15 C
Čakovec
Četvrtak, 28 ožujka, 2024

Zlato bo naše, ak se pobedimo!

[layerslider id=”6″]

Sosedovi rokometaši z Dežele, Janezi, so skorom pobedili Švabe, očem reči, več so jif pobedili, a unda so soci rekli da je ne gotovo dok oni ne velijo da je gotovo, pak so Švabi zravnali z penala šteroga so soci dosodili posle arbitraže z delegatom i saki je dobil po jednoga boda. Trener Janezov, Veselin Vujovič, je furt skakal i kričal kak so si protiv jega i jegovih rokometašov, a neje znal zakaj je to tak. A mi znamo zakaj?  Zato kaj se norčijo z tem Piranskim zaljevom i več sima ido na živce, a posebno nam Hrvatima jerbo je to pravzaprav Savudrijska vala na krajo štere so Janezi zazidali svojega Pirana. Pirana so zafremali, ve bi šteli još i morje, a dobili so građevinsko dozvolo sam za hiže. Ve se pokazalo da Janezi nej bili tak drčni z tom arbitražom i soci bi drugač sodili.

V morjo Savudriske vale so naši ribiči prijeli pune mreže ribi i dok so išli dimo zastajli so jif policaji z Dežele i šteli so kaj bi naši dečki stepli ribe nazaj v morje jerbo so to jive ribe. Unda je naš Ivek, kapetan broda, predložil policajima nek se ribe stepejo vum z mreži i nek se pregledne saka riba. Rekel je Ivek: One ribe štere govorijo hrvacki ostajajo nam, a one štere govorijo slovenski bodemo hitili nazaj v morje. Da čovek ne poverje, ali Janezi so pristali. Zazvedilo se da so sam tri ribe, i to one plave, znale slovenski.

Kak zgledi za to morje v Savudriski vali bodo morali pomoči si šteri morejo kaj i dale ostane naše kak je i bilo od stoletja sedmog. Najbrž ste čuli kak se je Plenkovičo nudil vukovarac i vukovarski heroj Perek Janjič z conom zvani Tromblon šteri je na Trpinskoj z tromblonom bojil četničke tenke, ali je on ne prešel jerbo ne zna plavati. Pred par dni se je Plenkijo ponudil Tomek Horvatinčič. Kupil je novoga glisera i ak Plenki oče on napravi tri – štiri kruge po Vali i reši se probleme.

Na se zadje se je zazvedilo kak je partiski političar Arsen Bauk dočakal Novo leto v Londono i to skupa z svojom pucom. Brzčas je to došlo vum jerbo je puca ne bila zadovoljna z Arsenom šteri je žmulil peneze i neje bil preveč galanten prema svoji puci. Kak se pripoveda pre čakoski gracki vuri, puca Zorana je stopram v Londono zazvedila da je Arsen z Brača i tak škrti kak i drugi, a si znamo da so i Škoti nastali tak kaj so Bračani pretirali z otoka svojo nejrasipnešo deco. Ak se narodiš kak bogec tu si nebreš pomoči, ali ak se oženiš za škrtoga to si si sam kriv, očem reči, to si bode sama kriva.

Da smo več na Bračo moram vam spripovedati kak so se svadile dve Bračanke. Nejpredi je to bilo malo glasneše, a unda so počele i kričati. Ne moram vam, niti pripovedati da so si nametale kajkaj toga. Se kaj so se mogle zmisliti. Na se zadje je stareša mlajšoj zbajala i to tak kaj je cela vulica čula: A ti pak si fljundra! No, ali joj je ova ne ostala dužna: I ti bi bila da si ne škrta… Pak sosede jena drugo nejbole poznajo.

Gripa je, na se zadje, ipak došla k nam v Međimorje makar imamo nejmenše plače v Lepoj našoj. Ne špara niti nas bokce. Kak niti naša Vlada. Što kupi dražešega auta te vejč prešpara. A si znamo da bokci ne kupuvlejo drage aute. Kupuvlejo jif oni šteri čuda imajo, pak čuda morejo potrošiti i kaj jim još čuda ostane. Pak takšima i tre pomoči kaj bodo čim vejč meli jerbo oni so te peneze na kup nanašali z svoje dve roke, očem reči, z deset prsti.

Živi zid je stal na strano maloga čoveka. I to ovoga blokeranoga, šteri je potrošil vejč nek je zaslužil. A zakaj je to tak, očem reči, zakaj so vejč trošili nek so zaslužili to nišči ne zna? To nišči ne pita? Najgerek sam, jako sam najgerek, je li bodo ve ljudima zbrisali duge čim je Živi zid prešel na jivo strano?

Znate vi kaj je statistika? To je točen zbroj netočnih podatkov. Ili kak velijo naši stareši, statistika je isto kaj i ženski badeki, ono kaj je nejglavneše skrivlejo, a se ostalo vidimo. Ali da ga ne te statistike mi Međimorci ne bi niti znali da ga saki den se meje kravi na našemo hataro. Ne bodete veruvali, ali v Dekanovco, Gorčano i v Kotoribi so nabrojili po pet kravi. V Orehovici ga nekaj malo vejč. Ve mi rečite kak unda morejo v našim restoranima saki den prodavati govedino i teletino? I to našo domačo. Kaj velite, tu nešči laže. I to pošteno. I još nekaj, naša deca po zabavištima i školama pijejo domače mleko sam ne znati otkod ga vozimo. Ne delamo deco i falijo nam težaki, nemamo krave, a unda nemamo niti teliče, oliti iceke, a jemo teletino. Se je nekak nampak vu toj Lepoj našoj. Več niti mlade snehe dok se svadijo jene drugoj ne namečejo da so krave jerbo najbrž več niti ne znajo kak prava domača krava zgledi. Dok sam to zgombal teci Franci mam mi je otpovedala: kaj te mlade snehe znajo kak je lepo dojiti krave.

Verjem da ga ne nikoga med nami što ne gledi i ne druka zanaše rokometaše šteri se nahitavlejo z labodom i tak očejo dojti do zlatne želencije. Kaj se želencije dotikavle brzčas so naši dečki, oliti kauboji kak jiv z conom zovemo, nejbole žereči. Mi v Lepoj našoj smo složili EU prvenstvo i pozvali smo i druge kaj bodo gledali kak mi dobavlamo zlatno želencijo, a ne kaj nas unda oni pobedijo prinas doma i to pre našom publikom. Naši so pobedili Srbijo i Islanda i več smo otputuvali v Zagreb z štiri bode, a pozabili smo da još moramo igrati z Šveckom i pobediti jif. Tak smo igrali kak da smo ne tam bili, očem reči, kak da je Červar odišel na kružni tok i pobral prvih šesnaest štere je zišel. Još jempot se je pokazalo da tre nejpredi skočiti unda reči hop ili ne tre predi podežigati ogja ak je zajec još v šumi. Toplo se nadjam da bode, na se zadje, bič počil v Zagrebo i da bode tua zlatna želencija ipak ostala prinas.

Kuliko vidim, a i teca Franca mi je rekla, da se bode ipak delal te Pelješki most. Več so ne niti Bosanci tak trdi kak je to pred mesec dni zgledalo. Kak zgledi nešči je i jim na rep stal, a čim so zgledali našo Kolindo na se so pristali. Evropa je preprajla peneze, more je tu, a Pelješac čaka. Kak zgledi posla bodo dobili Kinezi, a tak smo se špinčili da bodo to delala naša poduzeča, naši težaki. To je negda bilo jerbo denes nemajo težake, pak nema što delati. Velika bode sreča ak bodo toga posla dobili Kinezi, oni bar imajo dosti težakov.

Čuda nas Čakovčancov i Međimorcov se zmisli kakša je MTČ negda bila fabrika. Ne međimorska, ne hrvacka, ne evropska nego svecka. Si na sveto so znali za MTČ i za se ono kaj se je v toj fabriki naprajlo makar so ne točno znali de je Međimorje i Čakovec. Bila je to fabrika vu šteroj je delalo prek tri jezere ženi, a direktori i glavni so bili moški. Moram vam reči da so zanavek minula tua vremena dok je par moški moglo pod sobom foljgati tri jezere ženi. A kaj je denes ostalo od MTČ-a? Upravna zgrada, penzioneri i trači!

Denes je stranka Živi zid v uspono  i saki čas novinari, kak ovi z naliv-perom, tak i ovi z radija ili pak televizije, nekaj spituvlejo sabornika Iveka Pernara ili pak našega Brankeca Bunjca. Isto tak so negda furt nekaj spituvali Drageca Lesara dok je mel pod sobom Laburiste i šest sabornikov. Dečki z Živoga zida imajo furt nekaj za reči jerbo dosti toga znajo. Kaj reči, bole da jif spituvlejo novinari nego Uskok, Dorh, državni fiškal Dinko Cvitan ili pak sodec Mislav Kolakušič.

Pred nami je Vincekovo, godovno svetoga Vincija i započnejo posli v goricaj. Naši vinogradari i gorični težaki se več navelikom prepravlajo. Prosim vas kaj i vi dojdete. Tre dojti trse zalijati i prvo rozgvo vrezati jerbo ak ne bode tak ne bode ga niti kaj v jesen za brati. Si ste pozvani. Sobom dopelajte žene i dečico i zemite čuda dobre vole. More se dojti što kak oče, pešice, z peciklinom, tačkaj, motorom, autom, a morete dojti i na se štiri. I to da što oče. Gorice i pelnice so furt otprte. A fino i zrelo lanjsko vino nas se skupa čaka. Pazite kaj ne bodete zahuzali!

Da smo več v goricaj da vas pitam: znate zakaj žene ne hodaju v gorice i pelnice od Martinja do Vincekovoga? V to vreme ga tam ne nikših poslov!

 

Ostavi komentar

Povezani članci

Ostanimo povezani

43,705FanoviLajkaj
608SljedbeniciSlijedi
0PretplatniciPretplatiti

NAJNOVIJE