Kak zgledi nekaj se je genulo?
Još jeden petek je tu pred nami. Cela pajdašija je tu z menom v krčmi. Pomalem pijašimo, očem reči, pretačemo rundo za rundom (več je četrta na stolo) jerbo niti jeden od nas neče prvi genuti i oditi vu štacun po ono po kaj so nas žene poslale. Kak sam rekel niti jeden si neče privoščiti to sramoto kaj bo ga nešči videl kak je v petek ipak išel v štacun makar smo si zdigli roke (nešterni i po dve) da se bodemo držali bojkota. Kak se meni vidi v krčmi pre Juliki bodemo tak dugo dok ne pozabimo po kaj smo itak v Čakovec došli. A to kaj bodemo z praznaj rokaj dimo došli to nam ne bode prvič. Nekaj si drugo gruntam, kakši bode itak hasen od toga bojkota? Veli teca Franca da so štacunari več zmenšali nešterne cene, a za one druge glavneše jiv tiskajo premijer i Vlada. Dok to čujem unda se zmislim da smo tak delali negda dok smo bili vu socijalizmo, očem reči, v komunizmo, a ne denes dok smo se odsmickali v demokracijo i kapitalizam. Znuom ja, a tak velijo i oni šteri se v cene i ekonomijo bole razmijo od mene, da bi tržište moralo cene porihtati i to tak kaj ne bodo štacunari služili štiri pot vejč nek proizvođači. Velijo da bi to morali naprajti zakoni ponude i potražnje sam se si pitamo je li bodemo mi potrošači uspeli tak dugo zdržati dok tržište to napravi?
Ali na huje…
I neje to se, tržište bi još moglo, predi ili pak na se zadje, porihtati cene prehrambene ili pak druge robe po štacunima, ali vas pitam što bode porihtal cene uslugi? Ak nucate plinača, strujača, vodača, keramičara, zidara nebrete ga najti niti za lek, a dok pitate kuliko bode vam računal za posel šteri vam mora naprajti unda se več neče niti z vami spominati. Meštri denes nejrajši imajo, ak nam več dojdo delat, kaj nam napravijo ono kaj mi nucamo, a kaj jim mi platimo kuliko si zaračunajo. I još nekaj, nejte jiv, prosim vas kak Božeka, pitati za račun jerbo jiv unda več nigdar ne bodete vidli. A tu bormeš nebre reda naprajti niti tržište, a niti pak Vlada jerbo zakona ponude i potražnje ga tu nega. Kak nega? Kak, pak z jene strane mi iščemo meštre, a z druge strane te isti meštri falijo tak da smo mi šteri jiv iščemo srečni kaj jiv najdemo i unda moramo platiti kuliko očejo ak očemo kaj jiv bodemo mogli zvati i drugoč. De je tomo kraj i da bode tu nešči reda napravil ak znuomo da se sa naša deca ili pak vnuki ravnajo na fakse, a šegrcke škole so prazne. Morem vam reči da mi je tu nikaj ne znala reči niti teca Franca. Dok sam rekel kaj nucamo vodača sam je rekla: Božek pomori i počela je moliti krunico!
Tramp prinas ne bi nikak prešel
Od prvoga dneva otkak je zel vu svoje znova zebrane precedničke roke cugle vlasti američki precednik Donald Tramp je počel delati i to onak kak je obečal. Kak Bnadič negda. No, morem vam reči da naši ljudi nikaj ne verjejo Trampo, oni bi šteli kaj bi se kaj je obečal napravil prvi tjeden, a čovek si je to resporedil na pet let na kuliko je zebrani. Nejpredi nikak nebrem razmeti kaj to sekera naše ljude, a posebno penzionere, kuliko bode i kak Tramp delal? Penzioneri se sekerajo kak da bi jim Tramp pošiljal penzijo. Če duže dale gruntam se sam sigurneši da Tramp prinas ne bi prešel na izborima, očem reči, prešel bi ruon tak kak je prešel i Dragan Primorac protiv Zokija Milanoviča. Nikaj to našim ljudima ne znači kaj je Tramp dok je bil zadji pot precednik Amerike zaposlil šest i pol milijonov ljudi, a ruon tak jim nikaj ne znači kaj je on veliki američki biznismen i da je jegovo imaje i imovina procjenjena na sedem milijardi dolarov. Pak se čovek nekaj razmi v biznis ak je uspel nazobačiti tulikše peneze? I ne sam to, več se je počel spominati i s Židovima, z Rusima, Ukrajinom, sosedima, a i reda dela po Ameriki. Skorom sam pozabil da je več započel i spominke z Kinezima. Hajdi toga je več započel tak da bode brzčas se napravil kaj je obečal. A naš novozebrani precednik Zoki si još navek zbira što mo bode popeval himno dok bode prisegel pre Božekom i ljudima za novih pet let na Pantovčako!
Kaj je Mujo rekel dok je zazvedil da je Trampova žena Slovenka…? Vidi, majke ti, Slovenci so dobili zeta, a neje Bosanec!
Što je na čijoj strani?
Ne znati kak bode itak dugo trajala ova zbrka okoli čakoske bolnice, očem reči, kirurgov v u čakoskoj bolnici. Naši ljudi so se podelili, jeni so na strani doktorov šteri delajo, a oni drugi so na drugoj strani, očem reči, na strani doktorov šteri so na bolovanjo. Kaj bom vam rekel, premalo znuom o doktorima i medicini kaj bi mogel nekaj presoditi. Najbrž i novi ravnatel bolnice zna premalo zato to zavrzlamo nebre tak dugo rešiti. Zazvedil sam da so kirurgi vu Varaždino na strani betežnikov i oni jiv čakajo vu Varaždino. Najgerek sam, jako sam najgerek, ak bode to vu Čakovco preveč dugo trajalo kaj ne bode i naša bolnica odišla za betežnikima vu Varaždin. Nigdar se ne zna. No, ne verjem da se novi ravnatel ne bi mogel dospomenuti z doktorima sam se treba žnjimi pospominati. Ali ne prek novin. Spominek bez novinarov i bez svedoka i na tomo zestanko morajo jeni drugima reči ili pak zbajati se kaj jiv muoči. Pak so doktori navek bili spametni ljudi!
Sosed me je ne mogel najti
Pred par dni je navečer došel sosed Tonča k meni na gemišt i požalil mi se je kak me je iskal odvečer, ali ga nikoga ne bilo doma pre naši hiži. To kaj je rekel je ne bilo, točno jerbo je on zvonil na hiži, a žena i ja smo bili na vrto. Vidim da ste najgerek kaj smo itak tam delali? Štihali smo vrta. Najme kaj, dospomenuli smo se kak bodemo znova delali vrta i zato smo išli zaštihati gredice kaj bode od jiv nekši hasen. Očemo kaj ne bodemo morali hodati vu štacun ili pak na pijac za sako šalato, mrkvo, petrožola, paradajza, papriko, kelja, zelje… Dosti smo penez znosili za grincajg i za se drugo, ali ve so pretirali kak ovi štacunari tak i žene na pijaco. Te cene rastejo kak da bi ja doma mel tiskaro za peneze. Znuom da ne bode ovo se na vrto več zutra zraslo, ali jempot bodem i ja došel na svoje. Morem vam reči da je i Tonča obečal kaj bode hitil v promet i svoje gredice, ali nesam tu ruon siguren jerbo je to bilo posle tretjega poliča.
