Čija je pravzaprav naša bolnica?
Več hajdi dugo se pripoveda o tomo kak nam bode država zela našo bolnico. I kaj se je pripetilo, ne bodete veruvali, ali tu je država, kaj se drugdi jako retko pripeti, održala svojo reč i ve je naša (županiska) bolnica postala naša (hrvacka) bolnica. Makar smo mi Međimorci tožili Lepo Našo Ustavnomo sodo, ali niti to je ne nikaj pomoglo (bar za ve) i bolnica je odišla v roke države, očem reči Ministarstva za zdraviče tak da ve žnjom hercuje minister za zdraviče Vili Beroš. Nikaj je niti to ne pomoglo kaj smo si mi Međimorci pol bolnice sami zazidali (zadji samodoprinos smo plačali predi nekaj meje od četrdeset let i jako je malo onih šteri so plačali, a ve kričijo da nedajo bolnico štero smo si sami zidali). Istina, za nas Međimorce je navek nejglavneše kaj bodemo meli doktora dok nam se pohabi zdraviče i kaj bodemo na vreme dobili lekece štere nucamo. Dej Božek kaj ne bodemo nucali niti doktore, a niti pak bolnico, ali nigdar se ne zna.
Još sam nekaj štel reči: Čistam je nekak normalno da gazda postavlja ravnatelja bolnice i da ima svoje Upravno vječe, pak tak je bilo i do ve dok je Županija bila glavna, ona je postavljala Upravno vječe, ona je zbirala ravnatelja i ona je zela na posel koga je štela i kuliko je štela. I nišči joj se je ne mešal v posel. Zato ve ne razmem dok so došli nekši novi klinci, novi igrači, kak mi znuomo da oni ne bodo vredo i da bode se odišlo po riti k meši. Treba novim ljudima dati šanso, nek se skažejo pak bodemo unda mogli reči je li so vredo ili pak ne, je li se razmijo v posel ili pak so došli sam zato kaj so fajni ili pak zato kaj se furt držijo desne strane vulice jerbo nikomo na čeli ne piše kaj zna i kuliko zna i je li bode znal držati cugle vlasti v našoj bolnici.
Ak te boli vuho, a doma imaš sam kaplice za oči pusti si kaplice za oči vu vuho i boš videl kak boš bole čul!
A kaj je z desnom stranom vulice?
Ne tak zdavnja sam pisal o tomo kak je raskrižje pre cirkvi i parko na čakoskomo Jugo v kmici, a jesen nam je unda bila pred pocekom. Sima nam je poznato da nam dok dojde jesen dohajajo i dežđi, megle, a i kmica je čuda raneše. Lepo sam napisal kak prek toga raskrižja mala deca hodajo na nihaljke i igrališta v parko, a oni stareši v školo, štera je prek parka. Morem vam reči da so se, črez kratek čas pojavili meštri z kandelaberom i z LED lampašaj i črez dva-tri dni raskršče je bilo osvetleno kak božični smrek, očem reči, kak pol cmreka. Najme kaj, meštri so lampaše postajli sam na levoj strani raskrižja, a desna strana je još dendenes v kmici. Kak da so sfalili penezi dok so si gracki oci zdigli plače. Nebrem nikak razmeti kakši je to polovični posel jerbo je v kmici ostala desna polovica raskrižja štera je nejveč v prometo i nejveč jo nucajo deca i đaki. Nebrem nikak razmeti što je naručil toga polovičnoga posla, a što pak je zebral kaj se bode naprajla sam leva strana vulice, očem reči, raskrižja?
Mi v Lepoj Našoj prvi na sveto imamo hibridne plače, pol ide na benzin, a pol na strujo!
Da bodemo dobili novoga križa na novomo čakoskomo grobjo?
Več hajdi dugo se spominajo Čakovčanke i Čakovčanci o tomo kak bi na našemo miholjanskomo grobjo trelo postajti novoga križa na novomo grobjo. Novo grobje se več zdavnja počelo puniti, predi vejč od tridesti let, a kak nas je saki den se vejč i vejč na desnomo Miholjanskomo brego, tak se je i novo grobje počelo puniti i širiti čuda predi nek smo planerali. Staro grobje se je, ruon tak, hajdi preširilo tak da je glavni križ ostal skorom na početko grobja tak da novo grobje nuca i novoga križa. O tomo so se dospomenuli i čakoski komunalci v Čakomo, šteri se brigajo za grobje, Grad i gracki oci šteri so jivi gazde, a i opčine štere hasnujejo čakosko grobje. Si so bili za to kaj se na novomo čakoskomo grobjo postavi novi križ. Čim so se dospomenuli, naprajli so projektlina respisali natječaj i zebrali so onoga šteri bode dal novo krednešo formo novomo čakoskomo grobjo. Do toga je se išlo kak po lojo, a dale od toga nikak da genemo. Pitam se pitam, kaj se čaka? Jeno vreme se je pripovedalo kak ga v gracki kasi ne dostik penez i da se čakajo bolša i bogateša vremena, ali ve več duže od leto dni se gracki oci falijo kak v kasi imajo viška penez i da so vrnuli se duge štere je negdašji gracki načelnik Štef Kovačov napravil. Ak je tak, a tak je, nebremo kaj ne bodemo veruvali gradonačelnici dok nam veli da ima viška penez, unda se moramo zapitati kaj se čaka z novim križom? To moramo pitati jerbo si oni šteri imajo svoju rodbino na grobju hajdi plačajo od mesta, za grobno mesto, tak da so to ne mali penezi šteri se sako leto dokoturajo v gracko kaso štero drži Čakom tak da verjem da bodo i pokojni na ovomo grobjo meli, črez kratek čas, svojega novoga svetešjega križa.
Varaždinske toplice prestigle Čakovca…
Još v marcijušo ovoga leta so dečki i puce iz Zrinske garde, Čakoske Matice hrvacke i Družbe “Brača Hrvackoga Zmaja” z Čakovca šteli v Čakovco pred cirkvom postajti spomenika kardinalo i blaženiko Lojzeko Stepinco. O tomo kaj so oni šteli so morali pitati Grad Čakovec i čakoske gracke oce. Kak so čakoski gracki oci ne bili sigurni je li bilo dobro kaj blaženi Lojzek Stepinac dobil kvartelja v grado Čakovco pak so o tomo respisali anketo i to prek Interneta, očem reči, on-line. Još v aprilo je anketa završila, a v upravi Grada Čakovca so još do dneva denešjega ne uspeli prebrojiti glase tak da se još ne zna da bode i de stanuval blaženi Lojzek. Dok Čakovčanci brojijo glase, dok se nanujajo z Lojzekovim spomenikom naši sosedi vu Varaždinskaj toplicaj so postavili Lojzekovoga spomenika, ruon tak pred cirkvom i to blizu vrati črez štera se hoda v cirkvo. A de bi drugdi? Ve vidite, Čakovčanci so kanili biti prvi, kanili so prvi meti spomenika blaženomo Lojzeko, ali so se pre dugo nanujali tak da je Lojzek, bar za ve, dobil kvartelja pre našim sosedima!
