15 C
Čakovec
Četvrtak, 28 ožujka, 2024

Na to mlado leto sega obilja…

Leto 2018. je došlo do kraja pak i prinas v Međimorjo makar smo, pred leto dni, mi Međimorci počeli od kraja kak i navek. Još jempot se je pokazalo da se ima svoje mesto de počne, a ruon tak i de završi. Jenima je minulo leto bilo hudo ili pak jako hudo, a drugima lepo ili pak jako lepo, kak bilo da bilo sejeno je minulo i to na veselje prvih i na žalost ovih drugih. Minulo je, spremenili smo brojčeka v datumo i pak idemo znova. Kak i sako leto. Dok nekaj mine, ovak ili onak, red je da se podvleče crta i da se napravi nekša (kakša-takša) inventura kaj se vidi kaj smo naprajli dobro, a de smo pak zahuzali. Ak smo zahuzali nek nam minulo leto bode navuk kaj to več ne bodemo delali. Bar ne tak včasi i na isti mesti.

Kaj se politike i političarov dotikavle morem vam reči da sam ne pisal potne naloge tak da se mi, bar za ve, Remetinec ne smeje. Ruon tak sam ne pošiljal sms poruke, očem reči, pisal sam, ali se za moje ne zazvedilo jerbo sam ne pozival puce štere perejo našega moškoga donjega veša mesto veš mašini. I ne sam veša nek i ono kaj se more najti vu donjemo vešo. Nebrem razmeti kaj so si skočili v zrak dok se je zazvedilo kaj političari imajo radi pajdašice noči (nočne ftičice) kak da je to nekaj novo. Pak so se nočne puce motale okoli moških gač predi nek se je politika skurvala. Kak bilo da bilo, si prepovedajo kak je politka tua nočna ftičica štera leti z jenoga na drugo moško koleno, a se vejč ženi se rivle v politiko. Nebrem to nikak razmeti, ali od mene niti nišči ne išče kaj bi ja to razmel. Pital sam teco Franco kaj ona misli o tomo, ali mi je rekla da je to i za jo špansko selo, ali mi se je nekak na smeh držala kaj znači da mi je ne štela povedati.

Lani je na svetlo dneva došel i Lex Agrokor i sega je tu bilo. Trguvalo se na velikom. Nešterni so pripovedali da se je i kralo, ali nikaj je ne došlo vum. Nejpredi je vum odišel gazda Agrokora Ivek Todoričov, unda je Lex (čitaj: ministrica Martina Daličova) podnesel ostavko, a posle je napisala i knigo, štera je predi vum došla z tiskare nek se je Ivek vrnul z Londona. Kaj se Agrokora i Konzuma dotikavle ve smo ne nikaj spametneši: Ivek se je vrnul, Ramljak ga je prodal Amerima, a ve žnjim hercujejo Rusi. Morem vam reči da se je zbogradi Agrokora i teci Franci skorom pamet zmešala i več se neče o tomo nikaj spominati. Bar ne z menom. Brzčas se v Konzumo spomina z pajdašicami jerbo je navek v štacuno skorom dve vure, a donese dimo sam kruha, mleko, olje, čaja, pašteto i nekaj slatkoga za cmuliti.

Još je jeno leto minulo, a nikaj smo ne rešili niti z Inom, a niti pak z Molom. Mađari još navek vedrijo i oblačijo z našom naftom i našim benzinom i još smo ne nikaj zazvedili je li se bodo dimo vrnuli oni deset milijoni ojerov štere je Ivo Sanaderov tobož zaslužil dok je Ina odišla za sneho v Mađarsko. Neje deset milijonov ojerov veliki penez, ali bi nam jako dobro došli kaj bi zakrpali lukje v Uljaniko.

Kaj se dotikavle našega ministra Dobrovčana Darkija Horvatovoga, mam mi je bilo sumljivo kaj ga je Drašek postavil za ministra prek noči i neje preveč dugo gruntal jerbo sam si mam mogel misliti da je negdi nekaj velikoga (kaj nem rekel sranje) i da to nešči mora rešiti. Još se je naš Darko niti praf ne sel v ministarsko foteljo več je buknul ogej v Uljaniko. Što bode drugi jemal vroče kostaje z ogja nek mi Međimorci. Ve dok je Darko malo bole spreglednol kak se to na leta dela v Uljaniko ve se vidi da bi ovi Sanaderovi deset milijonov sam bilo dosti za regreslin i božičnico, a i to bi za jen kratek cajt zmirilo težake. A to kaj oni očejo to nebre garanterati niti ruska Sber banka.

Sa je sreča kaj sam se ne dal navleči na to kaj bi bil savjetnik našoj precednici. Istinabog da mi je to niti nišči ne nudil, ali da sam pristal ve bi me ionak zmenili. Kuliko vidimo i te savjetnički kotač sreče se obrče negda fletneše negda čistam pomalem, ali ne dojde on šteri je doli navek gori, a on šteri je gori nejvečpot ipak padne doli! Pak da je Lex ne dala ostavko nigdar ne bi znova našemo Darkeco presvetilo ministarsko sonce.

Nebrem vam nikaj spametnoga reči za ove reoplane kaj naš minister Damir Krstičevič kupuvle od Izraela jerbo saki den je nekaj novoga vu tem poslo. Saki den nešči novi porine svoje prste v te posel i zategne brenzo. Nebrem to razmeti kak se Židovi z Izraela svadijo z Židovima šteri hercujejo z Amerima i to prek Lejpe naše. Mi znamo kaj očemo, a Izraelci to imajo, ali nedajo Ameri kaj nej naša vojska bila prejaka v zrako. Otkak smo osvojili srebro v labodoritanjo i zlato v teniso i od da je Luka Modrič potukel se svecke labodoritaše si so strahom pred nami. Nejsmo niti mi Hrvati z Lejpe naše znali kak čuda vredimo!  No, kaj se reoplanov dotikavle nebrem razmeti esdepeovce: nejpredi so kričali na ves glas kak našoj vojski ne tre reoplane, a ve dok so se Ameri pobunili i mortik bode došlo do toga da se z te izraelske mele ne bode jel kruh, očem reči, da v ovoj rundi nikaj ne bode od reoplanov, ve se esdepeovci bunijo zakaj te reoplani ne bodo došli. Bilo bi čuda meje problemov v Lepoj našoj, a brzčas i v Saboro da bi Bernardič, Maras, Stazič i parija znajo kaj pravzaprav očejo.

Kaj reči, negdi so promene vredo i dobro kaj so napravlene. Tak je to bilo i v labodoritanjo. Rečite mi, prosim vas lejpo, kaj bi bilo od naših Vatrenih da je ostal stati polek klupe tv mehaničar Ante Čačič? Zna se! Mi, očem reči, naši labodoritaši nigdar nej bili vidli Rusijo, a kaj se ne bodemo spominali o srebrnoj želenciji. Čačičo je smrknulo, a Daličo je presvetilo vatreno sonce. So je sreča kaj smo Tončeka Čačiča na vreme vrnuli v struko i se so kockice pomalem došle na svoje. Još se je nekaj pripetilo: nejso sam naši labodoritaši zablesnoli nek je Dalič preskočil Čirija Blaževiča, trenera sih trenerov, šteri je 1998. leta z svojimi „sineki“ osvojil brončano kolajno. Dvajsti let je Čirijovo brončano labodoritaško sonce svetilo na nebi Lejpe naše, a ve pak je ober sih Zlatkec Daličov i jako sam najgerek je li bode on duže na nebi od Čirija?

Kak i sako leto tak so i lani našoj dečici dare nosili Sveti Mikula i Ded Mraz. Ve na se zadje se zazvedilo da so si to brati (i Kain i Abel so si bili) sam je Ded Mraz pred hajdi let odišel v partijo. Još jempot se pokazalo da živleje piše kajkakše priče.

Međimorje naše malo je bogoboječe i v jemo živijo ljudi šteri verjejo da Božek postoji i to cirka devedeset procentov. Tak so i to dali kaj se zapiše dok so zadjipot spišuvali kuliko je nas Međimorcov na ovomo našemo falačko zemle med dvemi vodami. Se je to vredo sam nebrem razmeti kak smo si nejvečpot čestitali za ove naše minule svetke. Nejvečpot je to bilo ovak: „Srečne ti nadolazeče praznike želim!“ A šteri so to prazniki pravzaprav bili? Niti je Božič praznik, niti Štefaje, a niti pak novo leto, se so to blagdani. Čestitamo si kak da smo pred nekim v straho, kak da nas nešči posluša, kak da udba još postoji, nekak bi bilo nejlepše i nekak bi nam se šikalo da bi jeden drugomo čestitali ovak: „Srečnoga ti Božiča želem, srečno i blagoslovleno novo leto, nek nam Božek da zdraviče!“ A za se drugo se bodemo mi pobrigali jerbo zdrav čovek se more!

Ostavi komentar

Povezani članci

Ostanimo povezani

43,705FanoviLajkaj
608SljedbeniciSlijedi
0PretplatniciPretplatiti

NAJNOVIJE