo kaj znova pomiri katolike i pravoslavce. Verjemo i nadjamo se da bodo i za našega blaženika došli bolši dnevi i da ga novi Papa bode zdigel na oltar kak sveca kaj si je naš Lojzek z svojim životom zaslužil.
Papa se je celi svoj pontifikat boril za mir vu sveto, a i ve dok je odišel je dal svojega doprinosa miro jerbo so se na jegovomo sprevodo znova spominali Ukrajinac Zelenski i Amerikanec Tramp i tak stali novi korak bliže miro vu sveto. Dej Božek!
Den oslobođenja?
Šestoga aprila, očem reči, nešterni den kesneše, so međimorski antifašisti preslavili Den oslobođenja Međimorja i to ne bilo kakšni den nek osemdeset letnico. Kuliko znuomo i kak se je na se zadje ipak zazvedilo Međimorje so četrdesetpete oslobodili od okupatorov Bugari i Rusi. Za osemdeset letnico je bila održana i svečana akademija makar so ne došli niti Bugari, a niti pak Rusi, a kuliko se pripoveda neso bili niti pozvani jerbo oni šteri so četrdesetpete bili prinas v Međimorjo ga več ne (hajdi jiv je i tu poginulo), a ovi mlajši nikaj o tomo ne znajo.
Dugo let se je pripovedalo kak je Međimorje od okupatorov oslobodil Međimorski partizanski odred, ali se ve več par let nazaj pripoveda istina kak je to itak bila ruska Črlena armija vu sastavo štere so osim Rusov bili i Bugari. Osim toga se je zazvedilo kak so partizani došli z Kalnika v Međimorje potkraj aprila dok ga več Mađarima i Nemcima ne bilo niti traga niti glasa. Očem reči da nam je trelo skorom osemdeset let kak bi se zazvedila prava istina. Poznato nam je sima kak so četrdesetpete posle rata vlast vu svoje roke zeli komunisti pak so unda oni i pisali povjest kak je jim pasalo. Još se tu moramo zapitati kakše je itak to bilo oslobođenje ak so mesto okupatorov (nacistov i fašistov) došli komunisti, a vlast komunistov je se drugo bilo sam ne demokracija jerbo da je ne tak ne bi bili nucali niti Lepoglavo, niti Staro Gradiško, Gologa otoka, Svetoga Grgura….
Počelo je, počelo…, pak nam obečuvlejo vejč nek iščemo
Predi nek je počela trka za nove (stare) lokalne močnike zazvedili smo kajkaj toga,a kaj do ve nesmo znali. Zazvedili smo kakše plače imajo lokalni močniki (župan, (grado)načelnici), a ruon tak smo zazvedili šteri (grado)načelnici so na plači vu svojim opčinama, a šteri dobavlajo sam nagrado. Ruon tak je došlo na svetlo dneva i to kak jedino priločki gradonačelnik ne košta nikaj Priločance jerbo za iste peneze je sabornik i gradonačelnik, a za se mo je dosti sam plača sabornika. Dok čovek to malo bole zračuna dojde do lepoga kupčeka penez šteroga Ljubo Kolarek sako leto prešpara svojemo grado. To je cirka sto jezer ojerov bruto, a za štiri leti to dojde tijam na 400 jezer. Verjem da Priločanci ne bodo to pozabili dok bodo zbirali novoga gradonačelnika?
Ruon tak smo zazvedili kak čakoska gradonačelnica ima vekšo plačo od sabornice Boške Ban Vlahek. Ve ili je Grad Čakovec jako bogati kaj tak čuda plača svojo „gazdarico“ ili pak je Lepa Naša škrta i špara na svojim sabornikima. No, nebrem veruvati da Lepa Naša špara na sabornikima pak imamo jiv sam 151.
Još nekaj smo zazvedili kak je dovčerašji čakoski gracki načelnik Štef Kovačov ostavil grada v dugima, očem reči, ne sam da je gracka kasa bila prazna nek so još došli nekši drugi računi štere so novi gracki oci na čelu z Ljerkom Cividini morali poravnati. No, ve znuomo da so si računi poravnani, si so dugi vrjeni i v kasi ga još ostalo hajdi penez i to cirka dva milijonov ojerov. Ljudi moji, pak vi znate kakši je to kup penez te dva milijoni ojerov? Ne znam niti ja jerbo sam još nigdar ne videl na kupo dva milijone niti kuni, a kamoli ojerov. Nekaj drugo me gvinta? Ak je v kasi tuliko penez, zakaj se unda nekaj ne napravi za te peneze, a tuliko toga je za naprajti i to po celomo grado. Poznato nam je da je grad, očem reči, gracka uprava tu kaj služi građanima, a neje ona banka kaj bode skupljala peneze. Uspjeh grackih vlasti je vekši ak se napravi čim vejč onoga kaj građani nucajo, a ne kuliko bode penez ostavil svojemo nasljedniko. Znuomo kuliko problemov ga po grado Čakovco vu prometo? Več sam dosti pot povedal kak bi trelo se zebre osvetliti kaj bi šoferi vidli dok pešaki, đaki, deca, starci idejo prek ceste, a ne kaj so one v kmici. Rekel sam več da v nejdukšoj čakoskoj vulici, a to je Preloška vulica na čakoskomo Jugo, imajo v prometo štiri zebre i se štiri so v kmici. Još bi trelo čim predi vrediti i zebro pre Konzumo na čakoskoj magistrali štera je isto v kmici, a po njoj ido prek ceste đaki z škole i kupci z štacuna. Treba to čim predi naprajti jerbo, kuliko smo meli priliko čitati, penez ga v gracki kasi je dosti i ne tre čakati kaj se pak nekaj grdoga pripeti.
