Od da demokracija riče labodo
Verjem da si znate kak je demokracija došla v Maksimir, v Dinamo črez velika vrata i to z potnim nalogom “Dinamovo prtuletje” sam se je jako slabo vidlo što je potpisal te potne naloge? Najte me krivo razmeti, mam sam se zmislil i na naše “Hrvacko prtuletje” štero je poranjkalo na vrata Lepe naše pred nekaj vejč od pedeset let, ali je to prtuletje došlo sam do poceka jerbo je trelo cirka dvajsti let kaj od “Hrvackoga prtuletja” postane Lepa naša. I to je još ne se, neje Lepa naša sam tak zafremana, točneše reči, zafremana je ruon onak kak so naši “prolječari” to senjali sam je trelo još štiri leti rata kaj bo počela laufati. A protiv koga se je ratuvalo? Protiv oni šterima se Juga zavlekla pod kožo i šterima je Juga bila jiva domovina, a Hrvati so šteli svojo državo, svojo domovino i neso nikaj šteli meti z Jugom vu šteroj so bili duže od sedemdeset let podstanari.
Ne bi štel kaj bi tak bilo i v Maksimirski šumi med Dinamovcaj, ne bi štel kaj bi i tu trelo tak čuda let kaj tua labodoritaška demokracija zalaufa. Znuomo da je negdašji kapetan Dinamovcov i jeden od bolših ak ne i nejbolši labodoritaš v Maksimiro Velimir Zajec pobedil na prvim „demokrackim“ izborima z svojim i “Dinamovim prtuletjom”, ruon tak znuomo da je Velimir Zajec postal i precednik Dinama jerbo je v minulu nedelo na Skupštini pobedil dofčerašjega precednika Mirkija Barišiča, šteri je hercuval pod maksimirskaj tribinaj skorom frtalj stoletja. Dok ga ne bilo drugoga i on je bil dober, a čim je došel Zajec i labodoritaška demokracija i on je odišel po riti k meši. Govorili so mo ljudi ak oče ostati i dale precednik Dinama mora oditi na par dni na hodočasče v Međugorje, ali je jemo to bilo smešno. No, dok so skupštinari zebrali Zajeca unda mo je smeh zabegel.
Kuliko ima garancijo tua maksimirska demokracija?
Morem vam reči da sam jako najgerek kak dugo bode rasla i cvela tua Maksimirska demokracija jerbo još se zmislim kak denes kak so Dalmoši, Torcida i Ajdukovci pred devetnaest let, dok so zadji pot osvojili prvenstvo Lepe naše 2005. leta pustili to labodoritaško demokracijo v Split na Poljud. Se je to bilo lepo i dobro, jeden čovek jeden glas, jeden glas na Skupštini jena ciglica na stadiono, jena ciglica jeno pivo i se to tak još dendenes drži, ali so Ajdukovci posle 2005. leta več nigdar ne bili prvaki države. Sako leto se prepravljajo, pak tak i ovo, ali navek nešči predi jiv osvoji prvenstvo. Nejveč pot je to bil Dinamo, a ve je li bode ovo leto Dinamo ili pak Reka jim je sejeno, jednako jiv muoči jerbo pak ne bodo oni. Kaj ne bode nešči rekel kak imam nekaj protiv “belih ftičov”, ne, ali kuliko se več ve vidi najbrž se Ajdukovcima ne bode presvetilo svetlo na krajo ovoletošjega prvenstvenoga tunela.
Štel sam vam pravzaparv reči kak demokracija se je još ne navčila labodo ritati, a bez pobjedi na igrališčo nebre nišči biti prvak pak niti tak male države kak je Lepa naša. Istina Božek, Lepa naša je je mala država, ali još navek smo tretja labodoritaška sila kak v Evropi tak i na sveto. I dok smo osvajali bronaste želencije nišči nas je ne pital za demokracijo! Pitali so sam oni šteri so bil protiv Vatreni i protiv Tomsona.
Ve si znuomo, izbori za sabornike so pred nami
Ve je več i sima nama, šteri se ne bavimo z politikom nek se politika bavi z nami, jasno da so novi izbori prinas v Lepoj našoj več zutra, no, ne ruon zutra, ali prekzutra stoprocentno jerbo so dofčerašji saborniki poslani dimo, a predi nek so išli dimo morali so hiti puške v kuruzo kaj ne bi nešterni i dale ratuvali, a sabor jim je respuščeni. Ve se sam čaka šaka z Pantovčaka kaj objavi svekolikom pučanstvo da bode se itak moralo iti glase davat. Si znuomo da to bode v nedelo, ali smo ne stoprocentno sigurni v štero to nedelo bode.
No, več se ve zna kak se bode vodila velika bitka za saborske fotelje i za saborske plače, štere so ne male, izmeđo ujedinjene levice i restepene desnice. Najme kaj, levičari so zebrali svojega glavnoga “koja za trko”, a to je Peđa Grbinov i on je otpral levičarsko mamrelo pod štero so zišle se devet strankici tak da bode na levici devet strankici i jedna SDP partija. Kak sam vam več rekel si so se zarivali pod partijsko mamrelo kak piceki pod kvočko. Morem vam reči da sam jako najgerek kak bodo itak zišli te izbori i kak dugo bode zdržalo to mamrelo? Još nekaj me gvinta, kak itak desničari kanijo pobediti te levičari, a saki som ide v izborno trko? Najbrž so si nekaj pregruntali predi nek so genuli prodavat meglo biračkomo telo. Naše biračko telo hajdi toga zdrži sam treba ono kaj jim se prodavle jako dobro zamotati. Več tri noči ne spim jerbo mi je teca Franca pustila vuš za goler i saki den me straši kak nam bode Peđa Grbinov premijer. Mam sam dal na popevano mešo v našoj župnoj cirkvi, a i zapisal sam se za hodočašče v Međugorje.
Fala Matici, fala Mirijo Gavrano na Zakono o hrvackomo jeziko!
Minuli tjeden nam je v Čakovco bil precednik Matice hrvacke romanopisac, pripovjedač i dramatičar. Došel nam je pokazati svojega filma “U zagrljaju rijeke” šteroga je snimil skupa z Bobijom Grubičem v čakoskoj bolnici, a donesel nam je i svojo novo knigo “Portret duše”, štera mi je mam zapela za oko. Bila je prilika pak sam mo čestital za Zakon o hrvackomo jeziko za šteri se je on kak precednik Matice posebno zavzel. Morem vam reči da smo nutri i mi Međimorci jerbo je gospon Gavran ne zabil za naš kajkavski jezik. Zakon je donesen makar so naše dofčerašje međimorske sabornice gospođa Boška Ban Vlahek i doktorica Andreja Marič bile protiv. Razmel bi da so protiv da ga našega međimorskoga jezika ne nutri, ali on je nutri, a one protiv. Još zdavnja je profesor i dobrovčan Zvonkec Bartoličov napisal o hrvackomo jeziko:
“Kada su te čupali iz zemlje,
Ja sam Te sadio u srce,
Kad si gorio u plamenu,
Ja sam gorio s Tobom.
Kad su Tebe mučili,
I ja sam bio mučen.
Kad su rekli, da si mrtav,
Ja sam vjerovao u Tvoje uskrsnuće.
Kad god sam hodao,
Vidio sam te u bojama cvijeća.”
Da je Zvonkec živ štimal bi se z novim Zakonom jerbo je to na leta čakal!
