[layerslider id=”6″]
Pak nikaj ne bode od rokometne želencije. Ne kaj ne bodemo dobili zlatno želencijo jerbo zbog toga smo prinas v Lepoj Našoj organizerali Evropsko prvenstvo, nek smo ostali brez bilo kakše želencije. Se se je rihtalo kaj bodemo, na se zadje, osvojili i to zlatno želencijo štero još nemamo vu svojemo skladišto. Ali kaj, ne smo igrali kak je trelo. Si znamo šteri je naš beteg vu sim športima, a i drugdi, dok nejbole tre unda nikak ne igramo, očem reči, igramo kak da so nam pune gače. Tak je i ve bilo. Dok smo došli do Francozov, šteri so več ne ono kaj so negda bili, ali mi smo igrali kak dečki z vulice, kak da smo se pred utakmico zišli, pak se niti ne poznamo. Zabadav se je Mirko Alilovičov na golu trgal i cukal, ali naši dečki so ne znali kaj očejo, kak da so ne znali da bode pobedil on šteri zabije vejč golov. A dok se tak igra unda se mora oditi po riti k meši. Naši rokometaši bodo i dale sam senjali zlatno želencijo i mogli bodo jo gledati dok jo bodo pak metali Francozima okoli šijaka. A dok Evropsko prvenstvo mine, a to bode za tri dni, unda bodejo naši rokometaši dali vum zakaj so ne došli do želencije: povredil nam se je Domagoj Duvnjak, a on je ipak naš nejbolši igrač i brez jega smo ne mogli se pobediti kak smo se dospomenuli. Ili kak je teca Franca rekla: Dečki so ne šteli ve pobediti dok ga Duvnjaka ne unda bi zišlo da smo jako dobri brez jega i da ga niti ne nucamo. A to si je Duvnjak ne zaslužil.
Na rokometnomo prvenstvo so igrali i naši sosedi Janezi. Dok so igrali vu Varaždino so stanuvali v Toplicama Sveti Martin. Koliko smo mogli čuti, neje jim ruon bilo lepo i nejso bili zadovolni. Sa sreča, jerbo da jim se je dopalo mortik bi i Sveti Martin išel na arbitražo kak je i to jif falačec zemle. A mortik bi iskali i celo Međimorje. Što zna, dok so Janezi v pitanjo nigdar se ne zna kaj jim je na pameti. Bili so prinas za Vincekovo, a nejso bili niti v jenoj pelnici, tak da so ne niti sprobali tua naša nejbolša vina na sveto. To vam je isto kak da idete v Rim, a ne vidite Papo.
Minoli so božični i novoletni svetki i kuliko sam mel za čuti, si okoli mene so pretiravali kaj se dotikavle jesti i pijače, ali čim se je leto brnulo mam smo stali na vago štera nam je pokazala istino: preniski smo za svojo kilažo. Mam nam se je vužgala črlena žarulica: tre nekaj naprajti za svojo lepoto, za svojo formo, a i opravo je jako teško navleči na sebe. Čuda je leži (???) oditi fkrej od punoga stola nek kupuvati novo opravo. Morem vam reči da sam i ja gruntal o tomo, očem reči, o dijeti, dva tri dni, a unda me je to minulo. Kak i navek dok mi vaga veli istino v lice. Pak sam se zarekel da pem na djeto od pondelka. Kak i navek. Zmislil sam se kak sam lani bil na djeti dva tjedne i zgubil sam četrnajst dni.
Nebrem razmeti kaj se bunijo te Puščinčari? Oni ne bi šteli anteno za mobitele na svojemo hataro, a z druge strane bi se šteli, prek mobitelov, spominati z celim svetom. Nebrejo meti se, i birke i peneze. Pak si mi imamo svoje antene (tu mislim na nas moške) nešči menše, nešči vekše. Ak je antena vekša leži se za jo prime se ono, očem reči, saka ona štera se mora ili pak oče. A dok se zazvedi kakšo što anteno ima, a stopram ak je vekša od one štero one doma imajo, unda pak čovek prime i one signale (!?) za štere se nigdar ne nadjal.
Dok z jedne strane naši težaki odhajajo vum delat z druge strane k nam dohajajo stranjski jerbo i Lejpa Naša je nekomo obečana zemlja, a i prinas nešči mora delati. Naši težaki odhajajo na zapad, a k nam dohajajo ovi z istoka. Navek je tak bilo kaj težaki idejo tua de jim bode bole ili pak de mislijo kaj jim bode bole. Naši težaki odhajajo z Međimorja jerbo so jim plače premale, a oni šteri dohajajo velijo da so naše plače vekše od onih pre jima doma. Ve čujemo da ga je još menši plače nek so naše makar si mi furt grtuntamo da so naše nejmenše. Čim je to počelo tak, mam mi Međimorci zovemo inšpektore nek pohalosijo što to itak k nam dohaja? Znate kak je to, mi smo još navek vekši katoliki od Pape i se mora biti onak kak dragi Božek zapoveda. Poglečte ve, težaki barbog da so došli, a mi jif ve očemo viziterati na se strane i ak ne bodo onakši kakše smo si mi pregruntali da bi morali biti, natirali jif bomo nazaj. A što bode unda delal? Pak tak i z našima delajo v Deželi, Osterajho i v Dojčlando, ne viziterajo nas preveč jerbo so srečni kaj smo došli. Se je to nampak na ovomo našemo sveto. Znate kaj, na penzionere nebremo računati kaj bi došli nazaj. Dok se čovek jempot odevči delati niti ga z bagerom ne muoči nazaj dovleči. A i nek uživlejo malo i brez posla. Zaslužili so si, makar ne dobavlajo tuliko kuliko so si zaslužili, ali nekak itak zvežejo kraj z krajom!
Z jene strane nam dohajajo stranjski težaki, a z druge strane premalo deco delamo tak da ga nas sako leto se meje na ovomo našemo Falačko zemlice med dvemi vodami. I ne sam kaj malo delamo deco, nek se i malo mladi ženijo. Malo jif se ženi, ali zato deco delajo vu fušo. I ne sam to, več od pol jif se ženi sam pre matičaro, a ne v cirkvi. A dok nas pitajo, si smo mi katoliki, a dok se tre v cirkvi ženiti unda zbegavlemo. Zakaj? Pak z matičarom se moremo čuda leži dospomenuti ak se tre reziti. Več pomalem i naši krčmari prepravlajo dvorane za rastave. Si znamo da so ove za gostuvaje velike i nejvečpot premale, ali ove za rastave so čuda menše. Još sam vam štel reči kak se je i lani narodilo vejč pucki nek dečkerov, a v isto vreme je hmrlo vejč moški nek ženi, tak da se moremo nadjati, črez par let, da bode v Međimorjo čuda vejč ženi od moški tak da bodo žene, najbrž, iskale težake za posel med ženskimi nogami negdi vuni. Ak ne bode tak unda bode ostal ženski vrčak neobdelani. A dok se ga ne zaštiha i ne obdela kak tre unda niti ne donaša nikšega roda. Kuliko vidim pak nas bode meje.
Minuli so božični blagdani i novoletni svetki i mam so počele svaje med našimi političarima. Nebrejo se dospomenuti kuliko komo pripada od političkoga kruha, što si je vrezal vejč nek so se dospomenuli? Najme kaj, gospon Mladen Novak, precednik naše Županiske skupštine si je pregruntal da on premalo vredi na ovomo našemo političkomo nebi i da ga se premalo pita dok se nekaj dela. A kak veli, drugač so se dospomenuli dok je bilo političko skončaje. Teško je tu nekaj reči, znate da se takši spominki nejvečpot delajo v štiri oke i i nigdar ga ne svedokov. No, verjem da se bode to se posložilo jerbo politika je takši posel kaj se najde za sakoga šteri oče delati. Ak sam dobro razmel gospona Novaka, on bi štel dobiti vejč posla jerbo ak so mo večniki zdigli plačo unda si on to hoče oddelati kaj ne bo zišlo da je preplačeni, pak bode moral nazaj donesti?
Ne znati zakaj se je tuliko praha zdiglo okoli nove knige našega Kristijana Novaka „Cigan, ali nejlepši“? Došlo je do toga kaj se je javil i sabornik Kajtazi šteri je zaduženi za Rome v našemo Saboro. Najme kaj, ciganov ga je seposod kak med nami tak i med Romima. Tak je navek bilo, a tak je i denes. A tak mi je rekla i teca Franca, rekla je: Dok sam još ja bila mala unda smo za sakoga šteri je ne bil kak tre rekli da je cigan, a nejvečpot ak je kral i jemal ono kaj je ne bilo jegovo. A sabornika Kajtazi bi prosil, dok je več v Saboro, nek se pobriga kaj bodo naši Romi z Kuršanca dobili šporcko dvorano. Školo imajo, a dvorano bi nucali. Čim to reši mam ga bodemo falill!
Čitam i čujem kak se penzioneri nedajo doli mladima, pak so se i oni hitili za kompjutere. Ak je kompjuterizacija za se unda je nekak čistam normalno da i svoj Falaček kolača dobijo i penzioneri. To je jako lepo, čuda toga bodo jim povedali, čuda toga bodo se navčili, a nekaj bodo i zapamtili. Najgerek sam, jako sam najgere kak bode to dale shajalo pre hiži? Do ve so sam vnuki furt viseli na kompjuteraj, a ve bodo i penzioneri. Ne znati kak bode to shajalo pre hižaj de je sam jeden kompjuter? I još nekaj, što bode delal domače posle, što bode obeda kuhal, dok so penzioneri na kompjuteraj? Nebrem znati zakaj mi je, dok sam to čital, pala na pamet ona stara istina: Se kaj znam navčil sam se v zabavišto! Malo sam jalen penzionerkama, tak sam se lepo se dospomenul z sosedom Barikom i več se par meseci igrala z mojim (čitaj: mobitelom), a ve ga je stajla i odišla na kompjuter!
Došel je k nam v Međimorje general Stepan Poltorak, minister obrane z Ukrajine, a prijeli so ga direktor Čateksa i naš gazda fabrike Šestan – Buš. A dok naši dečki pejo v Ukrajino jif bodo tam prijele Ukrajinke. Znajo naši gospodarstveniki z kim tre zafremati trgovino i kupčijo, očem reči, od čega muhe crkajo!
