Što je itak oslobodil Međimorje?
Pred nami so dnevi za štere so nas vučili da je bilo Međimorje oslobođeno od Mađarov šteri so hercuvali z našim hatarom štiri leti od 1941. – 1945. leta. Hajdi dugo se je ne znalo što je pravzaprav oslobodil Međimorje od okupatorov jerbo se je pripovedalo kak so to bili Bugari i Rusi, a kak je vreme teklo i kak smo se dale bili od teh dnevov unda so se kcoj metali i partizani. Pre par let so i međimorski antifašisti priznali kak so Međimorje oslobodili Bugari i Rusi, a da so partizani došli prek Drave na of naš hatar čuda kesneše. Jen čas je to vredilo, a ve pak znova dohaja na svetlo dneva „istina” da so to bili i partizani.
Poznato nam je kak so Rusi posle Beograda oslobodili i Bugarsko tak da so Bugari bili dužni Rusima vrnuti duga za oslobođenje pak so išli dale skupa z Črlenom armijom, i to pred jimi, tak so skupa došli i k nam v Međimorje. Bugari so išli od Kotoribe prek Dubrave, Vidovca i Preloga do Čakovca de so bila i grobja poginulih Bugarov, a Rusi so došli po ovom hataro od Mure pak so se v Čakovco zišli. Posle Čakovca so genuli v Gornje Međimorje tak da je bitka za Štrigovo bila 16. aprila. Nadjam se da se zmislite kak so Rusi šteli v Štrigovi postajti spomenika sim svojim zemljakima šteri so poginuli tu pre Štrigovi kak i onima kaj so nastradali po celomo Međimorjo, ali je unda došla korona štera je zabrenzala toga projektlina, a mam z koronom je došla agresija Rusije na Ukrajino tak da je te spomenik došel v drugi plan i tam je zanavek ostal. Bar za ve!
Čija je itak Štrigova?
O tomo sam več pisal pred dosti let i nišči mi je ne znal točno reči zakaj so si naši antifašisti zeli kak Den oslobođenja Međimorja 6. aprila, a bitka za Štrigovo je bila deset dni posle? Kak da je Štrigova ne naša Međimorska? Što zna kak bi to se z Štrigovom zišlo da je naš prvi župan Marijan Ramuščakov ne odštekal strujo, vodo, plina, telefona i televizijo od Janezov jerbo da je se ostalo po staromo najbrž bi i Štrigova odišla po riti k meši (čitaj: za sneho v Deželo) kak se je to pripetilo z Raskrižjem. Nikaj čudnoga jerbo smo se mi Međimorci odrekli Štrigove jerbo smo den oslobođenja Međimorja preslavili predi nek je Štrigova i hatar okoli je oslobođen od okupatorov. Sa je sreč kaj nam je Štrigova ostala, a Raskrižje smo zgubili zanavek.
Ak ne znaš kaj je bilo
Na se zadje bo zišlo na to kaj če duže dale se meje i meje znuomo. Rekel sam več, več par let i naši antifašisti pripovedajo kak so Međimorje oslobodili od okupatorov Bugari i Rusi, a ve pak nešči med oslobodioce furt rivle i partizane. Mel sam rodbino med partizanima i oni so priznali kak so došli z Kalnika prek Drave posle kak so Bugari i Rusi odišli dale. Japa i stric so z svojimi pajdaši došli dimo par dni pred prvim majušom.
Još nekaj mi nejde v glavo, dok sam hodal v pučko školo, a to je bilo jako zdavnja, unda so nas vučili kak smo mi Međimorci na Kalniko meli Međimorske partizanske čete. Kak je Drugi rat ostajal če duže dale odzaj za nami te međimorske partizanske čete so zrasle v bataljone, ali neje niti to bilo dosti tak da se ve piše i pripoveda kak je nas Međorrcov na Kalniko bilo jako čuda jerbo dok so došli prek Drave pre Novi Seli unda je to bil Međimorski partizanski odred. Bilo je to zdavnja, pred osemdeset let, i malo je ljudi(?) med živima šteri morejo reči da so vidli međimorske partizane dok so došli z Kalnika i kuliko jiv je bilo. Kak bilo da bilo, ali četa ima cirka 100 ili nekaj malo vejč vojnikov, bataljon ima cirka štiri čete, a odred ima nejmeje štiri bataljone. Kak bilo da bilo, moramo deti roko na srce i priznati kak so to velike, očem reči, jako velike razlike. I to ve dok ga več ne živih svedokov!
Zrinko smo ne dočakali kak je red
Naša skijašica Zrinka Ljutič se je takorekoč prvo leto ozbiljno skijala i več je dimo donesla kristalnoga globusa istina božek maloga, ali je kristalni i sam jenoga takšega delijo sako leto. Delijo za sako disciplino po jenoga, a naša Zrinka je bila nejbolša vu slalomo. A znate kuliko se je skijašici skijalo za te jen kristalni globus, a naša Zrinka je bila nejbolša. Velijo naši prvi, drugi i tretji sosedi; imate jeno skijašico, a niti jeno skijaško stazo, i ta skijašica je nejbolša na sveto. Kaj bodete rekli to nebre nišči osim nas Hrvatov. I još nekaj nišči nebre to kaj mi moremo: došla je Zrinka dimo z Amerike z kristalnim globusom i nišči jo je ne dočakal. Kak da to nikaj ne vredi. No, nebrem reči da je ne ruon nišči bil jerbo je bil zagrebečki gracki načelnik Tomica Tomaševičov. No, ali si je on bar mogel i nekoga sobom zeti jerbo sam siguren da si je naša Zrinka, za štero smo furt drukali, to i zaslužila.
Karte za Thompsonov koncertlin so sfalile
Kak so se dugo nanujali zagrebečki gracki oci predi nek so dali Thompsono dozvolo kaj bode odpopeval koncerta v Zagrebo i to na hipodromo, a karte za koncertlin, čim so se pojavile, so razgrabljene i to za dva dni. I to ne malo. Ne bodete veruvali, ali prodano je sih 280.000 karti kuliko je puščeno v prodajo. Novi svecki rekord! Ljudi so čakali v kolonama na karte i to bez gableca. Najgerek sam, jako sam najgerek kaj bode itak Thompson ve napravil? Kaj? Pak najbrž bode otpopeval još jenoga koncertlina. Ak so Lepa Brena i Prijovička mogle otpopevati pet koncertlini v zagrebečkoj Areni unda bode mogel i Thompson još nešternoga ili pak bode popeval tak dugo dok bode mel publike. Ve dok ga je karta krenula ve mora igrati. Što zna što bode posle majskih izborov zel v roke cugle vlasti v belom grado Zagrebo i je li bode te novi mel sluha za Thompsonove pesme, očem reči, je li bode znal „Kaj je bilo”?
Ne znati kaj bode moj pajdaš Ivo napravil jerbo se je ne na vreme pobrigal za karto i štel bi tam biti i z Thompsonom se poslikati. Jedina mo je šansakaj kupi kartona črni burzi: – Prodavle se jena karta za Thompsonov koncertlin… more i zamjena za nekši menši stan… (Čakovec i okolica).
